Nu makasarili i tadday nga tolay, awayyana nga mabbalin yayya tu mangireruma. Atatannang gare i paninganna ta baggina anna abbona nga mas malalaki yayya anne ta tanakuan. Posible nga mabbalin tu kunnaw i maski sinni. Kagian na Encyclopædia Britannica: “Aru nga lahi i mannono nga mas atannang ira anne ta tanakuan​—ta pattolay, makan, sinnun, kukukuan, pangurug, prinsipio, anna karuan paga.” Kunnasi tam malillitan yaw nga ari fustu nga ideya?

“Mappakalinno kamu lallagu, anna ipay nu nga kanayun ta nono nu tu mas mapia i karuan ira nga totolay anne nikamu.”​—FILIPOS 2:3.

Anni i kayà kagian na teksto? Mawag nga mappakalinno ittam tapenu ariattam nonoppan nga atatannang ittam. Nu mapakalinno ittam, masingattam nga mas malalaki i tanakuan anne ta nittam ta karuan nga gannug. Awan tu lahi nga egga ta nira i ngamin nga makasta ira nga kualidad anna abilidad.

Innattam i nesimmu kani Stefan. Ziminakal yayya ta Komunista nga nasion ngem nalabananna  i pangirerumana ta totolay ira nga naggafu ta nasion ira nga ari tu Komunista. Kinagina: “Para nio, malsa i pangireruma nu ikwenta tam i tanakuan nga mas atannang. Kakku ammu i ngamin nga gannug. Egga i magigiammù ta kada tolay.”

Mabbalin tu realistiko anna aminammu nga makaliwa ka gapa. Tandaanammu nga mas malalaki i tanakuan ta karuan nga gannug. Kammu nonoppan nga para-parehu i pakkafian na ngamin nga totolay nga para-parehu i naggafuadda.

Imbes tu marake i nonoppammu meyannung ta tadday nga tolay, iyavu mu ta baggim:

• ‘I kualidad kari ira nga kalussaw ku tatun nga tolay ay talaga marake onu neruma laman?’

• ‘Egga kari gapa i masinganna nga pakkafiakku?’

• ‘Ta anni ira nga gannug nga mas malalaki yayya anne nio?’

Nu pannonoppammu yaw ira nga pakkiavu, mawawwan i pangirerumam anna masingammu paga i makasta tatun nga tolay.