Nu lisiattam i totolay nga negatibo i paningattam nira, mas lalu laman nga mangireruma ittam. Nu i kaparehu tam laman gapa i kokkofuttam, baka abbattattam saw nga i pannono, panageno, anna kukukuattam laman i fustu.

“Vukatan nu ta mapia i giffutuan nu!”​—2 CORINTO 6:13.

Anni i kayà kagian na teksto? Awayyana tumukoy na “futu” ta mataga-tageno tam. Nu i kaparehu tam laman ira i kakayà tam, awayyana nga mabbalin tu saradu i nono onu futu tam ta tanakuan. Tapenu ari mesimmu yatun nittam, mawag gapa nga makikkofuttam ta neruma ira nittam.

Nu makilala tam tu mapia i tanakuan, matindiattam nu ngatta neruma ira nittam. Nu naddukko ittam ngana nira, ariattam ngana manono nga neruma ira nittam. Importante ngana ira nittam. Magayayya ittam nu magayayya ira anna maraddam ittam nu maraddam ira.

Kunnaw i nesimmu kani Nazaré. Duma dati i paninganna ta dayu ira. Niyesplikana i nakaduffun nisa: “Nakikavulu ngà nira anna nakipattrabahu ngà nira. Napakurug ku nga ari gabba tu kurug i kakkagian na totolay meyannung ta nira. Nu mabbalin tu kofummu i tanakuan i kulturada, masingammu nga ari gabba ira tu para-parehu. Maddukko ka ta nira anna appresiammu ngana ira.”

Magaleg ka tu chansa nga makibbida i totolay nga tanakuan i nasion, kultura, onu lengguaheda.

• Ipa-istoriam nira i meyannung nira.

• Imbitammu ira nga kuman kavulu mu.

• Magginna ka tu mapia ta istoriada, anna ammuammu i gannug ira nga importante ta nira.

Nu alippawatammu i nappasa-pasadda, matindiammu nu ngatta kunnari i personalidadda. Nu kunnaw, mas maappresiam ira anna i kaparehuda ira.