Egga pangifugag mu ta baggim nu

• makennag ka

• makontrol mu i pakkaraga mu

• mabalimmu i manaki mu nga trabahu

• pagolluammu i tanakuan

Nu egga pangifugag ta baggi na abbing ira, malabanadda i tentasion maski nu gittana mamagayayya yatun nira. Ngem nu awan, posible nga

• mabbalin ira tu agresibo

• madepres ira

• massigariliu, mabbalin tu minaggillellaw onu maddroga ira

• ari tu masustansia i kanadda

Nadiskubre na tadday nga paggigiammu nga ta paddakal na abbarabbing nga egga pangifugagda ta baggida, awan kuruga tu problemada ta gawa-gawayyan, ta finansial, anna mas minammarulo ira ta dob na gobiernu. Megafu tatun nga paggigiammu, nakagi ni Profesor Angela Duckworth na University of Pennsylvania: “Awan tu marake ta pangifugag ta baggi.”

Nu kinagim ngana tu ari, tuppalammu yatun.

PRINSIPIO NA BIBLIA: “‘Wan’ kun-nu nu wan; ‘Ari’ nu ari.”​—Mateo 5:37.

Magaburidu i abbarabbing tapenu pagustuan ira na maganada—maski paga aru i totolay. Nu pagustuan ira na maganada, pakakuadda ngana yatun kada egga i kayàda.

Ngem nu ari nga pagustuan na magana i anana, magigiammuna i nabalor nga leksion ta pattolay​—ariattam mala i ngamin nga kayà tam. “I kurug, mas magayayya i totolay nga egga pangifugagda ta baggida,” nitura ni Dr. David Walsh. “Ariattam moffunan i ána tam nu kanayuttam iyawa i ikayada.” *

Nu ariammu basta iyawa i ngamin nga ikaya na ana mu, mas mabi saw nisa nga mafugaddan i baggina​—gittana nu matenta yayya nga maddroga, maki-sex nige mekasal, onu magangngua tu gannug nga mamappeligro nisa onu ta tanakuan.

 Ipalippawa ta ána mu i resulta na mapia onu marake nga kuadda.

PRINSIPIO NA BIBLIA: “Nu anni laman i nimula na tolay, yatun gabbalaman i gataban na.”​—Galacia 6:7.

Mawag nga malippawa na ana mu nga egga efekto na kukukuanna. Nu awan gafu tu pangifugagna ta baggina, marake i parresultanna. Angngariganna, nu mabi mapporay i ana mu, posible nga lillitan yayya na totolay. Ngem nu makontrolna i baggina​—onu makennag yayya—​magustuadda yayya. Ipalippawa mu ta ana mu nga mas makasta i pattolena nu magaggaddanna i baggina.

Tudduan i ana mu nu anni i mas importante.

PRINSIPIO NA BIBLIA: “Pilian i kapianan [“mas importante,” NW ] ta ngamin.”​—Filipos 1:10.

Nu egga pangifugag ta baggi na tadday nga tolay, ari laman nga basta arianna magangngua tu marake; kuanna gapa i kawagan maski nu manakina nakuan nga kuan yatun. Mawag nga magigiammu na ana mu nga pilian i mas importante ira anna danatun i pagolluanna. Angngariganna, mawag tu kuanna labbi i asaymentna nigena maggayang.

Mabbalikka tu ehemplo.

PRINSIPIO NA BIBLIA: “Niddat-takamu tu apparigan tapenu kuan nu gapa i kunne ta kingnguà nikamu.”​—Juan 13:15.

Maobserba na ana mu i reaksiommu ta makaporay ira nga situasion. Ipasingammu sa nga makasta i resulta na pangifugag ta baggi. Angngariganna, nu egga marake nga kingnguana, mapporay ka kari onu kalmadu ka laman?