Felisa: Deboto nga Katoliko i familiami. Ta kakuruganna, 13 ta kafamilià i pari onu ofisial na Katoliko. Binendisionan paga lagu ni Pope John Paul II i kapitta na yenà, nga tadday nga pari, tapenu mekonsidera nga mabbalin tu santo. Simple laman i pattolemi. Panday i yamà anna makkomang gapa i yenà. Sakan i kaka ta walu nga mawwaragi.

Turi ta 12 anios ngà, namegafu i Spanish Civil War. Kabalin na gerra, nefuku i yamà. Manaki na gobierno i ideyolohiyana. Narigi-rigatan i yenà ta pappakan nikami, yatutta nirekomenda na kofunna nga iyangena ta kumbentu ta Bilbao, Spain i tallu ta wawwaragì—si Araceli, Laura, anna si Ramoni. Siguradu nga ariadda mabisin tari.

Araceli: Tatun nga tiempo 14, 12, anna 10 laman i dagummi, anna mariga i mesinna ta familiami. Ta Bilbao, mappaka-pakarenu kami. Nappasa i dua ragun, niyali kami na madre ira ta dakal nga kumbentu ta Zaragoza nga manangngal ta lallakay anna babbako. Trabahumi i mappakarenu ta kusina, nga kabbannag para ta tinedyer ira.

Felisa: Turi ta minay i wawwaragì ta Zaragoza, naddesision i yenà anna i pari ta diammi, nga tiyù, nga umay ngà gapa mattrabahu tatun nga kumbentu. Ta pagabboda, i pamapanawda niakan i mangililli ta tadday nga bagitolay nga mangayayà niakan. Megafu ta relihioso ngà, kakaya ku i maddian ta kumbentu. Minakkimisa ngà bi kada aggaw, anna ninononò ku paga i mabbalin  tu misionera kagitta na kapittà nga frayle ta Africa.

Awan tu kiningngua na madre ira tapenu mapagaram ngà ta pakkaraga ku nga masserbi ta Dios ta tanakuan nga lugar, anna natageno ku nga agga-fuku ngà ta kumbentu. Kabalin na tanga-ragun, naddesisionnà nga mattoli ta balemi tapenu tangngallan i tiyù nga pari. Kakayà ku gapa i magayus tu lappaw ta kapilia anna sinnungan i imahe ni Maria anna “santo ira.”

Araceli: Nanguli i pattolemi ta kumbentu. Kabalin na ollu ira nga tabbà, naddesision i madre ira nga passirinnadda kami nga mawwaragi. Nabattang si Ramoni ta Zaragoza, minay si Lauri ta Valencia, anna niyangedà ta Madrid, nga tatun ku kingngua i mekadua ira nga tabbà. Mamalay ta estudiante ira, lallakay anna babbako, anna tanakuan paga nga bisita ira i kumbentu ta Madrid, yatutta napakaru i trabahu. Nattrabahu ngà ta hospital na kumbentu.

Kakuruganna, ekspektakku nga makapagayaya i pattolay na madre. Kara-karagatakku i mabbibbig anna malippawa i Biblia. Ngem awan tu naguruvovug meyannung ta Dios onu kani Jesus, anna ariammi inusa i Biblia. Nakagigiammu ngà laman tu baddi nga Latin. Ginigiammù i pattolay na “santo ira,” anna naddayarayaw ngà kani Maria. Ngamin ngana ay madammo nga trabahu.

Navurungannà, yatutta nakiyuvovug ngà ta mother superior. Kinagì sa nga awan tu serbi na pattrabahù tapus tanakuan nga tolay laman i mabbenefisio durante nga mawag na familià i uffukku. Nifukunà ta selda, ta pagabbona nga manguli i nono ku anna mafugaddannà nga mallawan ta kumbentu.

