“Mattrabahu lallagu ta anni laman nga matunung nga ikalangan. Ta kunnuri, awayya na nga . . . makoffun gapa ta mariga ira.”​—EFESO 4:28.

Pagaramman ittam na Namaratu nittam nga mapeggan tu positibo nga pagimamma ta trabahu. Ta ngatta? Magayayya i tolay nga malallappo ta trabahu ta meyawa na i pakawagan na anna na familia na. Makaduffun paga yayya ta makawag. Kakayà gapa yayya na amo na. Dakal i posibilidad na nga ari nga masesante ta trabahu i tadday nga malappo. Fustu gafu i kagian na Katurakan nga ‘regalu na Dios’ i vunga na pallallappo ta trabahu.​—Eclesiastes 3:13.

“Mattalo kami nga marenu i konsensia mi, anna karagatammi nga mattolay nga mapammakatalakkan ta ngamin nga gannug.”​—HEBREO 13:18, NW.

Nu mapammakatalakkan ittam, ari nga mawawan i respeto tam ta baggi tam, memammo i nono tam, anna masingngo i pakkatrug tam. Mattalo anna irespeto ittam gapa na tanakuan. Ari nga maekspiriensa danatun na ari mapammakatalakkan nga totolay. Makokkonsensia gapa ira anna mavurung nga magafutan na tanakuan i kukukuadda.

“Iyarayyu nu i attolay nu ta pangaya ta kuartu, anna makkontento kamu ta anni laman nga egga nikamu.”​—HEBREO 13:5.

Mawag tam i kuartu tapenu makagatang ittam tu makan anna karuan nga pakawagattam. Ngem kuruga delikadu i “pangaya ta kuartu.” Ufutan na tolay nga mangaya ta kuartu i tiempo anna sikan na ta pagaleg tu mas aru paga nga kuartu. Megafu taw, awayya na nga madaral i relasion na ta atawa na, awan tu oras na ta ána na, anna awayya na tu mattaki yayya. (1 Timoteo 6:9, 10) Awayya na gapa nga matenta nga magangngua tu marake. Kinagi na mauto nga tolay: “Aru i bendision nga malawa na matalo nga tolay, ngem makaliwa noka i tolay nga apuradu nga marriku.”​—Proverbio 28:20.

“Immugurammu i praktikal nga ka-uto anna i abilidad nga mannono.”​—PROVERBIO 3:21.

Makaduffun i sekular nga edukasion tapenu mabbalin ittam tu responsable nga adulto anna magana. Ngem ari nga meyawa natun i mannanayun nga seguridad anna pagayayya. Tapenu makasta i pattuppalan na ngamin nga kukukuattam, mawag tam i edukasion nga maggafu ta Dios. Kagian na Katurakan meyannung ta tolay nga minattuppal ta Dios: “Ngamin i kuan na ay mattuppal ta mapia.”​—Salmo 1:1-3.