Kunnatun i konklusion na international team na researcher ira nga naggigiammu meyannung ta panguli-uli na klima. Nu mangurug ka ta minaggiddu nga Namaratu, magga manono mu tatun nga konklusiodda i kakkaru nga natural nga proseso nga kiningngua na Dios tapenu makapattalupaddian tu mannanayun i planeta tam.

Ngem megafu ta kukukuan na totolay nga makadaral ta planeta tam, mas paga ta natural ira nga proseso i kawagan. Ngatta siguradu ittam nga egga i kuan na Dios nga solusion?

Nakalista ta kahon i teksto ira nga mamakurug nga ari nga madaral i planeta tam, nu ari, mattalupaddian yatun tu mannanayun.

• Pinaratu na Dios i planeta tam. “Ta gafa-gafu, pinaratu na Dios i langi anna i davvun.”—Genesis 1:1

• Kukua na Dios i planeta tam. “I tanga-ravvunan anna ngamin nga egga sa ay kukua na YAFU.”—Salmo 24:1

• Dinisenio na Dios i planeta tam nga ari vuluvuga nga madaral. “Pinataddag mu i davvun ta patuno nga maladda, ay ari nga mayayyag vuluvuga.” —Salmo 104:5

• Nipromesa na Dios nga mattalupaddian tu mannanayun i inango ta planeta tam. “I kurug nga Dios, i Nagangngua ta davvun, . . . arian na pinaratu yaw nga awan tu sesserbi na, ngem kiningngua na yaw tapenu paddianan.”—Isaias 45:18

• Nipromesa na Dios nga maddian tu mannanayun i totolay taw ta planeta tam. “I matunung ira ay irensiad-da i davvun, anna maddian ira taw tu mannanayun.”—Salmo 37:29

Dinisenio ni Jehova a i planeta tam nga egga ira i natural nga proseso na nga massuporta ta rasonable nga aktibidad na totolay. Kinagi na Biblia nga aranni ngana nga pagimmangan na Dios i pangabuso na makasarili ira nga totolay ta planeta tam.—Nepakannammu 11:18

Nipromesa na Biblia nga tatun nga tiempo, pabbalinan na Dios i planeta tam nga marerenu anna makakkasta nga paraiso anna iyawa na i karagatattam.—Salmo 145:16