PARA TA KABATAAN
11: Malappo
I KEBALINANNA
Ari nga lillitan na malappo ira i trabahu. Kakayàda lallagu i mattrabahu tu mapia tapenu masustentuadda i pakawagadda anna moffunadda i tanakuan—maski nu alinno laman i trabahuda.
I IMPORTANSIANA
Maski nu manaki tam, napannu tu responsibilidad i pattolay. Aru i mammanaki ta pattrabahu tu mapia, ngem bentaham nu malappo ka.—Eclesiastes 3:13.
“Nammuakku nga nu malappo ka, mabbalikka tu proud ta baggim anna magayayya ka. Yatun nga pagayayya i rason nu ngatta ikaya ku i mattrabahu. Nu dedikadu ka ta trabahum, makasta i reputasiommu.”—Reyon.
PRINSIPIO NA BIBLIA: “Egga i bentaha ta kada klase na malappo nga pattrabahu.”—Proverbio 14:23.
I MAKUAM
Mapeggan tu positibo nga pagimamma ta trabahu gukaban na panuttul taw ira.
Pakastan i trabahum. Ta pattrabahum ta balay, pagangngua tu asayment ta eskuela, onu ta sekular nga trabahum, kuammu yatun tu mapia. Nu malalaki ka ngana tatun, palistuan onu pakastammu paga. Nu mas eksperto ka ngana, mas magustuammu i trabahum.
PRINSIPIO NA BIBLIA: “Nakasingakka kari ngana tu tolay nga malalaki ta trabahuna? Manaddag yayya ta arubang na patul ira; ari yayya nga manaddag ta arubang na gagangay nga totolay.”—Proverbio 22:29.
Innan i pammakapianan na tanakuan. Maruddu nga mabenefisiowan i tanakuan nu kuammu tu mapia i trabahum. Angngariganna, nu malappo ka ta balay, mallappaw i trabahu na kafamiliam.
PRINSIPIO NA BIBLIA: “Mas dakal i pagayaya ta pangiyawa anne ta pangalawa.”—Kingngua 20:35.
Kuan i mas paga ta kawagan. Imbes nga kuan nu anni laman i mekiddaw, kuan i mas paga tatun. Nu kunnaw, sikaw i mangontrol ta pattolem—mas malallappo ka megafu ta ikaya mu, ari tu megafu ta naobliga ka.—Mateo 5:41.
PRINSIPIO NA BIBLIA: “Maggafu laggapa ta nono mu i panguffum-mu niakan. Yatun tu ariak-ku nga kuan i anni laman nu ari ka nga umanugu.”—Filemon 14.
Mabbalin tu balanse. Ari tu talakag i malappo nga totolay anna ari gapa tu trabahu ngana laman i kukukuadda. Balanse ira—magayayya ira ta pattrabahu tu mapia anna ta pagibannag.
PRINSIPIO NA BIBLIA: “Mas makasta i tanga-kamo nga pagibannag anne ta dua-kamo na pabbabbannag anna paddaddag ta paddag.”—Eclesiastes 4:6.
