I TAKI NA MATAYAN TU IDDEDDUKAN I TOPIKO NA ARU NGA RESEARCH TA NAPPASA IRA NGA DAGUN. Ngem kagitta na nepasingan ngana, maruddu nga mekunnay ta sirib nga egga ta Biblia i kapianan nga tabarang na eksperto ira. Makasta nga pamakurug yaw nga ari maddana i sirib na Biblia. Ngem ari laman nga basta mapammakatalakkan nga tabarang i egga ta Biblia. Mangiyawa yaw tu informasion nga ari malegan ta maski anni, nga makeyawa tu mannanayun nga banna-bannay ta natayan ira.

• Pamasiguradu nga ari mazziga-riga i minatay tam ira

  Kagian na Biblia ta Eclesiastes 9:5 nga “i natay ira awan ngana vuluvuga tu ammuda.” “Manuppal ngamin i talakkurug da.” (Salmo 146:4) Mekunnay taw, nigitta na Biblia i patay ta masingngo nga pakkatrug.​—Juan 11:11.

• Makapabannay i masikan nga pangurug ta minaggiddu nga Dios

  Kagian na Biblia ta Salmo 34:15: “Tangngallan na YAFU i matunung ira, anna tangngagan na i dagi-raging da.” Mas makasta paga anne ta therapy onu ta pakistoria ta tanakuan i pangidaging kani Jehova * ta mataga-tageno tam. Makoffun paga lagu yatun tapenu mapeggattam tu personal nga relasion ta Namaratu, nga mangusa ta pakapangnguana tapenu banna-bannayan ittam.

• Mas makasta nga mappange nga iddanamattam

  Nonopan i tiempo ta mappange sonu mapaginnolay ta davvun i natay ira! Mamippiga nga kinagi na Biblia yatun nga tiempo. Kagian na Biblia meyannung ta paddia-paddian noka ta davvun nga “funatan [na Dios] ngamin i lulua [tam] nga manuru, anna awan ngana noka tu matay, onu maraddam, onu tumangi-tangi, onu magattam ta taki.”​—Nepakannammu 21:3, 4.

Napasikan i aru nga mangurug kani Jehova, i Dios ta Biblia, nga marubang i daddam gukaban na pattalo ta iddanama nga masingadda uli i minatayda. Angngariganna, kinagi ni Ann nga natayan tu atawa kabalin na 65 dagun: “Nipasiguradu niakan na Biblia nga ari mazziga-riga i minatay tam ira anna paginnolayan na Dios i ngamin nga egga ta memoriana. Yaw ira i daddammakku kada manono ku i minatay ku, anna megafu taw, narubakku i pinakamariga nga nesimmu niakan!”

Kunni Tiina nga nakagi ta nappollu nga artikulo: “Namegafu ta patay ni Timo, natageno ku i suporta na Dios. Talaga inuffunannà ni Jehova ta tiempo na ziga-riga ku. Kuru-kurug niakan i paginnolay nga promesa na Biblia. Napatuyag ngà nga ari sumuku adde ta aggaw nga masingakku uli si Timo.”

Kunnaw gapa i kagian na minillion nga totolay nga kumbinsidu nga mapammakatalakkan i Biblia. Maski nu matageno mu nga ari tu kurug onu tatageno laman i kagian na Biblia, responsibilidad mu nga gigiammuan i ebidensia ira nga kurug i tabarang anna promesana ira. Baka mapakurug mu gabbalaman nga i Biblia i kapianan nga uffun para ta natayan ira.

Girawan i video ira ta website mi nga jw.org/ibg

 ANNI I SITUASION NA NATAY?

IKAYA MU KARI I MAKASTA NGA BALITA?