PARA TA MAGATAWA
1: Kinamatalo
I KEBALINANNA
Imammatan na matalo nga magatawa nga permanente i pagatawada, anna mangiyawa yatun tu seguridad ta nira. Mattalo i kada tadday nga ariadda maggungay, maski ta mariga ira nga tiempo.
Mapilitan i karuan nga magatawa nga mattadday lagapa megafu ta tanakuan nga totolay onu familiada. Ngem mas makasta nu nebase ta aya anna respeto i kinamataloda.
PRINSIPIO NA BIBLIA: “Mawag gapa tu ari nga igungay na lalaki i atawa na.”—1 Corinto 7:11.
“Nu matalo ka ta atawam, kammu insigida mallussaw. Mabi ka mamakoma anna makkiddaw tu pamakoma. Nonopan nga kapurueba i problema ira, ari tu rason tapenu makisina.”—Micah.
I IMPORTANSIANA
Nu meparubang ta problema ira, alistu kagian danuri ari nga matalo ta pagatawa i, ‘Ari kami talaga nga para ta kataggi-tadday’ anna magaleg ira tu rason nga makigungay.
“Aru i mappakasal megafu ta ammuda nga awayyada i makidiborsio. Nu mappakasal i tadday ngem agga-nonona i posibilidad nga makidiborsio, ari ngana yayya matalo ta pagatawa ta gafu paga laman.”—Jean.
I MAKUAM
USITAKKAN I BAGGIM
Nu maddama kamu . . .
-
Mabbabawi ka kari nga yayya i atawam?
-
Magilusion ka kari nga tanakuan ngana laman nakuan i atawam?
-
Kagiammu kari i “Panawattaka ngana” onu “Magaleg ngà tu tanakuan nga mangiddu niakan”?
Nu wan i tabbag mu ta tadday onu mas aru paga tatun nga pakkiavu, yaw i tiempo tapenu paladdammu i kinamatalo mu ta atawam.
IPAKIYUVOVUG TA ATAWAM
-
Nakkafi kari i kinamatalomi ta pagatawami? Nu wan, ngatta?
-
Anni ira i makuami sangawe tapenu mapaladda i kinamatalomi?
SUHESTION
-
Iddan tu love note i atawam saggi-mittan
-
Ipasingan nga matalo ka gukaban na pangi-displey tu letratu na atawam ta lamesam ta pattrabahuammu
-
Tawagan onu i-text i atawam kadaggaw nu egga ka ta trabahu onu nu makka-arayyu kamu
PRINSIPIO NA BIBLIA: “Arian na gafu nga awayya tu paggungayan na tolay i pinattadday na Dios.”—Mateo 19:6.
