Kurugadda nga i pazziga-riga na tadday nga tolay ay resulta na kinikkingnguana ta maddaggun nga pattolena onu ta nappasa nga pattolena. Madde na tolay i moksha​—i kapalubbang ta siklo na keyana uli—​nu arianna ngana pagimportan i ganna-gannug taw ta mundo.

Kurugadda nga i pazziga-riga ay panentensia gafu ta liwa anna kapurueba ta pangurug. Kagian ni Dr. Sayyid Syeed, presidente na Islamic Society of North America nga gafu ta trahedia ira, mepanono ta nittam nga “mabbalin ittam tu minappabalo ta ngamin ira nga bendision na Dios anna mawag tu duffunattam i makawag ira.”

Kurugadda nga i pazziga-riga ay resulta lagapa na kukukuan na tadday nga tolay. Kurugan na karuan nga Judio nga mapaginnolay i nazziga-riga nga inosente tapenu meyawa nisa i hustisia. Ituddu na Kabbalistic (mystical) Judaism i reinkarnasion nga mangiyawa ta tadday nga tolay tu oportunidad nga metunung i liwana ira.

Kurugadda nga mamikkaru nga meyana uli i tadday nga tolay anna tulu-tuloy i pazziga-rigana adde ta malsana i marake ira nga annangnguana, mataga-tagenona, anna pakkaragana. Nu mabbalin tu ma-uto, magangngua tu makasta, anna disiplinanna i nonona, madde na tolay i nirvana​—i kondision nga awan ngana i ngamin nga pazziga-riga.

Kurugadda nga i pazziga-riga ay gafu ta “pakkamalian anna liwa na tolay,” segun ta A Dictionary of Comparative Religion. Ituddu na doktrinada nga mapakarianan i pazziga-riga nu magangngua ka tu mapia. Ngem maruddu nga megafu yatun ta “espiritu ira nga mas makapangngua anne ta totolay. Nu kunnatun, mawag nga akseptan ngana laman na tolay nu anni i nadisidi na espiritu ira.”

Kurugadda nga mazziga-riga i tadday gafu ta natamay yayya. Segun taw, i manamay ira ay mangiyawa tu suerte onu trahedia anna makontra laman i kukukuadda gukaban na nadduruma nga ritual. Nu mattaki kanu i tadday nga tolay, makontra i kiningngua na manamay ira gukaban na ritual anna uru nga naggafu ta albulariu.

Mangurug i Cristiano ira nga i pazziga-riga ay resulta na liwa na ollu nga dua nga tolay nga mabibbig ta libru na Biblia nga Genesis. Ngem aru nira i nangammung tu sarilida nga ideya tatun. Angngariganna, kagian na karuan nga Katoliko nga awayyada ‘itavvung ta Dios’ i mismu nga pazziga-rigada katali na pakkiddoda nga duffunan na Dios i simbahan onu ipaliagna i tanakuan.