3 Ngatta Mazziga-riga i Masippo nga Totolay?
Nu Ngatta Importante nga Matabbag Yaw
Mattaki i nono tam nu masingattam nga mazziga-riga i masippo nga totolay. Ngatta paga laman massissippo ka nu mazziga-riga ka mabba?
Nonoppammu
Mangurug i karuan nga nu matay i tolay, meyana uli yayya anna tulu-tuloy yaw nga proseso. Nu makasta kanu i kinikkingnguam, meyana ka uli anna mas makasta i pattolem. Ngem nu marake gapa i kinikkingnguam, meyana ka uli ngem mazziga-riga ka. Mangurug ira nga maski paga masippo ka, mazziga-riga ka lagapa nu nagangngua ka tu marake ta “nappasa nga pattolem.” Ngem . . .
-
Anni paga laman i serbi na pazziga-riga nu ari mabba meraddamman na tadday nga neyana uli i nappasa nga pattolena?
-
Ngatta paga laman kuattam i adde na mawayya tam nga mabbalin tu magawa-gawayyan anna lillitan i aksidente nu mattaki onu maaksidente ittam mabba gafu ta kiningngua tam ta nappasa?
AMMUAN PAGA
Girawan i video nga Ngatta Ipamavulun na Dios i Pazziga-riga? ta jw.org/ibg.
I Kagian na Biblia
Ari tu panentensia onu parusa na Dios i pazziga-riga.
I kurug, posible nga nekanna laman nga i tolay ay egga ta nikesimmuan na trahedia.
“Ari tu i alistu i kanayun nga mangaffu ta karera, ari tu i masikan i kanayun nga mangaffu ta gerra, ari tu i ma-uto i kanayun nga egga kananna, ari tu i intelihente i kanayun nga marriku, ari tu danuri egga pakalippawada i kanayun nga mavviktoria, megafu ta i tiempo anna ari ekspektan nga mesimmu ay duttal nira ngamin.”—ECLESIASTES 9:11.
Mazziga-riga ittam gafu ta minakkaliwa ittam.
Maruddu nga tukuyan na totolay nga “liwa” onu “tagaruli” i marake nga kiningngua na tadday. Ngem ta Biblia, deskribanna gapa i “liwa” nga i kondision nga narensia na ngamin nga totolay—masippo onu marake.
“Dana marakay ngà ngana gari ta nikeyana ku, minattagaruli ngà ngana ta nike-agug ku.”—SALMO 51:5.
Marake i efekto na liwa ta totolay.
Nadaral naw i relasiottam ta Namaratu nittam anna i relasiottam ta karuan paga nga pinaratu na Dios. Narresulta yaw ta grabe nga ziga ta ngamin nga totolay.
“Nu i mapia i ikaya ku nga kuan, i marakay lallagu i awayyà laman nga kuan.”—ROMA 7:21.
“Adde sangoye ta maddaggun nga tiempo ay maddaging ta ziga-riga ngamin i pinaratu.”—ROMA 8:22.
