ANNI nga gannug i maturu nga tanga-kilo laman ngem makagi nga “i pinakakomplikadu nga gannug ta interu uniberso”? Utò na tolay. Talaga makapabbaw yatun. Nu mas gigiammuattam yatun, mas dumakal i appresasiottam ta “makapabbaw” ira nga kiningngua ni Jehova. (Sal. 139:14) Innattam i tadday ta abilidad ira na utò tam​—i imahinasion. Anni i imahinasion? Kinagi na tadday nga diksiunario nga yatun “i abilidadmu nga makaforma tu imahe onu ideya ta nonomu na ganna-gannug nga bagu anna kappagayaya, onu ganna-gannug nga ariammu paga naekspiriensa.” Base tatun, umanugu ka kari nga kanayuttam usan i imahinasiottam? Angngariganna, nakabibbig onu nakaginna ka ngana kari tu lugar nga ariammu paga inangngayan? Finugaddannaka kari yatun nga makaforma tu imahe ta nonomu? Kurug, kada mannono tam tu gannug nga ariattam masingan, maginna, masissimang, matammi, onu magug, mangiyusa tam tu imahinasion. Uffunan ittam na Biblia tapenu maappresia nga dinisensio anna pinadday na Dios i totolay ta imahena. (Gen. 1:26, 27) Ari kari nga kayana kagian yatun nga egga imahinasion ni Jehova? Megafu ta pinilina nga paratuan ittam nga egga kunnatun nga abilidadna, mepangngo laman nga ekspektanna nga usattam yatun tapenu malippawa i urena. (Ecl. 3:11) Kunnasi tam nga masirib nga meyusa i imahinasiottam tapenu makua yatun, anna anni nga marake nga pangiyusa ta imahinasion i lillitattam?

(1) Pannonono ta ari mepangngo nga ganna-gannug ta ari mepangngo nga tiempo.

Ari marake i pannonono. Kakuruganna, mabenefisiowakka ta pannonono. Makoffun nittam i Eclesiastes 3:1 tapenu maappresia nga egga “tiempo ta kada gannug.” Posible i makakua tu gannug ta ari mepangngo nga tiempo. Angngariganna, nu ipamavulummu nga kokkomforme i manonomu nu study onu nu personal nga maggigiammu ka tu Biblia, makoffun kari i imahinasiommu onu makefugag? Nangiyawa mismu si Jesus tu pamappalan ta peligro na pannonono tu marake, kagitta na immoral nga paffantasia. (Mat. 5:28) Awayyana nga kuruga ikalussaw ni Jehova i karuan nga pana-panonotattam. Posible nga mattuppal ta pagangngua tu immoral i paffantasia tu immoral. Ariammu ipamavulun nga meyarayyu ka kani Jehova megafu ta imahinasiommu!

(2) Pannono nga makeyawa i material nga pakkukua tu manayun nga seguridad.

Importante anna makoffun i material nga ganna-gannug. Ngem siguradu nga madismaya tam nu nonopattam nga yatun i paggafuan na kurug nga pagayaya anna seguridad. Nitura na masirib nga si Solomon: “I kinariku na riku ay i masikan nga siudad; kagitta  yatun na mapprotekta nga pader ta imahinasionna.” (Prov. 18:11) Ikonsideram i nesimmu turi ta nabaha i maturu nga 80 porsiento ta Manila megafu ta masikan anna tulu-tuloy nga urang turi Setiembre 2009. Ari kari nga nafektan danuri aru i material nga pakkukuada? Kinagi na riku nga lalaki nga “awan tu pippilian na baha, parehas nga mamarriga ta riku anna ta pobre.” Alistu laman nga nonopan nga makeyawa tu proteksion anna seguridad i material. Ngem ari tu kurug yatun.

(3) Ari mepangngo nga pavvuru-vurung ta ganna-gannug nga ari gamma mesimmu.

Sinabarangngan ittam ni Jesus nga ariattam kuruga mavuru-vurung. (Mat. 6:34) Kokkomforme i mattallung ta imahinasiottam nu kanayuttam nga mavuru-vurung. Mabannag tam laman nga mavurung ta problema nga ari gamma paga nesimmu onu ari vuluvuga mesimmu. Kagian na Biblia nga awayyana nga mattuppal yatun ta depresion anna pakkafi na nono. (Prov. 12:25, ftn.) Importante gafu nga iyaplika i tabarang ni Jesus gukaban na ari kuruga pavvuru-vurung anna gukaban na pangarubang ta problema nu egga ngana.

(1) Pannono ta posible nga peligro anna pallilli tatun.

