“Makkapaka-pakoma kamu nu egga i taki na nono nu ta kataggi-tadday nikamu.”​—COLOSAS 3:13.

Makaliwa ittam ngamin. Awayya na nga matakitattam i tanakuan onu sittam i matakitadda. Kayà na kagian, mawag tam ngamin i mamakoma anna mapakoma. Nu pakomattam i nakataki ta nittam, alsattam ngana i taki na nono tam ta nisa. ‘Ari tam nga ibalo i marakay nga makua nittam,’ anna ari tam gapa nga kanayun nga ipanono ta nisa i nakkamalian onu pakkafian na. (Roma 12:17) Ngem kunnasi nu fermi ittam nga natakitan anna agga-nono tam i nesimmu? Marespeto nga kibbidattam yayya ta pribadu. Kibbidattam yayya tapenu metoli i imammo, ari tu tapenu pakurugan nga sittam i fustu.​—Roma 12:18.

“Mappakalinno kamu lallagu, anna ipay nu nga kanayun ta nono nu tu mas mapia i karuan ira nga totolay anne nikamu.”​—FILIPOS 2:3.

Kakayà na totolay nga makikavulu nittam nu mapakalinno anna marespeto ittam. Ammu da gare nga masippo anna makonsiderasion ittam anna ari tam ira nga basta ngana laman takitan. Ngem nu agga-nono tam nga mas mapia ittam ta tanakuan onu  kanayuttam nga ipilit i ikaya tam, marresulta yatun ta lussaw anna paddarama. Lillitan ittam na totolay anna pilippiga laman i mabbalin tu kofuttam.

“I Dios ay arian na nga padduma-ruman i pangikakua na ta totolay. Ta alawatan na i sinni laman nga matunung anna minakkimoray sa, maski nu anni nga rasa i naggafuan na.”​—KINGNGUA 10:34, 35.

Ari nga faboran na Dios i karuan megafu laman ta lahi, lengguahe, estado ta pattolay, onu kulor na tabbi da. “Tadday laman nga tolay i pinaratu na nga naggafuan na ngamin nga rasa na totolay.” (Kingngua 17:26) Kayà na kagian, mawwaragi i ngamin nga totolay. Nu marespeto anna masippo ittam ta tanakuan, mapagayayya tam ira, magayayya ittam gapa, anna mapagayayya tam i Namaratu nittam.

“Mappakasippo . . . kamu.”​—COLOSAS 3:12.

Nu masippo ittam, komfortable i totolay nittam. Ari ira maganassing nga kibbidan onu itunung ittam ta ammu da nga kalmadu ittam. Nu egga gapa i makaporay nittam, awayya na nga makkalma yayya nu malumamo i tabbag tam. Kagian na Proverbio 15:1: “Mawawan i poray nu malumamo i tabbag, ngem mamappatu ta ulu i mataki nga uvovug.”

“Mas dakal i pagayaya ta pangiyawa anne ta pangalawa.”​—KINGNGUA 20:35.

Aru nga totolay sangawe i kakkam anna makasarili. Ngem mas nga magayayya danuri minangngiyawa. (Lucas 6:38, NW ) Magayayya danuri minangngiyawa ta mas ayatadda i totolay anne ta material nga gannug. Yatun gabbalaman nga aya i mamaguyu ta nira nga mappabalo anna appresiadda danuri nangiyawa gapa nira. (Colosas 3:15) Iyavu mu ta baggim, ‘Sinni i kayà ku nga kavulu—danuri itu anna ari nga minappabalo onu danuri minangngiyawa anna minappabalo?’ Nu kayà mu gafu i totolay nga minangngiyawa anna minappabalo, mawag tu kunnatukka gapa.​—Mateo 7:12.