Mappakariga ta inaggaw i aru ta nittam tapenu laman masuportattam i pakawagattam. I marake paga, mas marigatan ittam megafu ta problema ira ta mundo. Ta ngatta?

• Nu magulu i tadday nga lugar, mangngina i makan anna paddianan tatun.

• Megafu ta krisis, umaru i mawanan tu trabahu onu mapakarianan i sueldu da.

• Megafu ta kalamidad, aru i mazziga ta nadaral i pannegosiowadda, baleda, onu i pakkukua da ira.

• Nu ammum nga ibadyet i kuartum, mas preparadu ka nu egga i krisis.

• Ari tu permanente i finansial nga seguridad; awayya na nga mofu i aleg mu, i unnug mu, anna i pakkukuam ira.

• Egga ira i ari nga magatang na kuartu, gitta na pagayayya anna pattaradday na familia.

Kagian na Biblia: “Basta egga i kanan anna passinnut-tam, kontento ittam ngana tatun.”​—1 Timoteo 6:8.

Nu kontentu ittam, magayayya ittam nu egga ngana i pakawagattam ira. Importante i pabbalin tu kontentu mas ngana nu afektadu i pakkatolayattam.

Tapenu makontentu ittam, mawag nga mappasimple ittam. Nu mas dakal i gastu tam anne ta aleg tam, umaru laman i problema tam.