Pagaramman ittam na Biblia nga mabbalin tu masirib anna dati ngana pannonopan i posible nga mesimmu. (Prov. 22:3) Gukaban na imahinasiottam, awayya tam pannonopan i posible nga resulta na desisiottam. Angngariganna, nu nembitakka ta tadday nga okasion, kunnasi nga makoffun i imahinasiommu tapenu masirib nga makapaddesisiokka nu magatende ka onu ari? Kabalimmu nga nekonsidera nu sinni ira i nembitan, nu kunnasi karu na umay, anna nu sitaw onu sonu anni nga mesimmu yatun, nonopammu: ‘Anni pano i mesimmu tari?’ Masingammu kari nga makasta yatun nga okasion anna matuttul i prinsipio ira na Biblia? Makoffun yatun tapenu meletratum ta nonomu nu anni i mesimmu. Makoffun nikaw i imahinasion tapenu masirib nga makapaddesision anna malillitammu i peligro ta espiritual.

(2) Pannonono nu kunnasi solban i mariga nga problema.

Kasali ta imahinasion i “abilidad nga arubangan i problema.” Nu egga ariannu pakka-intindian ta tadday nga kakongregasiommu, anni i kuammu tapenu mapattalupaddian i imammo ta nallatanannu? Aru i mawag nga mekonsidera. Kunnasi kari yaya makiyuvovug? Anni i mepangngo nga tiempo nga  paguvovugannu i problema? Anni ira nga ergo onu bida anna tono na boses i kapianan nga meyusa? Nu usammu i imahinasiommu, mapraktismu ta nonomu i nadduruma nga awayyam kuan tapenu ma-arubammu i situasion, tapus piliammu i ammum nga kapianan anna pinaka-efektibo. (Prov. 15:28, ftn.) Makoffun yatun nga pannonono tapenu mapattalupaddian i imammo ta kongregasion. Siguradu nga mepangngo nga pangiyusa yatun ta imahinasion.

(3) Pamakasta ta personal nga pabbibbig anna paggigiammu ta Biblia.

Importante i inaggaw nga pabbibbig tu Biblia. Ngem ari laman nga yatun i kawagan. Mawag nga malippawa tam i praktikal nga leksion tatun anna iyaplika ta pattoletam. Mawag nga mas umunag paga i appresasiottam ta estandarte ira ni Jehova gukaban na pabbibbig tu Biblia. Makoffun i imahinasion tapenu makua tam yaw. Kunnasi? Ikonsidera i publikasion nga Tularan ang Kanilang Pananampalataya. Nu bibbigattam i istoria ira taw nga libru, moffunan ittam na imahinasiottam tapenu meletratu ta nono tam i lugar, situasion, anna i ginafuan na kada karakter ta Biblia. Moffunan ittam nga masingan i eksena, maginna i guni, magug i pallevu, anna matageno i natageno na karakter ira. Megafu tatun, masingattam i makakkasta anna makapagaram ira nga leksion ta Biblia nga pagabbo tam tu kabisadu tam ngana. Makoffun i kunnaw nga pangiyusa tu imahinasion tapenu mas mabenefisiowattam ta personal nga pabbibbig anna paggigiammu tu Biblia.

(4) Mapeggan anna mangipasingan tu empatia.

Makakkasta nga kualidad i empatia—tagenappammu ta futum i taki nga matageno na tanakuan nga tolay. Megafu ta parehas nga nipasingan ni Jehova anni Jesus i empatia, mawag tu parigattam ira. (Ex. 3:7; Sal. 72:13) Kunnasi tam nga mapeggan tu kunnaw nga kualidad? I pangiyusa ta imahinasion i tadday ta kapianan nga makoffun. Baka ariattam paga vuluvuga naekspiriensa i problema na wawwaragi tam. Ngem awayyam nga iyavu: ‘Nu sakan i egga ta kunnaw nga situasion, anni pano i matageno ku? Anni i kawagakku?’ Mas mepasingattam i empatia nu usattam i imahinasion tapenu tabbagan yaw ira nga pakkiavu. Wan, makoffun ta ngamin nga aspeto na pattoletam i pangipasingan tu empatia, kasali i ministerio tam anna i relasiottam ta kapangngurug tam.

(5) Pannonono nu kunnasi i pattolay ta paraiso.

Aru i detalyadu nga nakagi ta Biblia nu kunnasi i pattolay ta nepromesa nga paraiso. (Isa. 35:5-7; 65:21-25; Nep. 21:3, 4) Aru gapa i makakkasta nga letratu ta publikasiottam meyannung tatun. Ngatta? Mas nga mannawag i imahinasiottam gukaban na letratu anna makoffun nittam nga masingan i baggi tam nga magaya-ayaya ta realidad na nepromesa nga bendision. Mas ammu ni Jehova nga Namaratu ta imahinasion, nu kunnasi kasikanna yatun nga abilidad. Nu usattam yatun tapenu nonopan i promesana ira, mas makkomfiansa tam nga matuppal yatun ira. Makoffun paga yatun tapenu makapattalupaddiattam nga matalo, maski nu magattam ittam tu aru nga problema.

Megafu ta aya, niyawa ni Jehova nittam i makapabbaw nga abilidad—i imahinasion. Talaga makoffun nittam yatun tapenu makapasserbi tam sa ta inaggaw. Paray nakuan tu ipasingattam i appresasiottam ta Nangiyawa taw nga makakkasta nga regalu gukaban na masirib nga pangiyusa tatun ta kagaggaw.