PARA TA KABATAAN
9: Kata-katolay
I KEBALINANNA
I kata-katolem ay ari laman tu basta i ngagan anna itsuram. Nelagum taw i prinsipio, kuru-kurugammu, anna personalidad mu. I kata-katolem gafu ay i ngamin nga meyannung nikaw—ta unag anna ta lawan.
I IMPORTANSIANA
Nu ammum tu mapia nu sinni ka, itaddaggammu i kuru-kurugammu imbes tu mappakontrol ka ta kakavulu mu.
“Aru nga totolay i gittana mannequin nga naka-displey ta paggatangan tu sinnun. Ari tu ira i mappili tu sinnun nga iyusada.”—Adrian.
“Itaddaggakku lapa i ammù nga fustu maski nu mariga yatun. Kurug nga kofukku i tadday nu komportable ngà kavulu yayya megafu ta irespetona i prinsipiò.”—Courtney.
PRINSIPIO NA BIBLIA: “Arian nu nga tuttulan i annangngua na totolay. . . . Ngem ipamavulun nu tu ulian na Dios i . . . appana-panono nu.”—Roma 12:2.
I MAKUAM
Ammuan tu mapia i kata-katolem sangawe anna i ikaya mu nga pabbalinan gukaban na pangusito ta kalalakian, pakkafian, anna pangurug mu. Igafum gukaban na pattabbag ta tumunug ira nga pakkiavu.
I kalalakiakku ira: Anni ira i talentò anna abilidad ku? Anni ira i makasta nga ugalì? (Angngariganna: Kanayun ngà kari nga egga ta oras? Makontrol ku kari i baggì? Malappo ngà kari? Minangngiyawa ngà kari?) Anni ira i positibo nga kukukuakku?
SUHESTION: Marigatakka kari nga mannono tu positibo nga gannug meyannung nikaw? Iyavu ta magana onu ta mapattalakkan nga kofun i masingadda nga kalalakiammu ira anna nu ngatta.
PRINSIPIO NA BIBLIA: “Innan na kataggi-tadday i ikalangan na laggapa. Nu mapia, awayya na i magayaya ta kingngua na, anna ari ngana nga mawag tu iparig na ta kingngua na tanakuan.”—Galacia 6:4.
I pakkafiakku ira: Anni ira i aspeto na personalidad ku nga mawag ku pakastan? Kanni ngà mas mabi matenta? Anni ira nga situasion i mas kawagakku nga kontrolan i baggì?
PRINSIPIO NA BIBLIA: “Nu kagiat-tam tu awan tu katagaruliat-tam, ilogo tam i baggi tam.”—1 Juan 1:8.
I pangurug ku ira: Anni ira i estandarte nga tuttuttulakku, anna ngatta? Mangurug ngà kari ta Dios? Anni i nangumbinsi niakan nga egga Dios? Para niakan, anni ira nga annangngua i ari mepangngo, anna ngatta? Anni i pangurug ku meyannung ta mappange?
PRINSIPIO NA BIBLIA: “I abilidad nga mannono ay manangngal noka nikaw, anna i pakalippawa ay immuguran naka noka.”—Proverbio 2:11.
Baka Kaya Mu Gapa i
TABBAG TA 10 NGA PAKKIAVU NA KABATAAN IRA
Sinni Ngà?
Makoffun nu ammum i prinsipiom, kalalakiammu, limitasiommu, anna planom ira tapenu makapaddesisiokka tu masirib nu mepa-arubang ta problema.
