Daka-dakal i makua na edukasion nga nebase ta Biblia tapenu makkasta i pattolay. Ikonsidera i dua nga angngarigan: Si Ricardo anni Andres.

RICARDO: Kinse ngà paga laman, nakisali ngà ngana ta gang. Daka-dakal i influwensia niakan na bagu ira nga barkadà. Ambisiokku paga lagu i mefuku ta mafulu ragun! Gittana kaggalo, ngem ta diammi, atannang i paningadda turi ira ta nefuku tu mabayag anna respetadu ira. Ikaya ku mabbalin tu kagittada.

Naekspiriensà i ngamin nga kukukuan na gang, nelagum i droga, sekso, anna kinavayolente. Tadday gabi, nakalabammi i tadday nga gang. Nappirinnalattug kami. Abbo ku nu matay ngà, ngem nakatammang ngà nga awan tu nesimmu niakan. Kabalin natun, ninonono ku i pattolè anna i ikaya ku ira nga kuan, yari tu naddisidi ngà nga manguli. Ngem kunnasi? Pakiyoffunakku?

Aru ta parientes ku i ari magayayya. Napakaru i problemada. Ngem ari tu kunnatun i familia na tadday ta angkal ku. Masippo anna iyaplikada i prinsipio na Biblia. Nammuakku nira nga Jehova i ngagan na Dios. Ari nabbayag kabalin na gulu, nakimallo ngà kani Jehova, inusà i ngaganna anna nappoffun ngà sa. Kommananna, nakaddag ngà ta nattotto i tadday nga Saksi! Yayya i nanuddu niakan tu Biblia.

Ari nabbayag, nakka-problema ngà. Tawa-tawagaddà na dati ira nga barkadà nga mevulu nira. Maski mariga, kinagì nga manaki ku. Determinadu ngà nga ituloy i paggigiammù tu Biblia. Pia ngana laman ta kingnguà yatun! Talaga nanguli i pattolè, anna kurug i pagayayya ku.

Manono ku i pakimallo ku ta Dios, nga dati kayà ku i mefuku ta mafulu ragun tapenu mabbalin tu respetadu ta gang. Yari tu nikiddò sa nga makapasserbi ngà nakuan ta maski mafulu ragun bilang ngamin-tiempo nga mallayyagayya tapenu uffunan i totolay nu kunnasi ngà gapa noffunan. Gininnana i pakimallo ku, ta 17 dagun ngà ngana nga massesserbi ta ngamin-tiempo! Anna ari ngà vuluvuga nefuku.

Ngem aru ta dati nga barkadà i nakafuku ta aru ngana nga dagun. Natay ngana gapa i karuan. Nu nonopakku i nappasa, dakal i pappabalo ku ta Saksi ira nga parientes ku. Determinadu ira nga mabbalin tu neruma, anna iyaplikada i nagigiammuda ta Biblia. Mas nirespetò ira anne ta maski sinni ta gang. Ngem mas i pappabalo ku ta Dios ta nitudduna i kapianan nga pattolay.

 ANDRES: Neyana anna ziminakal ngà ta pobre nga lugar nga gagangay laman i paddroga, pangikil, pappatay, anna prostitusion. Minaggillellaw anna adikto ta cocaine i yamà. Kanayun ira maddama na yenà​—ta verbal anna ta pisikal.

Abbabbing ngà paga laman, mini-minum ngà ngana tu binarayang anna maddroga. Kanayun ngà ta dalan nga makkoko anna ilakù i nakoko ku. Ta paddakal ku, ikaya na yamà nga makiddukko niakan yari tu sinudduannà ta ilegal nga pangitallung anna pangilaku tu droga anna tanakuan paga ira nga megamma nga produkto ta nasiommi. Alistu ngà laman nakka-kuartu. Tadday aggaw, minay i pulis ira ta balemi. Inarestodà anna nasentensian ngà nga mefuku tu lima ragun megafu ta attempted murder.

Tadday nga umma, neyanunsio ta affukutan nga imbitadu i presu ira ta paggigiammu tu Biblia na Saksi ira ni Jehova. Nagatende ngà. Fustu ira i naginnà, yari tu nakipaggigiammu ngà tu Biblia ta Saksi ira. Ariadda pinili-pili i nitudduda ta Biblia, nipasingadda lallagu niakan i atannang nga estandarte na Dios ta moral.

Nanono ku gabbalaman nga ari ngà makapanguli nu awan tu manguffun niakan, mas ngana turi ta inananassinnà na presu ira nga kontra ta kukukuakku. Yari tu nakkiddaw ngà tu sikan anna sirib kani Jehova, anna inuffunannà. Imbes tu maganassing ngà nira, magutu ngà nga nakiyuvovug ta karuan nga presu meyannung ta Biblia.

Turi ta mallawan ngà ngana, maggudu-gudu ngà nga gittana kayà ku paga mabbayag ta affukutan! Ta pappanaw ku, egga ira i presu nga nawwewweg onu nappayapay. Meddu paga nga kinagi na karuan, “Lubbe ka ngana, masippo nga pastor.”

Siguradu nga marake ngana i nesimmu niakan nu ariakku nappatuddu ta Dios. Mabbala-balo ngà ta iddeddukannà na Dios anna ariannà nibilang nga imposible ngana nga manguli. *