“Maturu tu 39 dagun kami ngana nga magatawa ni Sophia * turi ta natay yayya megafu ta nabayag nga takina. Aru nga kokkofun i nanguffun niakan, anna nabbalin ngà tu okupadu. Ngem ta unag na tanga-ragun, nepallo i daddam ku. Ariakku makontrol i emosiokku. Maski sangawe nga maggi tallu ragun ngana i nappasa, marraddam ngà lagapa nu karuan, anna maruddu nga gavva-gavva yatun.”​—Kostas.

Natayakka kari ngana tu iddeddukan? Nu wan, mantindiammu i panageno ni Kostas. Awan ngana tu mas mataki paga ta matayan tu atawa, kafamilia, onu madukko nga kofun. Umanugu tatun i eksperto ira nga naggigiammu meyannung ta daddam megafu ta patay. Kagian na tadday nga artikulo nga nepublisa ta The American Journal of Psychiatry nga “permanente nga mawawanakka megafu ta patay anna yatun ngana i pinakamataki.” Megafu ta ari maattamman nga taki nga resulta na patay, awayya nga nonopan na tadday nga maddaddam: ‘Adde sonu anni nga matageno ku yaw? Magayayya ngà kari paga? Pakalegakku tu banna-bannay?’

Matabbag danatun nga pakkiavu taw nga isyu na Malukag! Mabibbig ta tumunug nga artikulo i maekspektam nu bagu ka laman nga natayan. Mabibbig gapa ta tumunug ira nga artikulo i makoffun ira nikaw tapenu mapakarianan i ziga na parraddammu.

Iddanamammi nga makeyawa yaw nga magazina tu banna-bannay anna praktikal nga uffun ta sinni laman nga maddaddam megafu ta patay.