1-2. (a) Kunnasi ilologo ni Satanas i totolay? (b) Anni i ikonsidera tam taw nga artikulo?

ILOLOGO ni Satanas, i “yama ngamin na siri,” i totolay namegafu paga ta tiempo ni Adan anni Eva. (Juan 8:44) Nelagum ta kinaladdugna i falsu nga tuttuddu meyannung ta patay anna i mesimmu kabalin na patay. Aru ta popular nga kostumbre anna annangngua ay nebase ta assing ta espiritu na natay. Megafu tatun, egga ira i wawwaragi tam nga mawag nga ‘makibakal para ta angngurug’ nu egga i matay ta familiada onu ta lugarda.​—Jud. 3.

² Nu meparubakka ta kunnatun ira nga kapurueba, anni i makoffun nikaw tapenu metaddaggammu i tuddu na Biblia meyannung ta patay? (Efe. 6:11) Kunnasim banna-bannayan anna pasikannan i kapangngurug nga mamroblema megafu ta pilitadda yayya nga makisali ta kostumbre ira nga manaki na Dios? Ipakanawag naw nga artikulo nu kunnasi ittam uffunan ni Jehova. Ollu, ikonsidera tam labbi nu anni i kagian na Biblia meyannung ta patay.

3. Anni i resulta na ollu nga kinaladdug?

³ Ari ginakkag na Dios nga matay i totolay. Ngem tapenu ari matay da Adan anni Eva, mawagda tuttulan i simple nga bilin ni Jehova: “Nu meyannung ta kayu na pakannammu tu mapia anna marake, ari ka kuman tatun, megafu ta, ta mismu nga aggaw nga kumakka tatun siguradu nga matay ka.” (Gen. 2:16, 17) Ngem namalattuag si Satanas tu problema. Naguvovug yayya kani Eva gukaban na serpiente nga nakkagi: “Siguradu nga ari kamu matay.” Kaddaraddam, kinurug ni Eva yatun nga kinaladdug anna kinnanna i vunga. Tapus, kiminan gapa i atawana.  (Gen. 3:4, 6) Megafu tatun, simillung i patay anna liwa ta totolay.​—Roma 5:12.

4-5. Kunnasi nga ilologo ni Satanas i totolay?

⁴ Natay da Adan anni Eva, kagitta na kinagi na Dios. Ngem ari lagapa nagimmang nga malladdug si Satanas meyannung ta patay. Ta pappasa na tiempo, namalattuag yayya tu bagu ira nga kinaladdug. Tadday tatun ay i tuddu nga matay i pisikal nga baggi ngem egga i imortal nga kararua nga sigga-matolay lagapa, awayyana nga ta mundo na espiritu. Nappanga-panga yatun nga kinaladdug anna napakaru nga totolay adde ta kaggawattam i nelogo.​—1 Tim. 4:1.

⁵ Ngatta napakaru nga totolay i nelogo? Ammu ni Satanas nu anni i mataga-tageno na totolay meyannung ta patay yari tu usanna yatun tapenu ilogo ira. Megafu ta naparatu ittam nga mattolay tu mannanayun, ariattam kayà i matay. (Ecl. 3:11) Ikonsidera tam nga i patay ay kalaban nga mapatulu noka.​—1 Cor. 15:26.

6-7. (a) Navviktoria kari si Satanas ta pangitaguna ta kinakurug meyannung ta patay? Iyesplika. (b) Kunnasi ittam uffunan na Biblia nga ari maganassing ta natay?

⁶ Maski paga ta appursigi ni Satanas, ari nga netagu i kinakurug meyannung ta patay. Kakuruganna, mas aru ngana nga totolay sangawe i makannammu anna mangilammuyag ta ituttuddu na Biblia meyannung ta kondision anna iddanama na natay. (Ecl. 9:5, 10; King. 24:15) Banna-bannayan ittam danaw nga kinakurug anna uffunanna ittam nga ari maganassing anna madduda ta mesimmu ta totolay nu matay. Angngariganna, sittam nga aripan ni Jehova ay ari maganassing ta natay anna ariattam gapa maganassing nga egga i marake nga mesimmu ta natay ira. Ammu tam nga natay ngana ira anna awan tu makuada nittam. Megitta ira ta masingngo i katrugna. (Juan 11:11-14) Ammu tam paga nga ari matageno na natay i pappasa na tiempo. Ta paginnolay gafu, maski danuri natay ngana ta ginatu nga dagun ay imammatadda nga manganannuan laman i pinappasa na tiempo, gittana pakkuridam na mata.

