Nu matuyag i tadday, tumaddag lagapa yayya nu matomba megafu ta problema ira. Mabbalittam tu matuyag gukaban na ekspiriensa. Ari nga magigiammu na abbing i lumakag nu ari nga matomba saggi-mittan, kunnari gapa nga ari yayya mavviktoria nu arianna makkaproblema saggi-mittan.

Makkafi i nono na karuan nga abbing nu egga ariadda netuppal, egga marake nga nesimmu, onu natabarangngan ira. Molang ngana gapa i karuan. Ngem mawag nga magigiammuda danaw nga kinakurug:

• Ari tu kanayun nga makasta i pattuppalan na ngamin nga kuattam.​—Santiago 3:2.

• Makaekspiriensa i ngamin tu mariga nga situasion.​—Eclesiastes 9:11.

• Nabalor i pangitunung tapenu makagigiammu.​—Proverbio 9:9.

I kinatuyag i manguffun ta ana mu nga sigga-komfiansa nga arubangan i mariga ira nga situasion.

Nu ari tu makasta i nattuppalan na kingngua na ana mu.

PRINSIPIO NA BIBLIA: “Maski matomba tu mamippitu i matunung, tumaddag lagapa yayya.”​—Proverbio 24:16.

Uffunan i ana mu nga mabalanse i madammo onu simple nga problema. Angngariganna, anni i kuanna nu arianna nepasa i test da ta eskuela? Baka mekagina, “Awan ngana laman tu fustu nga makuà!”

Tapenu metuddum i kinatuyag, uffunan i ana mu nu kunnasina nga pakastan sonu uli. Ta kunnaw, solbanna lagapa i problemana anna ari ngana yayya matakitan tatun.

Lillitammu gapa nga sikaw i manolba ta problemana. Uffunammu lallagu yayya nga solusionan yatun. Awayyam iyavu nisa, “Anni i kuammu tapenu mas matindiammu i metuttuddu ta eskuela?”

Nu egga marake nga nesimmu.

PRINSIPIO NA BIBLIA: “Ni mabba ammu nu nu anni i mesimmu nikamu nonumma!”​—Santiago 4:14.

Mangulu-uli i pattolay. Mariku ka sangawe ngem posible nga mazziga ka sonu umma; magawa-gawayyakka sangawe ngem posible nga mattaki  ka sonu umma. “Ari tu i alistu i kanayun nga mangaffu ta karera, ari tu i masikan i mangaffu ta gerra,” kagian na Biblia, “megafu ta i tiempo anna ari ekspektan nga mesimmu ay duttal nira ngamin.”​—Eclesiastes 9:11.

Bilang magana, kukukuammu i ngamin tapenu protektan i ana mu ta peligro. Ngem i kurug, ariammu nga maprotektan i ana mu ta ngamin nga marake nga mesimmu.

Siempre, ari paga maekspiriensa na abbimmu i mawanan tu trabahu onu makkaproblema ta finansial. Ngem moffunammu lagapa yayya nga marubang i tanakuan ira nga problema kagitta na nu naddama ira na kofunna onu nu natayakkamu tu kafamilia. *

Nu natabarangngan i ana mu.

PRINSIPIO NA BIBLIA: “Magginna ka ta tabarang . . . tapenu mabbalikka noka tu masirib.”​—Proverbio 19:20.

Nu natabarangngan i ana mu, ari yatun pangananassing nisa; pangitunung yatun ta gannug nga mawag tu ulianna.

Nu tudduammu i ana mu nga alawatan i pangitunung, pammakapianannu yatun. “Nu kukkunsintiammu i ána mu ta ugal nga kukukuadda, kadda makagigiammu,” kagian na yama nga si John. “Umaru laman i problemada anna siko nga magana i kanayun nga manolba tatun. Mamazziga yatun ta magana anna ta ana.”

Kunnasim moffunan i ana mu nga mammakapia ta tabarang? Nu natabarangngan yayya—ta eskuela onu maski sitaw​—lillitammu i pakkagi nga ari nakuan yayya napakkagianan. Iyavu mu lallagu:

• “Ngatta tamma natabarangngakka?”

• “Anni i mas makasta nga kuammu?”

• “Anni ngana sangaw i kuammu nu mesimmu uli yaw?”

Daddammammu nga makoffun ta ana mu i tabarang ira, ari laman tu sangawe ngem maski ta paddakalna.