Ipagaram na United Nations ta ngamin nga totolay nga makkinna-uffun ira, respetuadda i kepangngattan na kasittoleda, anna protektadda i pallevu. Ngatta? Kagitta na kinagi ni Maher Nasser ta UN Chronicle, “mafektan i totolay ta kada nasion ta abnormal nga panguli na klima, sindikato, ari tu patas nga pattratu, awan tu immanna nga gulu, nafuersa nga pagali na totolay, terorismo, makeyali ira nga taki, anna karuan paga.”

Ipagaram gapa na karuan i tadday nga gobiernu ta interu mundo. Kasali tatun si Dante (1265-1321) nga Italian philosopher, minabbersu, anna sikat nga pulitiko anna si Albert Einstein (1879-1955) nga physicist. Mangurug si Dante nga awan tu imammo ta mundo nga pinassirina na pulitika. Nipakolina i kinagi ni Jesus nga “ari nga makapabbayag i nasion nga maggurungay anna maggegerra laggapa i totolay na.”​—Lucas 11:17.

Kabalin na World War II, nga napasabug i dua nga atomic bomb, nattura si Albert Einstein ta General Assembly of the United Nations nga mabibbig gapa na publiko. Kunna, “mawag nga kuan insigida na United Nations i ngamin nga kawagan tapenu mapataddag i tadday nga kurug nga gobiernu.”

Ngem masiguradu tam kari nga ari mabbalin tu kurakut, awan tu kapasidadna, anna marake i pulitiko ira nga parte naw nga gobiernu? Onu marake lagapa ira gittana karuan nga mammaguray? Iperaddam naw ira nga pakkiavu i kinagi na Britano nga historiador nga si Lord Acton: “Posible nga makadaral i pakapangngua anna siguradu nga makadaral i daka-dakal nga pakapangngua.”

Maski nu kunna, tapenu kurug nga memammo i totolay, mawag tu mattaradday ittam. Ngem kunnasi metuppal yatun? Realistiko kari yatun? Wan, segun ta Biblia. Realistiko anna matuppal yatun. Kunnasi? Ari nga gukaban na tadday nga gobiernu nga pammagurayan na kurakut ira nga pulitiko. Nu ari, gukaban na gobiernu nga ipataddag na Dios. Gukaban paga natun nga gobiernu, ipasingan na Dios i kepangngattanna nga mammaguray ta pinaratuna ira. Anni yatun nga gobiernu? Kinagi mismu na Biblia​—i “Pammaguray na Dios,” onu Pappatulan na Dios.​—Lucas 4:43.

I Pappatulan na Dios i agga-nono ni Jesu-Cristo ta modelo nga pakimallona: “Maparattal paray i Pammagurem. Makua i urem toye ta davvun.” (Mateo 6:9, 10) Wan, ituppal na Pappatulan i uray na Dios ta davvun, ari tu i uray na totolay nga minakkaraga ta pakapangngua onu makasarili.

Magalan gapa i Pappatulan na Dios nga “Pappatulan na langi.” (Mateo 5:3, NW) Ngatta? Egga yatun ta langi, awan ta davvun, ngem pammagurayanna i davvun. Kayàna kagian, ari nga magawag yaw nga gobiernu tu finansial nga suporta. Anni mabba nga banna-bannay yatun ta totolay!

Ipasingan na termino nga “pappatulan” nga pammagurayan na patul i Pappatulan na Dios. Si Jesus i Patul anna nalawàna i autoridadna ta Dios. Kagian na Biblia meyannung kani Jesus:

• “Mepaabaga sa i pammaguray . . . Awan tu pagaddetan na pallawa na pammagurena anna na imammo.”​—Isaias 9:6, 7.

•   “Neddan yayya tu pammaguray, dayaw, anna pappatulan, tapenu passerbian yayya na ngamin nga totolay ta nadduruma nga nasion anna lengguahe. Mannanayun i pammagurena.”​—Daniel 7:14.

• “I pakawayya nga mammaguray ta tanga-ravvunan ay kua ngana na Yafu [nga Dios] tam tuange ta Cristo nga zinog na. Yaya ngana i mammaguray adde noka nga awan tu panuppalan na.”​—Nepakannammu 11:15.

Bilang ketuppalan na modelo nga pakimallo ni Jesus, interamente nga ituppal na Pappatulan i uray na Dios ta davvun. Magigiammu na ngamin nga totolay nga tangngallan i planeta tapenu manoli i kastana anna mapannu tu inango.

Importante ta ngamin, tudduan na Pappatulan na Dios i sakupna ira. Parehu ira nga estandarte i metuddu ta ngamin. Awan tu gulu onu passirina. “Ariadda mangngua tu maski anni nga makapataki onu makadaral . . . megafu ta i davvun ay siguradu nga mapannu tu pakannammu kani Jehova nga kunna dana-danum nga manakkag ta bebay,” kagian na Isaias 11:9.

Mattaradday anna mattolay tu memammo i totolay ta interu mundo, gannug nga ari matuppal na United Nations. “Mattolay ira ta imammo nga mannanayun,” kunna Salmo 37:11. Ari mabbayag, awan ngana sangaw i uvovug ira nga gitta na “krimen,” “polusion,” “kinapobre,” anna “gerra.” Ngem sonu anni nga mesimmu yatun? Sonu anni mamegafu nga mammaguray i Pappatulan na Dios? Kunnasina ituppal yatun? Anna kunnasi ka mabenefisiowan ta pammagurena? Innattam.