⁷ Siguradu nga umanugu ka nga klaro, simple, anna lohikal i kinakurug meyannung ta kondision na natay. Talaga dakal i neruman natun ta makelogo nga kinaladdug ni Satanas! Fuera paga ta pangilogo ta totolay, para-paraketan natun nga kinaladdug i Namaratu tam. Tapenu mas malippawa tam i perwisiu nga pinalattuag ni Satanas, tabbagattam danaw nga pakkiavu: Kunnasi napara-parake si Jehova megafu ta kinaladdug ni Satanas? Kunnasi nepanono ta totolay nga ari kawagan i sakrifisio nga tavvu ni Cristo? Kunnasi natun nammungan i paddaddam anna pazziga na totolay?

8. Kagitta na mabibbig ta Salmo 106:38-40, kunnasi mapara-parake si Jehova ta kinaladdug ni Satanas meyannung ta natay?

⁸ Mapara-parake si Jehova megafu ta kinaladdug ni Satanas meyannung ta natay. Nelagum tatun nga kinaladdug i falsu nga tuddu nga mannanayun nga maparigatan i natay ta infiernu. Para-paraketan natun nga tuddu i Dios! Kunnasi? Kayà ituddu naw ta totolay nga i Dios na aya ay kagitta na Diablo nga marake i personalidadna. (1 Juan 4:8) Anni i matageno mu tatun? Anni tamma i matageno gapa ni Jehova? Ari kari nga ikalussona i ngamin nga klase na kinarake?​—Bibbigan i Salmo 106:38-40.

9. Anni i efekto na kinaladdug ni Satanas ta sakrifisio nga tavvu ni Cristo nga mabibbig ta Juan 3:16 anna 15:13?

⁹ Tagibadditan na kinaladdug ni Satanas meyannung ta natay i sakrifisio nga tavvu ni Cristo. (Mat. 20:28) Tadday paga nga sataniko nga kinaladdug ay egga i imortal nga kararua na totolay. Nu kurug yatun, mannanayun ngana nakuan i inango na ngamin. Ari ngana nakuan nga mawag nga itavvung ni Cristo i inangona tapenu mapeggan ittam tu mannanayun nga inango. Daddamman nga i sakrifisio ni Cristo i kadakallan nga pangipasingan tu aya ta ngamin nga totolay. (Bibbigan i Juan 3:16; 15:13.) Nonopan nu anni i matageno ni Jehova anna ni Jesus meyannung ta tuddu ira nga mattagibaddi tatun nga nabala-balor nga regalu!

10. Kunnasi nga mas makaparaddam anna mamazziga ta natayan i kinaladdug ni Satanas?

¹⁰ Mas makaparaddam anna mamazziga ta totolay i kinaladdug ni Satanas. Mekaga-kagi ta maddaddam nga mappagana nga natayan tu abbing nga nanga mangana i Dios tu pabbalinanna tu anghel ta langi. Pakarianan kari natun nga sataniko nga kinaladdug i daddam onu mas paga lagu nga ammunganna? Usu-usadda i falsu nga tuddu meyannung ta infiernu tapenu pakurugan i paniga-riga, nelagum ngana i pangifungu onu pangigalu ta kayu anna panuggi turi ira ta mangokkontra ta tuttuddu na Romano Katoliko. Segun ta tadday nga libru meyannung ta Spanish Inquisition, kurugan danuri maniga-riga nga iddiddadda laman tu “passissim nu kunnasi i mannanayun nga katuggi ta infiernu” danuri heretic (totolay nga kontradda i tuddu na Romano Katoliko) tapenu mabbabawi ira nigeda matay anna mapaliag ira ta infiernu. Ta aru nga nasion, mapilitan i totolay nga dayawan, ikakua, onu makibendision ta ginafuadda nga natay ira. Kayà na karuan nga pagustuan i minatayda tapenu ari ira nga makastigo. Kaddaraddam, i pangurug ta sataniko ira nga kinaladdug ay ari makeyawa tu kurug nga banna-bannay. Lallagu, mangirattal yatun tu ari mepangngo nga vuru-vurung onu assing.

