Meyesplika kari na scientist ira nu kunnasi nga namegafu i uniberso anna i matolay ira nga gannug? Ari. Kagian na karuan nga meyesplika na scientist ira nga maggigiammu tu cosmology i pamegafu na uniberso. Ngem kagian na professor ta astronomy ta Dartmouth College nga si Marcelo Gleiser nga tadday nga agnostic: “Ari mi paga vuluvuga neyesplika nu kunnasi namegafu i uniberso.”

Yaw gapa i kagian na artikulo ta magazina nga Science News meyannung ta pamegafu na matolay ira nga gannug: “Imposible nga mammuan nu kunnasi talaga nga namegafu i matolay ira nga gannug ta planeta tam: Nabayag ngana nga nawawan i aru ta batu anna fossil nga mangipasingan nakuan ta nesimmu ira ta gafu-gafu na planeta tam.” Base ta kinagi da, ari paga talaga natabbag na scientist ira nu kunnasi nga namegafu i uniberso anna i matolay ira nga gannug.

Ngem baka nanono mu, ‘Nu naparatu i matolay ira nga gannug ta planeta tam, sinni gafu i Namaratu?’ Awayya na nga nanono mu gapa: ‘Nu egga i ma-uto anna minaggiddu nga Namaratu, ngatta ipamavulun na nga mazziga-riga i pinaratu na ira nga totolay? Ngatta kakkaru i relihion? Ngatta itulu na nga magangngua tu marake danuri makkakkagi nga maddayaw nisa?’

Ari nga matabbag danatun na science. Ngem arianna kayà kagian nga ariammu ngana malegan i fustu nga tabbag tatun ira. Kakurugan na, aru nga totolay i nakaleg ta tabbag ta Biblia.

Nu kayà mu ammuan nu ngatta mangurug ta Namaratu i karuan nga scientist nga naggigiammu tu Biblia, innan i jw.org. I-search i “pangurug ta naggafuan na inango.”