Egga kari i pamegafu na uniberso?

Kagian na Genesis 1:1: “Ta gafa-gafu, pinaratu na Dios i langi anna i davvun.”

Nige na 1950, aru nga prominente nga scientist i mangurug nga awan tu pamegafu na uniberso. Ngem base ta bagu ira nga nadiskubre, magaru ngana ta scientist ira i mangurug nga egga i pamegafu na uniberso.

Anni i itchura na planeta tam ta gafa-gafu na?

Nakagi ta Genesis 1:2, 9 nga ta gafu na, “awan paga tu forma na davvun anna awan paga tu naddian na,” anna napannu yaw tu danum.

Parehu yatun ta kakkagian na scientist ira. Kinagi na biologist nga si Patrick Shih nga ta gafu na planeta tam, “ari ka makenango taw ta awan tu oxygen . . . anna tana-tanakuan i itchura naw.” Kagian na magazina nga Astronomy: “Segun ta bagu ira nga research, napannu tu danum i planeta tam ta gafa-gafu na anna awan vuluvuga tu mamaga nga davvun.”

 Kunnasi nga nanguli i atmosphere tam ta pappasa na tiempo?

Malippawa tam ta Genesis 1:3-5 nga ta gafu nga nanaffu i nawag ta atmosphere na planeta tam, ari paga nga masingan i paggafuan natun. Nappasa i tiempo, masingan ngana i bilag anna i vulan.​—Genesis 1:14-18.

Kagian na Smithsonian Environmental Research Center nga ta gafu na, makafi laman nga nawag i nanaffu ta atmosphere tam nga nakadde ta planeta tam. Kunna paga: “Napannu bi tu makannag nga methane i interu nga davvun.” Tapus, “nawawan i methane anna nabbalin tu asul i langi.”

Anni i patturunug na nikaparatu na matolay ira nga gannug ta planeta tam?

Nakagi ta Genesis 1:20-27 nga naparatu i ayam ira ta danum, i makkagag ira nga ayam, i ayam ira ta davvun, tapus i tolay. Mangurug i scientist ira nga mas nappoppollu i ollu nga manango anne ta ollu ira nga mammal tapus nappasa paga i piga nga tiempo nige na tolay.

Kagian na karuan nga duma i kakkagian na Biblia ta nadiskubre na scientist ira. Ngem ari da laman gare ammu i talaga nga kakkagian na Biblia.

Ari nga kinagi na Biblia nga 6,000 dagun paga laman i uniberso onu i planeta tam. I kinagi na laman, naparatu i planeta tam anna i uniberso “ta gafa-gafu.” (Genesis 1:1) Ari nga kinagi na Biblia nu kanni yatun.

Ari nga kinagi na Biblia nga naparatu i ngamin nga matolay nga gannug ta planeta tam ta unag na annam nga aggaw nga sinaggi-24 oras. Inusa na Biblia i uvovug nga “aggaw” tapenu tukuyan i apaddu nga tiempo. Angngarigan na, kagian na nga i pinamaratu ta planeta tam anna ta matolay ira nga gannug taw ta unag na annam nga “aggaw” nga nakagi ta Genesis kapitulo 1 ay nesimmu “ta aggaw nga kiningngua ni Jehova a nga Dios i davvun anna langi.” (Genesis 2:4) Apapaddu gafu nga tiempo i kada “aggaw” ta annam nga aggaw nga pinamaratu na Dios ta planeta tam anna ta matolay ira nga gannug taw.

Ari nga kinagi na Biblia nga ari manguli i matolay ira nga gannug ta pappasa na tiempo. Nakagi ta libru na Genesis nga naparatu i ayam ira “segun ta klase da.” (Genesis 1:24, 25) Alawa i kayà kagian na uvovug nga “klase” ta Biblia. Awayya na gafu nga aru i species onu variety na tadday nga “klase.” Posible gafu nga ta pappasa na tiempo, manguli i variety anna species ta kada “klase” na matolay ira nga gannug nga maddian ta tadday nga lugar.

 Anni i makagim?

Simple anna eksakto i deskripsion na Biblia ta pamegafu na uniberso, ta itchura na planeta tam ta gafu na, anna ta pamegafu na matolay ira nga gannug. Posible kari nga makagi gapa na Biblia nu sinni i Namaratu tatun ira? Kagian na Encyclopædia Britannica nga i ideya nga naggafu i matolay ira nga gannug ta tadday nga mas makapangngua anne ta tolay ay “ari nga mekontra ta nadiskubre na moderno nga science.” b