11. Kunnasi ittam pilitan na kafamilia anna kokkofun nga makasta gapa i intensiodda nga kontran i Uvovug na Dios?

¹¹ Egga ira i kafamilia anna kokkofuttam nga makasta gapa i intensiodda ngem pilitadda ittam nga makiparte ta ari nebase-Biblia nga annangngua meyannung ta natay. Uffunan ittam na aya ta Dios anna ta Uvovugna nga tuttulan si Jehova. Awayyana nga ipasiradda ittam anna kagiadda nga ariattam ayatan onu irespeto i natay. Baka kagiadda paga nga takitan na natay danuri matolay. Kunnasi tam idefensa i kinakurug ta Biblia? Ikonsidera nu kunnasim meyaplika i tumunug ira nga prinsipio ta Biblia.

12. Anni ira nga pangurug anna kostumbre meyannung ta natay i manawag nga ari nebase ta Biblia?

¹² Determinadu nga “mesina” ta ari nebase-Biblia ira nga pangurug anna kostumbre. (2 Cor. 6:17) Ta tadday nga nasion ta Caribbean, aru i mangurug nga nu matay i tolay, i “banig onu  amangna” ay mallelevu laman anna kastiguanna danuri marake i pinattratuda nisa. Awayyana paga nga “mamanggulu ta interu ili” yatun nga “banig,” kagian na tadday nga referensia. Kostumbre gapa ta Africa nga takkabban i ispehu ira ta balay na natay anna balittaggan i letratuna nga nebesing ta libag onu zizzing. I rason? Kagian na karuan nga ari nakuan masingan na natay i baggida! Bilang Saksi ni Jehova, siguradu nga ariattam vuluvuga nga kurugan i maski anni nga appappe nga istoria onu makiparte ta maski anni nga annangngua nga massuporta ta kinaladdug ni Satanas!​—1 Cor. 10:21, 22.

13. Nu ari ka siguradu meyannung ta tadday nga kostumbre, anni nakuan i kuammu, base ta mabibbig ta Santiago 1:5?

¹³ Nu ari ka siguradu meyannung ta tadday nga kostumbre onu annangngua, makimallo kani Jehova anna makkiddaw tu makadios nga sirib. (Bibbigan i Santiago 1:5.) Tapus marresearch ta publikasiottam ira. Nu kawagan, mappoffun ta elder ira ta kongregasion. Ariadda maddesision para nikaw, ngem moffunaddaka nga magaleg tu prinsipio ira na Biblia, nelavu ngana i ginigiammu tam taw nga artikulo. Nu kuammu danatun, ‘mapenam ka ngana nga maningan ta nadduman na mapia anna marakay.’​—Heb. 5:14.

14. Kunnasi tam mebita nga mesiddukal i tanakuan?

¹⁴ “Kuan nu ngamin yatun ta keraya-rayaw na Dios. Arian nu nga kuan i anni laman nga kegafuan na pattagaruli.” (1 Cor. 10:31, 32) Nu maddesision nga makiparte onu ari makiparte ta tadday nga kostumbre onu tradision, nonopattam nakuan gapa i efekto na desisiottam ta konsensia na tanakuan, mas ngana danuri kapangngurug tam. Siempre, ariattam kayà nga meyawawan i maski sinni! (Mar. 9:42) Kayà tam gapa nga ibita i ari mepangngo nga pangisiddukal turi ira ta ari nga Saksi. Aya i mamaguyu nittam nga makiyuvovug nira tu marespeto, nga makedayaw kani Jehova. Siguradu nga ariattam makiddama ta totolay onu uyawan i tradisiodda ira. Daddamman, makapangngua i aya! Nu makonsiderasion anna marespeto i pangipasingattam tu aya, awayya tam mapalapo i futu maski danuri mangontra.

15-16. (a) Ngatta masirib nga iyesplika ta tanakuan i pangurug mu? Mangiyawa tu angngarigan. (b) Kunnasi tam meyaplika i nitura ni Pablo ta Roma 1:16?

