“Nu mattalovu ta kunna kaddo i marakay ira, anna mapprogreso danuri i marakay i kuad-da, ngem mapittanan nga madaral ira.”​—SALMO 92:7.

Nagigiammu tam ta nappasa nga artikulo nga umara-aru i marake nga mesissimmu. Ari tam ngana nakuan makaddag tatun megafu ta dati ngana nga kinagi na Biblia ta 2 Timoteo 3:1-5 nga ta “pangurianan ira nga aggaw,” kitaddake i totolay. Pangurianan ira nga aggaw na anni? Na marake nga totolay ta mundo. Aranni ngana nga daralan na Dios danuri i manaki da i manguli. Kabalin na, danuri laman totolay nga tumuttuttul ta Dios i mattolay ta davvun. “I matunung ira ay irensiad-da i davvun, anna maddian ira taw tu mannanayun.”​—Salmo 37:29.

“I Dios nga mangiyawa tu imammo ay mammokan na noka si Satanas.”​—ROMA 16:20, NW.

Sonu awan ngana si Satanas, i demonio ira, anna i marake ira nga totolay, memammo ngana saw ta davvun. Nipromesa na Namaratu: “Awan tu sinni laman nga mangananassing” nikaw.​—Mikias 4:4.

“Makitappaddian ngana i Dios ta sina-sinolay . . . Funatan na ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki.”​—NEPAKANNAMMU 21:3, 4.

Awan ngana tu ziga-riga anna taki ta alsan na Dios i ngamin nga perwisiu nga megafu kani Satanas, Adan, Eva, anna ta kina-imperfekto tam. Megafu tatun, “awan ngana noka tu matay.” Mattolay tu mannanayun danuri mangaya anna tumuttuttul ta Namaratu. Ngem sitaw i paddianadda?

“Magayayya noka i tana-tana anna i mamaga nga davvun, ay mappalupagia noka i disierto anna mallappaw nga kagitta na safron.”​—ISAIAS 35:1.

Sonu pawanan na Dios i marake, mabbalin ngana tu paraiso i davvun! Aru noka i makkarasta ira nga parke anna hardin, anna aru i makan. (Salmo 72:16) Marenu anna napannu tu sigga-matolay nga pinaratu i bebay, weg, anna i bannag ira. Ari tam ngana gapa noka nga usan i uvovug nga “polusion”! Maddian i tolay ira ta balay nga nipataddag da. Awan ngana gapa noka tu totolay nga awan tu balay na, mabisin, onu pobre.​—Isaias 65:21, 22.

“I totolay . . . ay maginnolay.”​—KINGNGUA 24:15.

Ikaya mu kari nga masingan uli i natay ira nga iddeddukammu? Paginnolayan noka ira na makapangngua-sa-ngamin nga Dios ta Paraiso nga davvun. Makilalam ira anna makilala daka gapa. Nonopammu ngana laman i pagayayya mu anna i pagayayya da! Ngatta ta makasiguradu ittam nga mesimmu yaw? Ta Biblia, egga ira i manakam anna abbing ira nga napaginnolay anna nakavulu da uli i familia da. Aru paga lagu i nakasingan ta pamaginnolay ni Jesus.​—Lucas 8:49-56; Juan 11:11-14, 38-44.