Aru nga totolay i ari nga maddayaw ta Dios gafu ta abboda nga yayya i makalliwa ta pazziga-riga.

Direkta onu ari, aru nga lider na relihion i mangituddu nga Dios i makagafu ta pazziga-riga tam. Angngariganna, kakkagiadda:

• Panentensia onu parusa na Dios i kalamidad ira.

• Matay i abbarabbing gafu ta mawag paga na Dios i anghel ira ta langi.

• Egga i panigan na Dios ta gerra—i kegafuan na grabe nga pazziga-riga.

Ngem posible kari nga ugal i ituttuddu na lider ira na relihion meyannung ta Dios? Kunnasi nu ira balo i ari nga akseptan na Dios?

Ari tu Dios i makagafu ta pazziga-riga tam.

Nu yayya i makagafu, mekontra yatun ta kualidadna ira nga mabibbig ta Biblia. Angngariganna:

“Matunung i ngamin nga kukukuanna [na Dios]. . . . Matunung anna mapammakatalakkan yayya.”​—DEUTERONOMIO 32:4.

“Imposible nga mangngua tu marake i kurug nga Dios, onu mangngua tu ari fustu i Makapangngua-sa-ngamin!”​—JOB 34:10.

“Ari nga killuan na Makapangngua-sa-ngamin i hustisia.”​—JOB 34:12.

Ari nga akseptan na Dios i relihion nga ugal i ituttudduna meyannung nisa.

Nelagum taw i relihion ira nga mangituddu nga Dios i makagafu ta pazziga-riga tam anna i relihion ira nga makikkisali ta gerra anna kinavayolente.

“Mapprofesiya i profeta ira tu kinaladdug ta ngagakku [na Dios]. Ariakku ira nga zinog onu minanduan onu kiniyuvovug. Laddug nga sirmata . . . anna pangilogo na giffutuadda i kakkagiadda nikamu.”​—JEREMIAS 14:14.

Kalussaw ni Jesus i pagappappe na relihion.

“Ari tu ngamin i makkagi niakan, ‘Afu, Afu,’ ay makatallung [ta] Pappatulan ta langi, nu ari danuri laman i mangngua ta uray na Yamà ta langi. Noka ta Aggaw na Pamanunnu, aru noka i makkagi niakan, ‘Afu, Afu! ari kari nituddu mi ta totolay i bili-bilin na Dios? Anna gafu ta ngagam-mu ay pinalawam-mi i demonio ira? Anna aru paga nga ganna-gannug nga makapabbaw i kingngua mi?’ Ngem kagiak-ku noka nira, ‘Ariat-takamu nga amma-ammu. Umarayyu kamu niakan, sikamu nga minattagaruli.’”​—MATEO 7:21-23.