Namittallu nga pinalawannà na madre ira tapenu puruebadda nu kayà ku paga manaw. Megafu ta determinasiokku, kinagianadda nga mattura tu, “Manaw ngà megafu ta mas kaya ku nga passerbian si Satanas anne ta Dios.” Nakaddag ngà tatun nga ikiddoda, anna maski desperadu ngà nga manaw ta kumbentu, ariakku metura i kunnatun ira nga uvovug. Kabalinna, kiniddò nga makkumpisal ngà, anna kinagì nu anni i nesimmu. Niyunnug na diocese nga meyali ngà ta naggafuanakku nga kumbentu. Kabalin na piga vulan tari, napamavulunannà nga manaw. Ari nabbayag, nanaw gapa ta kumbentu si Lauri anna si Ramoni.

Felisa: Ta pappasa na tiempo, nakitawa ngà anna nagali ngà ta Cantabria. Regular ngà lagapa  makimisa, anna egga mittan nga liggu, naginnà i anunsio na pari. Durante nga agga-tammina i libru nga The Truth That Leads to Eternal Life, mappoporay nga nikullena, “Innannu yaw nga libru! Nu egga mangiyawa nikamu tu kunnaw, iyawanu niakan onu itabbonu!”

Awan tu kopià, ngem insigida nga kayà ku i makalà. Nappasa i piga aggaw, dua nga Saksi i nattotto ta balè anna niyafursida niakan i “megamma” nga libru. Kagabianna, binibbig ku yatun, anna ta panolida, naki-study ngà nira.

Nadde na kinakurug i futù. Natalianan tu aya kani Jehova anna talikarag ta ministerio i debosiokku ta dati nga relihiokku. Nabawtisowannà turi 1973. Maski baddi laman i tiansa nga mekagì i kinakurug ta familià, kiningnguà i ngamin nga mawayyà. Kagitta na kinagì ta gafu, kokkontradda i pangurug ku, mas ngana si Araceli.

Araceli: Pinaddaddamnà na marake ira nga ekspiriensà ta kumbentu. Ngem, tulu-tuloy ngà lagapa makimisa kada liggu, anna marrosario ngà kada aggaw. Talaga kakayà ku nga mantindian i Biblia, anna nappoffun ngà ta Dios. Ngem turi ta nakiyuvovug si Felisa niakan meyannung ta bagu nga pangurugna, abbo ku tu fanatiko yaya, ta matageno ku nga masiki-sikan i pangurugna ta kakkagianna. Kinontrà yaya.

Nappasa i piga ragun, nanoli ngà ta Madrid tapenu mattrabahu anna nakitawa ngà. Ngem nannegatibo ngà. Napansin ku nga ari kukukuan na regular ira nga makimisa i magigginnada ta Sermon ira. Yari tu nagimmang ngà makimisa. Ariakku ngana kurugan i “santo ira,” i kumpisal, onu i infiernu. Nitabbo ku ngana ngamin i santò. Ariakku ammu nu fustu i kukukuakku. Nadismaya ngà, ngem tulu-tuloy ngà nakimallo: “Dios ku uffunannà, kayà ku nga makannammuakka!” Neraddammakku nga namippiga ngana minay i Saksi ira ta balemi, ngem ariakku vuluvuga ira inarubang. Awan tu komfiansà ta maski anni nga relihion.

Ta gafu nga daga-ragun na dekada 1980, namegafu nga makipaggigiammu tu Biblia ta Saksi ira i wagì nga da Lauri ta France anni Ramoni ta  Spain. Abbo ku nga nelloko ira, kagitta na nesimmu kani Felisa. Turi kua, nammammù i karrubà nga si Angelines, nga nabbalin tu kofukku. Saksi gapa yaya. Kanayun nga iyafursina niakan anna na atawana i mab-Bible study. Maski nu maddududa ngà, natagenoda nga kakayà ku nga mammuan i kinakurug ta Biblia. Turi kua, kinagì nira: “Sige, makipaggigiammu ngà basta usakku lagapa i Biblià,” nga yatun i Biblia nga Nácar-Colunga.

