Ngatta Mazziga-riga, Mallakay, Mabbako, Anna Matay Ittam?
Para ta Namaratu, ána na ittam yari tu ari na kayà nga mazziga-riga ittam. Ngem ngatta gafu napakaru i mariga-rigatan sangawe?
Mazziga-riga Ittam Megafu ta Ollollu nga Magana Tam
“Megafu ta tadday nga tolay, egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay.”—ROMA 5:12.
Pinaratu na Dios i ollollu nga magana tam, si Adan dua ni Eva, nga perfekto i nono anna baggi da. Pinaddian na gapa ira ta tadday nga paraiso ta davvun nga magalan tu hardin na Eden. Kinagi na nira nga awayya da kuman ta vunga na ngamin nga fun ta hardin, fuera ta tadday. Ngem kiminan lagapa si Adan anna si Eva ta vunga natun nga fun yayya nga nakaliwa ira. (Genesis 2:15-17; 3:1-19) Megafu tatun, pinapanaw ira na Dios ta hardin yayya nga nazziga i pattolay da. Nakka-ana ira anna nazziga-riga gapa i ána da. Nallakay, nabbako, adde ta natay ira. (Genesis 3:23; 5:5) Naggafu ittam kani Adan anna kani Eva yayya nga mattaki, mallakay, mabbako, anna matay ittam.
Mazziga-riga Ittam Gapa Megafu ta Marake ira nga Espiritu
“I mundo ay egga ta pammaguray na Demonio.”—1 JUAN 5:19.
Magalan tu Satanas yatun nga “Demonio.” Tadday bi yayya nga anghel nga narrebelde ta Dios. (Juan 8:44; Nepakannammu 12:9) Sinuttul gapa na karuan nga anghel si Satanas. Nagalan ira tu demonio. Usu-usadda i pakapangngua da ta pangilogo ta totolay tapenu pallikuradda i Namaratu. Influwensiadda i totolay tapenu magangngua tu marake. (Salmo 106:35-38; 1 Timoteo 4:1) Kakayà ni Satanas anna na demonio ira nga parigatan i totolay.
Mazziga-riga Ittam Megafu ta Marake ira nga Desisiottam
“Anni laman i nimula na tolay, yatun gabbalaman i gataban na.”—GALACIA 6:7.
Mazziga-riga ittam megafu ta namana tam nga liwa anna ta influwensia ni Satanas ta mundo. Ngem nu karuan, sittam lapa i makalliwa ta pazziga-riga tam. Kunnasi? Nu magangngua ittam tu marake onu marake i desisiottam, marake gapa i resulta na. Ngem nu magangngua ittam tu mapia, mapia gapa i resulta na. Angngarigan na, nu mapammakatalakkan, malappo, anna iddukan na tadday nga atawa anna yama i familia na, pammakapianan na yatun anna mapagayayya na i familia na. Ngem nu minassugal, minaggillellaw, onu talakag yayya, mazziga-riga i familia na. Makasta gafu nga magginna ittam ta Namaratu nittam. Ikaya na nga gatabattam i mapia ira nga gannug, nelavu i ‘memammo nga attolay.’—Salmo 119:165.
Egga Ittam Ngana ta “Pangurianan ira nga Aggaw”
“Ta pangurianan ira nga aggaw . . . , ayatan na totolay i baggi da laman, anna kuartu laman i agga-nono da . . . , ari nga manguru-kurug ta magana da, . . . ariad-da nga matangngallan i baggi anna nono da, kitapporay, anna ikalussaw da noka i mapia.”—2 TIMOTEO 3:1-5.
Kunnatun ngana i ugu-ugali na totolay sangawe. Pakurugan natun nga egga ittam ngana ta “pangurianan ira nga aggaw.” Kagian paga na Katurakan nga ta tiempo tam, egga i gerra, bisin, masisikan nga lunig, anna taki ira. (Mateo 24:3, 7, 8; Lucas 21:10, 11) Danatun i makagafu ta pazziga-riga anna patay.
