Anni i Efekto na Gadyet ta Pakikkofummu?
Megafu ta text, email, videoconference, anna social media, alistu laman nga makkakomunika i dua nga tolay maski paga makka-arayyu i diadda. Para nira, dakal i meduffun na gadyet da.
Ngem i karuan, ta gadyet da laman nga kikkibbidan i kokkofudda. Megafu tatun, awayya na nga . . .
-
ari da matindian i mataga-tageno na kokkofudda.
-
matageno da nga magitetadday ira anna awan tu sesserbi da.
-
mas agga-nono da i baggi da anne ta kokkofudda.
I MAWAG NGA MAMMUAMMU
PAKIPATTAGENO
Mawag tam i tiempo tapenu matindiattam i mataga-tageno na tanakuan. Ngem ari tam nga makua yatun nu nofu ngana i oras tam ta pat-text anna paningan ta social media.
Sonu kakkaru ngana i message nga malalawa mu, marigatakka ngana nga mar-reply ta message da. Ta karu na nam-message, baka ariammu mapansin nga egga i kofummu nga magawag megafu ta basta nireplayammu i ngamin.
NONOPAMMU: Nu mam-message ka ta kokkofummu, kunnasim mepasingan nga makipattageno ka ta nira?—1 PEDRO 3:8, NW.
KAWAN TU SESSERBI
Ta tadday nga research, nammuadda nga aru i madiskorsunada kabalidda nga naningan ta social media. Kagian na researcher ira nga megafu ta paningadda ta picture anna update na tanakuan, matageno da nga awan tu makasta nga netuppal da.
Fuera paga tatun, nu innan na karuan i makasta ira nga ni-post na tanakuan, matageno da nga ari tu kunnari kakasta i mesissimmu ta pattoleda. Ta social media gare, gitta na kanayun nga masaya i karuan anna siko ngana laman i ari.
NONOPAMMU: Ta pangusam tu social media, kunnasim nga malillitan nga ikumparam i baggim ta tanakuan?—GALACIA 6:4.
PAFFOKUS TA BAGGI
Kagian na tadday nga mestra nga makasarili i karuan nga estudiante na anna kayà da laman i kokkofun nga egga i meduffun na ta nira. * Ta kunnatun nga relasion, agga-nono laman na tadday i mala na ta tanakuan. Para nisa, gitta na cellphone i kokkofun na—usan na laman nu kanni na nga ikaya usan.
NONOPAMMU: Masingan kari ta post mu ira ta online nga minakkikompitensia ka onu agga-nono mu laman i baggim?—GALACIA 5:26.
I MAKUAM
OBSERBAMMU I PANGUSAM TU GADYET
Nu kontroladum i gadyet mu imbes tu kontroladu naka, makaduffun yatun ta pakibbidam ta kokkofummu tapenu maddukko kamu.
PRINSIPIO NA BIBLIA: “I aya ay . . . ari tu pakkaraga ta pammakapian laggapa na baggi.”—1 CORINTO 13:4, 5.
Piliammu i suhestion ira nga kayà mu purueban, onu itura mu i kayà mu nga kuan.
-
Makibbida ta personal, ari tu ta text onu email laman
-
Ari ka mas-cellphone (onu i-silent mu) nu makistoria ka ta tanakuan
-
Pakarianammu i oras nga usu-usammu ta social media
-
Mabbalin tu mas minagginna
-
Kumustammu i kofummu nga egga i problema na
^ par. 17 Mabibbig ta libru nga Reclaiming Conversation.