Felisa: Turi nabawtisowannà ta 1973, egga i ma-70 nga Saksi ta siudad na Santander, kabisera na probinsia na Cantabria, Spain. Alalawa i teritoriami, yari tu mattakay kami ta bus anna turi kua ta kotse tapenu mallayyagayya ta interu probinsia. Minay kami ta kada bario adde ta ginatu ngana nga bario i nabisitami tatun.

Ta nappasa nga daga-ragun, neddannà tu pribilehio nga mangikondukta tu paggigiammu ta Biblia, anna 11 ta estudiantè ira i nabawtisowan ngana. Aru nira i Katoliko. Megafu ta dati deboto ngà, ammù nga mawag nga pappasensian anna intindiakku ira. Nalippawa ku nga mawagda i tiempo tapenu uliadda i nabayag ngana nga pangurugda anna mawag nga madde na Biblia anna na masanto nga espiritu ni Jehova i futuda tapenu moffunan ira nga masingan i kinakurug. (Heb. 4:12) Nabawtisowan i atawà nga pulis nga si Bienvenido turi 1979, anna namegafu i yenà nga makigigiammu tu Biblia nigena natay.

Araceli: Minassupetsa ngà turi ta namegafu ngà makigigiammu tu Biblia ta Saksi ira. Ngem ta pappasa-pasa na kada ligguan, natageno ku nga nawawan ngana i pakkalussaw ku. I pangiyaplika na Saksi ira ta ilayyagayyada i talaga nagustuakku nira. Mas magayaya ngà ngana megafu ta sinalian na pangurug i passuspetsà. Maski i karuan ta karrubà, kinagianaddà, “Araceli, ariammu panawan i dalan nga pinilim!”

Neraddammakku nga nakimallo ngà, “Dios ku nga Jehova, mabbalo ta ari ka nga nolang niakan anna ta napakaru nga oportunidad tapenu malegakku i ala-alegakku—i kinakurug ta Biblia.” Nakippakoma ngà ta mataka-taki nga kinakkagì ta wagì nga si Felisa. Natalianan tu pakiyuvovug ta Biblia i papporfiami. Nabawtisowannà turi 1989 ta edad 61.

Felisa: Ta edad nga 91, balu ngà ngana anna awan ngana i siki-sikakku kagittana turi. Ngem, mabbibbibbig ngà lagapa tu Biblia kada aggaw, magatende ta study ira nu kaya na baggì anna magayaya nga mallayyagayya adde ta mawayyà.

Araceli: Awayyana tu megafu ta pinammadrè, kakayà ku nga layyagayyan i pari anna madre ira nga mammammù ta ministerio. Aru i nepalimà nga publikasion nira anna egga gapa makakkasta nga pakiyuvovug ku nira. Nanono ku i tadday nga pari, kabalin na piga nga pabbisita, kinagina: “Talaga umanugu ngà niko Araceli, ngem egga paga kari makuà eh laka-lakay ngà ngana? Anni la sangaw i makagi na miembrò ira anna na familià?” Kukku gapa: “Anni tamma gapa i makagi na Dios?” Dismayadu yaya megafu ta awan paga tu sikan na nonona nga mangitaddag ta kinakurug.

Meraddammakku i pinaka-espesial nga nesimmu niakan. Nesimmu yatun turi ta kinagi na atawà nga vulunannà nga umay ta study. Maski maturu tu 80 ngana i dagunna tatun nga tiempo, awan vuluvuga tu study nga pinalampasna kabalinna yatun. Nakipaggigiammu yaya tu Biblia anna nabbalin nga unbaptized publisher. Aru i makapagayaya nga nesimmu durante nga makkavulu kami ta ministerio. Natay yaya dua vulan nige na bawtismona.

Felisa: Tadday ta talaga makapagayaya niakan ay i masingakku nga i wawwaragì, nga dati mangokkontra niakan ay nabbalin tu wawwaragì ta espiritual. Kakayàmi i makkaravulu anna maggiristoria meyannung kani Jehova anna ta Biblia! Nattaradday kami gabbalaman nga maddayaw kani Jehova. *