Kawagan na abbarabbing i pangigiya anna panabarang na adulto ira. Bilang magana, sikaw i makarresponsibilidad tatun. Ngem egga gapa ira adulto nga awayyana nga pagehemplowan na ána mu.

Ta aru nga lugar, balabaddi laman i tiempo na pakilallang na abbarabbing ta adulto ira. Nonopan yaw:

• Mas aru i tiempo na abbarabbing ta eskuela anna mas aru i estudiante ira anne ta mestru anna ta tanakuan paga ira nga adulto.

• Ta pallabbe na karuan naggafu ta eskuela, awan tu kavuluda ta baleda megafu ta mattrabahu i maganada.

• Segun ta tadday nga paggigiammu ta United States, maggi annam nga oras i mosa na abbarabbing nga magedad tu 8 adde ta 12 ta entertainment media kadaggaw. *

Kagian na libru nga Hold On to Your Kids: “Mappatuddu, mappamolde, anna mappagiya i kabataan ira ari tu ta yena, yama, mestru, anna ta tanakuan paga nga responsable nga adulto nu ari ta . . . kaedadda lagapa.”

Iddan tu tiempo i ána mu.

PRINSIPIO NA BIBLIA: “Sanayammu i abbing ta dalan nga mawag tu angngayanna; maski nu mallakay yayya ay arianna yatun panawan.”​—Proverbio 22:6.

Gagangay nga ikaya na ána nga mappagiya ta maganada. Kakuruganna, kagian na eksperto ira nga maski mattinedyer ngana i ána, mas tagibaloradda i tabarang na maganada anne ta kaedadda ira. “I magana lagapa i primeru nga maka-influwensia ta personalidad anna ugali na anada durante ta pagadultoda,” nitura ni Dr. Laurence Steinberg ta libru nga You and Your Adolescent. Kunna paga: “Ikaya na tinedyer ira nga mammuan i nononopammu anna tuppalan i kakkagiammu, maski nu ariadda aminan yatun onu ariadda umanugu ta ngamin nga ikagim.”

Kuammu gafu i ngamin tapenu igiya i ána mu ta ikayada mabba i mappagiya. Iddammu ira tu tiempo anna kagiammu nira i nononopammu, i importante nikaw, anna i ekspiriensam ira.

 Iyalegan ira tu pagehemplowadda.

PRINSIPIO NA BIBLIA: “I makikakkavulu ta masirib ay mabbalin tu masirib.”​—Proverbio 13:20.

Egga kari manono mu nga adulto nga posible nga makasta nga ehemplo para ta ana mu? Ngatta ariammu iyunnug nga makikavulu yayya ta ana mu? Siempre, arianna kayà kagian nga ipasam ta tanakuan i responsibilidad mu. Fuera paga ta passanay mu ta ana mu, makoffun gapa i adulto nga pattattalakkammu nga ari tu marake i influwensiana. Mabibbig ta Biblia nga maski nu adulto ngana si Timoteo, makakkasta i efekto nisa na pakikavuluna kani apostol Pablo. Kunnatun gapa i efektona kani Pablo.​—Filipos 2:20, 22.

Ta nappasa nga siglo, aru nga familia i massirina ngana tu paddianan. Awayyana nga egga paga lagu ta tanakuan nga nasion i kakay, kako, angkal, anty, anna i karuan paga nga parientesda. Nu kunnatun i situasiommu, iyalegammu i ána mu tu adulto ira nga ikaya mu nga pagehemplowadda.