NU KUNNASI INTERAMENTE NGA MAWAWAN I PROBLEMA
‘Mannanayun i Imammo’ ta Pappatulan na Dios
Aranni ngana nga mangirattal tu imammo anna pattaradday ta davvun i nabayag ngana nga iinnaggattam nga Pappatulan na Dios—tadday nga gobiernu ta interu mundo nga nipataddag na Dios. Nepromesa ta Salmo 72:7 nga ‘mannanayun i imammo’. Ngem sonu anni mamegafu nga mammaguray i Pappatulan? Kunnasi metuppal yatun? Kunnasi ka mabenefisiowan?
SONU ANNI DUTTAL I PAPPATULAN?
Niprofesiya na Biblia i kakkadda-kaddag ira nga mesimmu nga mangipasingan nga aranni ngana duttal i Pappatulan na Dios. Danaw ira nga mesimmu ay “panakkilalan” nelagum ngana i gerra ta interu mundo, bisin, taki, lunig ira, anna umara-aru nga kinarake.—Mateo 24:3, 7, 12; Lucas 21:11; Nepakannammu 6:2-8.
Neprofesiya paga: “Duttal noka i ziga-riga ta pangurianan ira nga aggaw. Tatun ira noka nga aggaw, ayatan na totolay i baggi da laman, anna kuartu laman i agga-nono da . . . ari nga manguru-kurug ta magana da, ariad-da nga ammu i mabbala-balo, anna awan tu agganassing da ta Dios. . . . Manattazzi paga noka ira, awan tu allo da ta ikattolay da, mamara-parake ira, ariad-da nga matangngallan i baggi anna nono da, kitapporay, anna ikalussaw da noka i mapia. . . . Atatannang i paningannad-da ta baggi da, anna i ala-alerad-da noka i pappaga-pagayaya laman anne ta Dios.” (2 Timoteo 3:1-4) Dati ngana nga kunnaw i ugali na karuan. Ngem sangawe, maggi kunnatun ngana i ngamin.
Namegafu nga natuppal yatun ta dagun 1914. I kurug, nakkomento i historiador, popular nga pulitiko, anna autor ira ta panguli ta mundo kabalin natun nga dagun. Angngariganna, nitura na historiador nga taga-Denmark nga si Peter Munch: “Daka-dakal i efektona ta historia na tolay i pabbatta na gerra ta 1914. Nige natun nga dagun, abbo na totolay nga makkasta i paddia-paddian, . . . ngem zimittal i tiempo na trahedia, assing, lussaw, anna pavvuru-vurung ta ngamin nga lugar.”
Ngem kagitta na bagiu nga mabalin lagapa danatun nga paddia-paddian. Ipasinganna tu aranni ngana nga mammaguray i Pappatulan ta interu davvun. Yaw gapa i positibo nga kinagi ni Jesus ta panakkilalan ta panuppalan: “Melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay. Ta kabalin naw, duttal ngana i panuppalan.”—Mateo 24:14.
Yatun nga mapia nga dumug i pinakamensahe na Saksi ira ni Jehova. Nateman paga lagu i primeru nga publikasiodda tu Passifusifutan Mangipakannammu ta Pappatulan ni Jehova. Regular nga mabibbig tatun i makakkasta nga kuan na Pappatulan para ta sinolay anna ta davvun.
KUNNASI I PAMMAGURAY NA PAPPATULAN NA DIOS?
Danaw i appa nga importante nga kinakurug:
-
Ari nga usan na Pappatulan i sinni laman nga pulitiko ta mundo.
-
Manaki na pulitiko ira ta mundo nga mawawan i pakapangnguada yari tu kontradda i Pappatulan na Dios.—Salmo 2:2-9.
-
Daralan na Pappatulan i pulitikal ira nga gobiernu nga maya maddomina ta totolay. (Daniel 2:44; Nepakannammu 19:17-21) Armagedon i agal ta ultimu nga gerra ta interu mundo.—Nepakannammu 16:14, 16.
-
Mapaliag ta Armagedon i sigga-tulu ira nga makimoray ta Pappatulan anna maddian ira Nepakannammu 7:9, 10, 13, 14.
ta memammo nga bagu nga mundo. Ira i kagian na Biblia nga “magaru nga totolay” nga posible nga minillion i biladda.—
KUNNASI KA MABENEFISIOWAN TA PAMMAGURAY NA PAPPATULAN?
Mawag i pakannammu tapenu mabbalin tu sakup na Pappatulan na Dios. Nipakimallo ni Jesus ta Dios: “Yaw i inango nga adde ta ngangangay: i pakannammu da tu sikaw i tattadday nga kurug nga Dios, anna i pakannammu da gapa kani Jesu-Cristo nga zinog mu.”—Juan 17:3.
Nu mammammu na totolay si Jehova nga Dios bilang Persona, kuruga mabenefisiowan ira. Ikonsidera i dua laman: Ollu, massikan i pangurugda nisa. Makumbinsi ira tatun nga pangurug nga nebase ta ebidensia nga kuru-kurug i Pappatulan na Dios anna aranni ngana i pammagurena. (Hebreo 11:1) Mekarua, dumakal i ayada ta Dios anna ta kasittoleda. Paguyuan ira na ayada ta Dios nga napafutuan nga parulattan yayya. Paguyuan ira na ayada ta kasittoleda nga iyaplika i kinagi ni Jesus: “Kuan nu ta ikattolay nu i ikaya nu nga kuad-da nikamu.”—Lucas 6:31.
Kagitta na minaggiddu nga yama, ikaya na Namaratu i kapianan para nittam. Ikayana nga maekspiriensa tam i kakkagian na Biblia nga “kurug nga pattolay.” (1 Timoteo 6:19) I pattolay sangawe ay ari tu i “kurug nga pattolay.” Mariga-riga i pattolay na minillion. Tapenu manono mu nu kunnasi i “kurug nga pattolay,” ikonsidera i karuan ta makakkasta nga gannug nga kuan na Pappatulan na Dios para ta sakupna ira.