IMPORTANTE i ministerio tam. Ngem ari nga appresian na ngamin i pallayyagayya tam. Maski nu maginteres i karuan ta mensahe na Biblia, ariadda kanayun masingan nga kawagan tu makipaggigiammu ira tu Uvovug na Dios.

Nesimmu yatun kani Gavin. Umu-umay yaya ta study ngem manakina i makipaggigiammu tu Biblia. Kinagina: “Baddi laman i ammù ta Biblia, ngem mappasirannà nga mammuadda yatun. Maganassinnà nga mailloko, anna manaki ku i ma-obliga.” Anni makagim? Awan ngana kari tu iddanama ni Gavin? Ari! Ikonsideram i makasta nga efektona ta tadday nga tolay i tuttuddu na Biblia. Kinagi ni Jehova ta nakkapollu nga aripanna ira: “I uvovug ku ay manuru nga kagitta na lumay, anna kagitta na afafù ta kaddo.” (Deut. 31:19, 30; 32:2) Iyilustra na deskripsion na lumay onu lappà nu kunnasi tam nga efektibo nga moffunan i ngamin nga klase na totolay ta ministerio.—1 Tim. 2:3, 4.

Ari madammo i lumay. Sesenu nga mabuu i lumay ta kada turu na danum nga naggafu ta utun. “Manuru nga kagitta na lumay” i uvovug ira ni Jehova—masippo, malumamo, anna makonsiderasion i pakiyuvovugna ta totolena. Maparigattam yaya nu irespesto tam i pagimamma na tanakuan. Pagarammattam i totolay nga ira lagapa i marrason anna mannono tu konklusiodda. Nu makonsiderasiottam, mas magginna i totolay anna mas efektibo i ministerio tam.

Makapabannay i lumay. Makapabannay i ministerio tam nu nonopattam i kapianan tapenu mas maginteres i tanakuan. Ari nga napilit nga mangalawà tu Bible study si Gavin, nga nekagi ta gafu. Ngem pinurueban ni Chris, i ollu nga brother nga nakiyuvovug sa, i nadduruma nga estilo tapenu mas komportable si Gavin nga paguvovugan i Biblia. Niyesplika sa ni Chris nga egga i tema na Biblia anna makoffun i pakannammuna taw tapenu mas malippawana i magigginnana ta study ira. Tapus, kinagi ni Chris nga nakumbinsi yaya nga kurug i Biblia megafu ta natuppal ira nga profesiya. Narresulta yaw ta aru nga paguvovug meyannung ta nu kunnasi natuppal i profesiya ira. Nabanna-bannayan si Gavin taw ira nga pakiyuvovug anna inalawàna gabbalaman i paggigiammu tu Biblia.

Mangiyawa-inango i lumay. Ta Israel, makaekspiriensa ira tu tiempo na patu nga awan tu urang ta piga vulan. Nu awan tu basa nga maggafu ta lumay, mallanang onu mallelay anna matay i mulu-mula. Ta kaggawattam, egga gapa tiempo na pammaga ta espiritual kagitta na kinagi ni Jehova. (Amos 8:11) Nipromesa ni Jehova nga mabbalin tu ‘kagitta na lumay nga naggafu sa’ i nazelugan ira nga evanghelisador ta pangilayyagayya, durante nga suportan ira na kakavvuluda nga “tanakuan nga karneru.” (Mik. 5:7; Juan 10:16) Tagibalorattam kari i mensahe na mapia nga dumug na Pappatulan nga parte na probision ni Jehova nga mangiyawa-inango ta espiritual?

Bendision nga naggafu kani Jehova i lumay. (Deut. 33:13) Awayyana nga bendision i ministerio tam ta magginna ira, kagitta na bendision nga nalawà ni Gavin. Gukaban na paggigiammu tu Biblia, naleganna ngamin i tabbag ta pakkiavuna. Alistu i pinapprogesona adde ta nabawtisowan. Kavuluna ngana si Joyce nga atawana nga magayaya nga mangilayyagayya ta mapia nga dumug na Pappatulan.

Nu nonopattam i lumay, mapagaram ittam nga tagibaloran i ministerio tam. Kunnasi? Awan tu efekto na tadday nga turu na lumay, ngem i napattaradday nga turu ay makabisibi onu makabaya ta interu davvun. Kagitta gapa na sinaggi-taradday nga pamministerio, balabaddi i kasingannanna. Ngem dakal nga uffun i nattaradday nga pappursigi na ministro ira ni Jehova tapenu mangiyawa tu pamakurug ta “ngamin nga sinolay.” (Mat. 24:14) I ministerio tam kari ay bendision para ta tanakuan nga naggafu kani Jehova? Wan! Nu kagitta na lumay i mensahe tam—ari madammo, makapabannay anna mangiyawa-inango!