PARA TA MAGATAWA
3: Respeto
I KEBALINANNA
Nu makkinnarespeto i magatawa, iddukadda i kataggi-tadday maski nu egga ariadda pakka-anugutan. “Lillitadda i situasion ira nga manakida i makikompromiso,” kagian na libru nga Ten Lessons to Transform Your Marriage. “Ayusadda lallagu i ariadda pakka-intindian. Marespeto nga ginnadda i opinion na atawada anna ikonsiderada i parehu nga pammakapianadda.”
PRINSIPIO NA BIBLIA: “I aya ay . . . ari tu pakkaraga ta pammakapian laggapa na baggi.”—1 Corinto 13:4, 5.
“Merespetò i atawà nu tagibalorakku yayya anna kakku magangngua tu gannug nga manaral nisa onu ta pagatawami.”—Micah.
I IMPORTANSIANA
Nu awan tu respeto, awayyana nga minangngivuya, sarkastiko, anna malussaw i magatawa ta pakiyuvovugda ta kataggi-tadday. Segun ta researcher ira, danaw i seniales nga mattuppal ta diborsio.
“I panginsulto, pappaginna, onu pallafug meyannung ta atawam ay manaral ta pattalona ta baggina, ta nikaw, anna ta pagatawanu.”—Brian.
I MAKUAM
USITAKKAN I BAGGIM
Obserban i pakiyuvovug mu anna guyu-guyum ta tanga-ligguan. Kabalinna, iyavu mu ta baggim:
-
‘Kanayukku kari nga ivuya i atawà, onu kanayukku kari yayya komendan?’
-
‘Kunnasì espesipiko nga nepasingan i respeto ta atawà?’
IPAKIYUVOVUG TA ATAWAM
-
Anni ira nga annangngua anna uvovug i makoffun nikamu nga matageno i respeto?
-
Anni ira nga annangngua anna uvovug i matagenonu nga kawan na respeto?
SUHESTION
-
Itura i tallu nga gannug nga ikaya mu nga merespeto ka. Ipakuam gapa ta atawam. Ipasingannu i nituranu ta kataggi-tadday anna pappursigiannu nga ipasingan i respeto tatun ira.
-
Ilistam i kualidad ira nga magustuammu ta atawam. Kagiammu nisa nga kuruga appresiammu yatun ira nga kualidadna.
“Merespetò i atawà nu ipasingakku ta annangnguà nga tagibalorakku yayya anna ikaya ku nga masaya yayya. Ari gapa mawag tu sossobra; nu karuan, i simple ira nga gannug i makepasingan tu kurug nga respeto.”—Megan.
I kurug, mas importante nga matageno na atawam nga egga respetom nisa anne ta pakatageno mu nga egga respetom.
PRINSIPIO NA BIBLIA: “Mawag gafu tu minaggallallo, minaggiddu, minappakalinno, mappakasippo, anna minappasensia kamu.”—Colosas 3:12.
