MINAGGAYAYYA KA KARI NGA TOLAY? Nu wan, anni i mamagayayya nikaw? I familiam, trabahum, relihiommu? Awayyana nga iinnaggammu i gannug nga mamagayayya nikaw—makabaling ta eskuela, makatallung ta makasta nga trabahu, onu makagatang tu bagu nga takay.

Magayayya i aru nga tolay nu maddeda i goal-da onu malada i gannug nga kakayàda. Ngem adde sonu anni yatun nga pagayayya? Maruddu nga temporario laman yatun yari tu makadiskorsonada.

Neyilustra i pagayayya nga makasta nga kondision nga ari insigida mappasa. Nelagum taw i emosion mamegafu ta pakkakontento adde ta monag anna fermi nga pagayayya ta pattolay, anna i gagangay nga pakkaraga nga mattulu-tuloy yatun.

Megafu ta yaw ay tulu-tuloy nga makasta nga kondision, neyilustra i pagayayya nga tadday nga pabbiahe, ari nga destinasion onu goal. I pakkagi nga “Magayayya ngà sonu . . .” ay gittana pangitalattan ta pagayayya.

Tapenu meyilustra, ikumpara i pagayayya ta makasta nga gawa-gawayyan. Kunnasi makkasta i gawa-gawayyattam? Tuttulattam i masirib nga tabarang ta pakkakan, pagehersisio, anna ta kukukuattam. Kunnatun gapa nga marresulta i pagayayya ta pattolay nga nakabase ta mapattalakkan ira nga prinsipio.

Anni ira nga prinsipio onu kualidad ta pattolay i mangipasingan ta dalan na pagayayya? Maski nu mas importante i karuan anne ta tanakuan, dakal i papel na tumunug ira:

• PAKKAKONTENTO ANNA KINAVUKA-PALAG

• MAKASTA NGA GAWA-GAWAYYAN ANNA KINATUYAG

• AYA

• PAMAKOMA

• GAKKAG TA PATTOLAY

• IDDANAMA

Kinagi na tadday nga respetadu nga libru na sirib: “Magayayya danuri awan tu pakaliwatadda ta dala-daladda.” (Salmo 119:1, NW) Ammuattam yatun nga dalan.