PARA TA MAGATAWA
2: Pakka-uffun
I KEBALINANNA
Nu makka-uffun i magatawa, gittada i pilot anna copilot nga makkavulu mappakagag tu eroplano. Maski nu egga ira kapurueba, agga-nono na kada tadday nira i “sikami” imbes tu “sakan.”
PRINSIPIO NA BIBLIA: “Ari ira tu dua, ngem tadday ngana laman.”—Mateo 19:6.
“Mawag nga makka-uffun i magatawa tapenu mapakastada i pagatawada.”—Christopher.
I IMPORTANSIANA
Nu egga problema, i magatawa nga ari makka-uffun ay makkapaliwa imbes tu solbadda i problema. Dumakal i baraddi ira nga problema.
“Importante i pakka-uffun ta magatawa. Nu kammi makka-uffun na atawà, gittana makkabbalay kami laman—ari nga magatawa. Problema yatun nu magangngua kami tu importante nga desision.”—Alexandra.
I MAKUAM
USITAKKAN I BAGGIM
-
Para niakan, “kukuà laman” kari i sueldù?
-
Tapenu makaparrelaks tu mapia, mawag kari nga ariakku kavulu i atawà?
-
Arayyuakku kari i parientes ira na atawà maski nu madukko yayya nira?
IPAKIYUVOVUG TA ATAWAM
-
Anni nga aspeto (ira) na pagatawami i talaga makka-uffun kami?
-
Anni nga aspeto (ira) i awayyami mapakasta?
-
Anni ira i makuami tapenu mas makka-uffun kami?
SUHESTION
-
Imbes tu nonopan nga egga kamu na atawam ta makkalaban nga team ta tennis, anni ira i praktikal nga makuam tapenu mabbalikkamu nga makka-team?
-
Imbes tu nonopan, ‘Kunnasi ngà mangaffu?’ nonopan ‘Kunnasi kami mangaffu?’
“Kammu ngana nonopan nu sinni i fustu anna sinni i mali. Mas importante nga memammo anna makkasundu i magatawa.”—Ethan.
PRINSIPIO NA BIBLIA: “Arian nu nga nonopan i pammakapian nu laggapa, nu ari i pammakapian na kataggi-tadday nikamu.”—Filipos 2:3, 4.
