Afektadu ta pisikal anna emosional i totolay megafu ta problema ira ta mundo, yari tu nonopadda nga ari ngana vuluvuga nga makkasta i situasion. Anni i efekto na ta nira?

• Manaki na karuan nga nonopan i mesimmu ta mappange.

• Magillellaw onu maddroga i karuan tapenu makattamadda i problema da.

• Matageno na karuan nga awan tu sesserbi na pattolay da, yari tu manono da i mappakamatay.

• Mappasa lapa i karuan nga problema. Posible paga lagu nga makkasta i situasion.

• Maski ari nga manguli i situasiommu, egga lapa i makuam tapenu makapagattam ka.

• Nipromesa na Biblia i permanente nga solusion ta problema tam ira.

Kagian na Biblia: “Arian nu nga kavurungan i mawag nu nonumma; ta egga laman i mekavurung ta kagaggaw. Arian nu ngana nga lannappan i problema nu tatun nga aggaw.”​—Mateo 6:34.

Intindian laman i mesimmu ta kadaggaw. Ariammu kuruga mavvuru-vurung ta mesimmu ta mappange ta baka mapagurayammu i mawag mu nga kuan sangawe.

Mas ma-stress ka laman anna mawanakka tu inanama nga makkasta i mappange nu pakavurungammu i gannug ira nga baka ari mabba nga mesimmu.

Kinagi bi na tadday nga salmista ta pakimallo na ta Dios: “I uvovug mu ay kunna allamparan nga mangirollu niakan, anna tulu ta ek-ku ira nga laka-lakaran.” (Salmo 119:105) Ngatta neyarig ta allamparan anna tulu i Biblia nga Uvovug na Dios?

Ta mazibbo nga gabi, mawag tam i allamparan tapenu masingattam i pabbatayattam. Kunnatun gapa i Biblia—mangiyawa tu praktikal ira nga tabarang nga mangigiya nittam nu magangngua ittam tu madammo ira nga desision.

Manawagan gapa na tulu i laka-lakarattam tapenu masingattam i egga ta arayyu. Kunnatun gapa i Biblia​—ipasingan na nittam nga egga i makakkasta nga mappange.