Relasion ta Familia Anna Kokkofun
Marigatan i aru nga totolay nga mapeggan tu makasta nga relasion ta familia anna kokkofudda. Innan i karuan nga prinsipio ta Biblia nga makoffun tapenu makkasta i relasiommu ta tanakuan.
MABBALIN TU ARI MAKASARILI
PRINSIPIO NA BIBLIA: “Arian nu nga nonopan i pammakapian nu laggapa, nu ari i pammakapian na kataggi-tadday nikamu.”—Filipos 2:4.
I KEBALINANNA: Makkasta i relasiottam ta totolay nu agga-nono tam i meduffuttam nira, ari tu i meduffudda nittam. Nu makasarili ka, marrake i relasiommu ta tanakuan. Angngariganna, nu agga-nono laman na tadday nga atawa i baggina, awayyana nga mabbalin yayya tu ari nga matalo ta atawana. Fuera paga tatun, awan tu maya nga makikkofun ta tolay nga kanayun nga mangiparayag ta pakkukuana onu ta ammuna. Kagitta na nakagi ta libru nga The Road to Character, “marresulta ta aru nga problema i pabbalin tu makasarili.”
I MAKUAM:
-
Duffunan i tanakuan. Mattalo ta kataggi-tadday anna kanayun nga madduffun i kurug nga makkofun. Kagian na karuan nga paggigiammu nga i minangnguffun ira ta tanakuan ay bihira nga madepres anna egga komfiansada ta baggida.
-
Maki-empatia. Kayà kagian na empatia nga makipattageno ittam ta totolay. Nu egga empatiam, ari ka mabbalin tu sarkastiko ta kakkagiammu nga intensiommu nga takitan i tadday nga tolay.
Nu egga empatiam, pasa-pasensiammu gapa i tanakuan. Makoffun gafu i empatia tapenu ari ka nga mangireruma anna makikkofukka ta nadduruma i kultura onu naggafuadda.
-
Makilallang ta totolay. Nu kana-kanayukka nga makilallang ta totolay, mas mammammum ira. Nu ikaya mu nga mapeggan tu mapia nga kofun, mawag nga pagistoriannu i ikavurunganna ira anna i nabalor ira nisa. Magginna ka gafu tu mapia. Ipasingammu nga interesadu ka nisa. Kagian na nikanni laman nga paggigiammu nga “mamagayayya ta totolay i makasta nga paggiristoria.”
PILIAN TU MAPIA I KOKKOFUMMU
PRINSIPIO NA BIBLIA: “I marakay nga kakavvulu ay makadaral ta mapia nga kata-katolay.”—1 Corinto 15:33.
I KEBALINANNA: Mainfluwensiakka na kakavvulu mu ta mapia onu marake. Umanugu i sociologist ira nga dakal i efekto nikaw na kokkofummu. Angngariganna, posible nga massigariliu onu makiddiborsio gapa i tadday nu kunnatun i kukukuan na kokkofunna.
I MAKUAM: Makikkofukka ta totolay nga mangipasingan ta ugali anna prinsipio ira nga ikaya mu parigan. Angngariganna, makikkofun ta totolay nga mataktika, marespeto, minangngiyawa, anna minammadulo.
KARUAN PAGA NGA PRINSIPIO TA BIBLIA
Maggiraw tu nebase-Biblia ira nga video nga nadisenio tapenu makkasta i relasion ta familia na tinedyer ira, na abbarabbing, anna na magatawa ira
LILLITAN I MAKAPATAKI NGA PAGUVOVUG.
“I ari napannonopan nga uvovug ay gittana duddug na espada.”—PROVERBIO 12:18.
MABBALIN TU MINANGNGIYAWA.
“I minangngiyawa nga tolay ay mapprogreso.”—PROVERBIO 11:25.
TRATUAN I TOTOLAY TA IKAYA MU NGA PATTRATUDA NIKAW.
“Kuan nu gafu ta ikattolay nu i ikaya nu nga kuad-da nikamu.”—MATEO 7:12.
