PRINSIPIO NA BIBLIA: “Mas mapia i tolay nga ari tu mabi mapporay anne ta masikan nga lalaki.”​—Proverbio 16:32.

I KEBALINANNA: Pammakapianattam nu ammu tam nga kontrolan i emosiottam. Maski nu mepangngo gapa i mapporay nu karuan, marake i parresultan na ari nafugaddan nga papporay. Kagian na moderno ira nga researcher nga nu mapatu i ulu na tolay, makakagi onu makakua yayya tu gannug nga pabbabawyanna gabbalaman.

I MAKUAM: Kontrolammu i porem nige naka nga kontrolan. Abbo na karuan nga masikan i tolay nga maporay, ngem i kurug, makafi yayya. Kagian na Biblia: “Kagitta na natallung nga siudad nga awan tu paderna i tolay nga arianna makontrol i patu na uluna.” (Proverbio 25:28) Tapenu makontrol mu i porem, ammuan labbi i kurug nga nesimmu nige mu nga tubbag onu kuan i tadday nga gannug. “I pakalippawa na tolay i mangifugag nisa nga mapporay insigida.” (Proverbio 19:11) Makasta nu ammuattam labbi i ngamin nga anggulo na nesimmu tapenu malippawa tam yatun anna makkalma i emosiottam.

PRINSIPIO NA BIBLIA: “Mabbala-balo kamu gapa nga kanayun.”​—Colosas 3:15.

I KEBALINANNA: Egga ira makkagi nga i minappabalo laman nga tolay i magayayya. Umanugu taw maski danuri natayan onu nawawanan tu gannug nga nabalor nira. Kagiadda nga naattammadda i mataga-tagenoda gukaban na pappabalo ta egga nira, imbes tu nonopadda i nawawadda.

 I MAKUAM: Kadaggaw, nonopan onu itura mu i gannug ira nga ipappabalo mu. Ari tu mawag nga darakal danaw nga gannug. Nonopan maski i simple ira nga gannug, kagitta na makasta nga pallattuag na bilag, magayayya nga pakistoria ta iddeddukammu, onu maski i inango mu taw nga aggaw. Mamagayayya nikaw danaw nga gannug nu pannonopammu anna ipappabalo mu danaw.

Makaduffun gapa nu nonopammu nu ngatta ipappabalo mu i kafamiliam anna kokkofummu. Kagiammu i ipappabalo mu nira​—ta personal onu ta tura, ta e-mail, onu ta text. Siguradu nga mamalladda yaw ta relasiommu nira anna magayayya ka megafu ta egga kiningnguam para nira.​—Kingngua 20:35.

LILLITAN I PAKIDDAMA.

“I pangigafu tu paddarama ay gittana pagibbo tu dana-danum; nige nga mamegafu i pappoporfia, manaw ka ngana.”​—PROVERBIO 17:14.

LILLITAN I ARI KAWAGAN NGA PAVVURU-VURUNG TA MAPPANGE.

“Arian nu nga kavurungan i mawag nu nonumma; ta egga laman i mekavurung ta kagaggaw. Arian nu ngana nga lannappan i problema nu tatun nga aggaw.”​—MATEO 6:34.

MANNONO LABBI TAPENU ARI KA MAFFU NA EMOSIOMMU.

“Tangngallan naka na abilidad mu nga mannono, anna immuguran naka na pakalippawa.”​—PROVERBIO 2:11.