PARA TA MAGANA
5: Komunikasion
I KEBALINANNA
Egga makasta nga komunikasion nu makkinnakagi kamu na ánanu tu ideya anna panagenonu ira.
I IMPORTANSIANA
Posible nga mariga i pakikomunika lalu ngana ta tinedyer ira. Ta kabbidda, kagiadda nikamu i ngamin. Ngem ta paddakalda, ariadda ngana kuruga makkagi nikamu, yatun tu ariannu ammu i nononopan anna mataga-tagenoda. Ngem maski nu gittana manakida i makibbida, yaw i tiempo nga mas kawagadda i pakikomunika!
I MAKUAM
Magginna ta ana mu maski anni nga oras. Kuan yatun maski nu gaba-gabi ngana.
“Awayyana nga kayà mu kagian i ‘Ngatta sangawe laman? Ganuri ittam paga makkavulu!’ Ngem ngatta marreklamo ittam nu egga kayà kagian na ána tam? Ari kari tu yatun i ikayà na kada magana?”—Lisa.
“Kayà ku nakuan nga mabi makkatrug, ngem makasta i paggiristoriami na tinedyer ku ira maski pasadu alas-dose ngana na gabi.”—Herbert.
PRINSIPIO NA BIBLIA: “Ari tu i pammakapian na baggi nu laman i nonopan nu, nu ari i pammakapian na ikattolay nu.”—1 Corinto 10:24.
Maffokus. Inamin na tadday nga yama: “Nu karuan, egga tanakuan nga nononopakku nu egga kakkagian na ána ku. Ammuda nga kakku maggigginna!”
Nu kunnatukkamu gapa, addappannu i TV anna iyemmannu i pangusa ta gadget ira. Maffokus ta kakkagian na abbing, anna ipasingan nga nabalor nikamu i kakkagianna, maski nu gittana ari kuruga importante yatun.
“Ipasiguradu tam nakuan ta ána tam nga importante nittam i panagenoda. Nu ariadda matageno yatun, kadda makkagi nittam onu kagiadda ngana laman ta tanakuan.”—Maranda.
“Kannu mapporay, maski nu ari tu fustu i pagimamma na ananu.”—Anthony.
PRINSIPIO NA BIBLIA: “Magimmugug kamu gafu ta pagginna nu.”—Lucas 8:18.
Samantalan i gagangay ira nga situasion. Nu karuan, mas makkagi i ána nu ariadda ka-arubang i maganada.
“Samantalammi nu egga kami ta takay. Mas makasta i paggiristoria nu mabbiko kami anne nu makka-arubang kami.”—Nicole.
Makasta gapa nga oportunidad nga maggiristoria nu tiempo na pakkakan.
“Nu kumakkami ta gabi, istoriammi i marake anna i makasta nga nesimmu ta interu aggaw. Namaddukko yaw nikami anna ammumi nga egga manguffun nikami ta problemami.”—Robin.
PRINSIPIO NA BIBLIA: “Mawag tu sigga-parak-kamu nga magginna [anna] memmugug ta paguvovug.”—Santiago 1:19.
Baka Kaya Mu Gapa i
TUTTUDDU NA BIBLIA
Uffun Para ta Tinedyer anna Kabataan
Ammuan nu kunnasi makoffun i Biblia ta situasion anna problema ira na tinedyer anna kabataan ira.
