Egga efektona ta pagimamma tam ta pattolay i tabbag taw nga pakkiavu.

Ngatta paga laman namaratu i Dios tu makakkasta ira nga gannug nu parigatanna mabba ittam?

Gafu ta pazziga-riga, kuestionan na ari ira nga relihioso nga totolay i motibo na Dios onu maski paga lagu i keggana. Ipasingan kanu na pazziga-riga nga (1) awan tu pakawayya na Dios nga pagimmangan yaw, (2) awan tu paki-alam na Dios, onu (3) awan tu Dios.

Kurug kari danatun?

Ari ittam nga pinaratu na Dios tapenu mazziga-riga.

Ikayana nga magayayya ittam ta pattolay tam.

“Awan ngana tu mas mapia para [ta totolay] nu ari i magayayya anna magangngua tu mapia ta pattoleda, anna kuman, minum, anna magayayya nakuan i ngamin ta vunga na nabbabbannagadda. Regalu yatun na Dios.”​—ECLESIASTES 3:12, 13.

Niyawa na Dios i ngamin nga pakawagan na ollu nga dua nga tolay.

Arianna ira nga pinaratu tapenu mazziga-riga maski paga i gaka-gakada.

“Kinagina [na Dios] nira: ‘Maggaka kamu anna umaru kamu, pannuannu i davvun anna immagurayannu.’”​—GENESIS 1:28.

Pinili na ollu nga dua nga tolay nga ari mattuppal ta Dios.

Megafu tatun, nazziga-riga ira anna i gaka-gakada.

“Megafu ta tadday nga tolay, egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay megafu ta nattagaruli ngamin i totolay.”​—ROMA 5:12. *

Ari nga niyawa na Dios ta totolay i pakawayya nga igiya lagapa i baggida.

Nu kunnasi nga imposible ta tolay nga maddian ta unag na danum, imposible gapa ta tolay nga immagurayan i baggina onu i kasittolena.

“Ari nga neddan i tolay tu autoridad nga itunung maski i dakkuana.”​—JEREMIAS 10:23.

Manaki na Dios nga mazziga-riga ittam.

Ikayana nga awan tu problemattam adde ta posible.

“Nu magginna ka laman nakuan ta bili-bilikku! Mabbalin i imammo mu tu kagitta na bannag.”​—ISAIAS 48:18.