Nu mapattalakkan i tadday, makkomfiansa nisa i magana, kokkofun, anna amona. Tuttulanna i bili-bilin, tuppalanna i promesana ira, anna kanayun nga makkagi tu kurug.

Maruddu nga i lallaguray nga meyawa nikaw ay depende ta kadakal na pattaloda nikaw.

“Tapenu mattiwala niko i magana mu, ipasingammu nga manakam anna responsable ka, ari laman nu egga ira ngem maski nu kammu ira kavulu.”​—Sarahi.

PRINSIPIO NA BIBLIA: “Usitakkan [onu, pakurugan] nu ta mapia i baggi nu.”​—2 Corinto 13:5.

Nu kayà mu nga mas mattalo ira nikaw onu metoli i pattaloda nikaw, makoffun i tumunug ira.

Makkagi tu kurug. Ari ka ngana pattalakkan na totolay nu malladda-laddug ka. Ngem nu awan tu ililimag mu anna kagiammu i kurug lalu ngana i kamalim ira, mattalo nikaw i totolay.

“Mabi i makkagi tu kurug nu makasta i situasion. Ngem nu makkagi ka tu kurug maski nu marake i efekto natun niko, mas pattalakkan naka na totolay.”—Caiman.

PRINSIPIO NA BIBLIA: “Karagatammi nga mattolay nga mapammakatalakkan ta ngamin nga ganna-gannug.”​—Hebreo 13:18, NW.

Mabbalin tu responsable. Ta tadday nga survey, 78 porsiento na employer i nakkagi nga i pabbalin tu responsable i “tadday ta tallu nga pinaka-importante nga ugali na apadda nga empleyadu.” Nu responsable ka sangawe, pammakapianammu yatun sonu adulto ka ngana.

“Mapansin na magana ku nu responsable ngà anna nu kuakku i trabahù ta balay maski nu kaddà doban. Nu mas mabboluntariu ngà, mas pattalakkaddà.”—Sarah.

PRINSIPIO NA BIBLIA: “Mammakatalo ngà tu makuam i kiddawak-ku, ay tu mas paga taw i makuam.”​—Filemon 21.

Mappasa-pasensia. Ari tu kagitta na pisikal nga pammanakam, nga insigida masingan, kawagan i tiempo tapenu masingan na tanakuan i emosional anna mental nga pammanakam.

“Ariammu mala i pattalo na magana mu anna na tanakuan megafu laman ta tadday nga kingnguam. Ngem mattalo ira niko nu kanayukka nga responsable.”​—Brandon.

PRINSIPIO NA BIBLIA: “Mawag gafu tu . . . minappasensia kamu.”​—Colosas 3:12.