Marespeto i tolay nga minappakalinno. Ari yayya arogante, ni tu ekspektanna nga matratu yayya tu espesial. Ikavurunganna lallagu i tanakuan anna ikayana nga makagigiammu nira.

Abbo na karuan nga tolay nga makafi i tadday nga minappakalinno. I kurug, masikan yayya anna yaw i makoffun sa nga masingan i kamali anna limitasionna ira.

• Mamakkasta yaw ta relasion ta tanakuan. Kagian na libru nga The Narcissism Epidemic: “Mas alistu makikkofun i minappakalinno ira” anna “mas mabi nga makibagay ta totolay.”

• Pammakapianan yaw na ana mu. Nu mapakalinno i ana mu, mas mabi noka yayya nga makaleg tu trabahu. “Ari tu makasta i resulta na pagaleg tu trabahu na tadday nga sossobra i komfiansana ta baggina anna arianna manono i pakkafianna ira,” nitura ni Dr. Leonard Sax. “Ngem i kabataan nga talaga interesadu ta kakkagian na employer i posible nga makatallung ta trabahu.” *

Ituddu ta ana mu i balanse nga pagimamma ta baggina.

PRINSIPIO NA BIBLIA: “Nu egga i magabbo tu atannang i kekwentan na maski nu ari, illokowan na laggapa i baggi na.”​—Galacia 6:3.

• Mabbalin tu realistiko. Gittana makapasikan tu nono i pakkagi tu “Matuppal i ngamin nga ambisiommu” anna “Kayang-kayam nga mabbalin ta ikaya mu,” ngem ari tu kanayun nga realistiko yatun. Mas makkasta i pattuppalan na ána mu nu egga rasonable nga addetadda anna mappursigi ira nga madde yatun.

• Komendan i espesipiko nga nakua na ana mu. Ariammu metuddu i kinapakalinno ta ana mu nu basta ikagim nga “malalaki” yayya. Kuammu tu espesipiko.

• Limitan i pangusana tu social media. Maruddu nga mangiyatannang ta baggi i social media nga ipara-parayag na tadday i talento anna nagafuananna ira. Yatun i katulia na kinapakalinno.

• Pagaramman i ana mu nga makippakoma insigida. Ipalippawa mu ta ana mu i kamalina tapenu aminanna yatun.

 Tudduan ira nga mappabalo.

PRINSIPIO NA BIBLIA: “Mabbala-balo kamu gapa nga kanayun.”​—Colosas 3:15.

• Mappabalo para ta pinaratu ira. Mawag nga ipappabalo na abbarabbing i ngamin nga pinaratu anna malippawada nakuan nga kawagattam danatun tapenu mattolay. Kawagattam i paddag, danum, anna makan. Usan danaw ira nga angngarigan tapenu maappresiada anna mappabbaw ira ta ngamin nga makasta nga naparatu.

• Pappabalo ta totolay. Ipanono ta ana mu nga mas malalaki i karuan anne nisa. Imbes tu passilanna i talento anna abilidadda, makagigiammu lallagu yayya nira.

• Pangikagi tu pappabalo. Tudduan i ana mu nga napafutuan nga mappabalo. Nu minappabalo ittam, mapattalupaddiattam i kinapakalinno.

Ituddu ta ána mu nga makasta i manguffun ta tanakuan.

PRINSIPIO NA BIBLIA: “Mappakalinno kamu lallagu, anna ipay nu nga kanayun ta nono nu tu mas mapia i karuan ira nga totolay anne nikamu. Arian nu nga nonopan i pammakapian nu laggapa, nu ari i pammakapian na kataggi-tadday nikamu.”​—Filipos 2:3, 4.

• Sanayan i ana mu nga manguffun ta trabahu ta balay. Nu ariammu pattrabahuan ta balay i ana mu, baka nonopanna nga mas nabalor i gannug ira nga ikayana nga kuan. Mas importante i responsibilidad ta balay anne ta paggayang. Ipasingan nu ngatta pammakapian na totolay i pattrabahuna anna kagian nga maappresia anna merespeto yayya megafu taw.

• Ipasigo nga pribilehio i panguffun ta tanakuan. Yaw i primeru nga dakkua tapenu mammanakam i ana mu. Pagarammammu gafu i ana mu nga ammuan danuri i makawag. Paguvovugannu i meyuffunna. Komendan anna suportan yayya ta panguffunna ta totolay.