PARA TA MAGATAWA
4: Pamakoma
I KEBALINANNA
Kayà kagian na pamakoma ay palampasan i kamali anna i anni laman nga taki na nono nga resultana. Ari tu mawag nga tagilappawammu yatun onu magappappe nga ari yatun nesimmu.
PRINSIPIO NA BIBLIA: “Makkapasa-pasensia anna makkapaka-pakoma kamu nu egga i taki na nono nu ta kataggi-tadday nikamu.”—Colosas 3:13.
“Nu iddukammu i tadday, ariammu maffokus ta pakkafianna. Innammu lallagu i kata-katolay nga pappursigianna nga pabbalinan.”—Aaron.
I IMPORTANSIANA
Nu mangipappan tu taki na nono, marigatakka ta pisikal anna emosional—marake gapa i efekto natun ta pagatawam.
“Mittan, nakikkoma niakan i atawà ta kuruga natakitan ngà. Narigatan ngà nga pakoman yayya. Pinakomà gabbalaman, ngem pinabbabawyakku nga kakku kingngua insigida. Ari tu makasta i efekto natun ta relasiommi.”—Julia.
I MAKUAM
USITAKKAN I BAGGIM
Sonu otru uli nga matakitakka ta kinagi onu kingngua na atawam, iyavu mu ta baggim:
-
‘Sobra kari i kasensitibò?’
-
‘Kunnari kari kagrabe i kamali nga kawagakku paga nga makikkoma yayya, onu palampasakku ngana laman?’
IPAKIYUVOVUG TA ATAWAM
-
Kunnasi kabayagmi nga mapakoma i kataggi-tadday?
-
Anni makuami tapenu alistu kami nga makkapakoma?
SUHESTION
-
Nu natakitakka, kammu nonopan nga marake i motibo na atawam.
-
Pakoman i atawam ta nakuana. Daddammammu nga “sittam ngamin ay maruddu nga makaliwa.”—Santiago 3:2.
“Alistu laman i mamakoma nu parehu kami nakaliwa, ngem mariga nu gittana tadday laman i makalliwa. Kawagan i kinapakalinno tapenu akseptattam i pakkiddaw tu dispensa anna mamakoma.”—Kimberly.
PRINSIPIO NA BIBLIA: “Maki-areglo ka insigida.”—Mateo 5:25.
Nu mangipappan tu taki na nono, marigatakka ta pisikal anna emosional—marake gapa i efekto natun ta pagatawam