¹⁵ Iyammammu ta lugarnu nga tadday ka nga Saksi ni Jehova. (Isa. 43:10) Nu natayakkamu, awayyana nga mapporay i parientesnu anna karrubanu nu ari ka mesali ta tadday nga kostumbre. Mas mabi nga marubang yaw nga situasion nu datinu ngana nga niyesplika nira  i pangurugnu. Nitura ni Francisco nga taga-Mozambique: “Turi ta nammuammi na atawà nga si Carolina i kinakurug, kinagimi ta familiami nga ariammi ngana maddayaw ta natay. Napurueban i desisiommi turi ta natay i manang ni Carolina. Kostumbre ta lugarmi nga manigu tu natay durante na relihioso nga ritual. Kabalinna, mawag nga makkatrug tu tallu nga gabi i pinaka-aranni nga parientes nu sitawda nga nitabbo i danum nga nanigutadda. Yaw nga kostumbre ay mamagayayya kanu ta espiritu na natay. Ekspektan na familia ni Carolina nga makkatrug yayya ta nangitabbokadda.”

¹⁶ Anni i kingngua ni Francisco anna na atawana? Niyesplika ni Francisco: “Megafu ta ayami kani Jehova anna kayàmi pagayayyatan yayya, nammanaki kami nga makiparte tatun nga kostumbre. Grabe i poray na familia ni Carolina. Inakusadda kami nga ari mangirespeto ta natay anna kagiadda nga ariadda kami ngana vuluvuga nga bisitan onu uffunan. Megafu ta datimi ngana nga niyesplika i pangurugmi nira, ariammi nakiddiskusion nira durante nga mapatu i uluda. Ngem, egga ira parientesmi nga nangidefensa nikami, nga kagiadda nga datimi ngana nga niyesplika i taddagmi. Ta pappasa na tiempo nakkalma gabbalaman i parientes ni Carolina, anna nakippakoma kami nira. Kakuruganna, minay ta balay i karuan nira tapenu makkiddaw tu literatura ta Biblia.” Ariattam nakuan vuluvuga nga ipasiran i taddag tam ta pangidefensa ta kinakurug meyannung ta patay.​—Bibbigan i Roma 1:16.

17. Anni i makoffun nittam tapenu mabbalin tu kurug nga kofun ta natayan nga kapangngurug?

¹⁷ Nu natayan i kapangngurug tam, kuattam nakuan i adde na mawayya tam tapenu mabbalin tu “kurug nga kofun . . . , anna wagi nga meyana ta tiempo na ziga.” (Prov. 17:17) Kunnasi ittam mabbalin tu “kurug nga kofun,” mas ngana nu mapipilit i tadday nga maddaddam nga wagi nga makisali ta ari nebase-Biblia nga annangngua? Ikonsidera i dua nga prinsipio ta Biblia nga makoffun nittam tapenu banna-bannayan i natayan.

18. Ngatta siminangi si Jesus, anna anni i magigiammu tam ta ehemplona?

¹⁸ “Makipaddaraddam kamu ta maraddam.” (Roma 12:15) Baka ariattam ammu nu anni i kagiattam  ta tadday nga maddaddam. Maski ariattam ammu nu anni i kagiattam, nu masingadda nga tumangi ittam, matagenoda nga ikavurungattam ira. Turi ta natay i kofun ni Jesus nga si Lazaro, sinangitan da Maria, Marta, anna na karuan i meddu nga wagi anna kofudda. Kabalin na appa nga aggaw turi ta zimittal si Jesus, “siminangi” gapa yayya, maski nu ammuna nga arannina ngana nga paginnolayan si Lazaro. (Juan 11:17, 33-35) Ipasingan na pattangi ni Jesus i matageno ni Jehova meyannung ta patay ni Lazaro. Turi ta nasingan na familia ni Lazaro nga siminangi si Jesus, natagenoda gapa i ayana nira nga siguradu nga namanna-bannay kada Maria anni Marta. Kunne na gapa, nu matageno na wawwaragi i aya anna pangikavurung, matagenoda nga ari ira magitetadday, nu ari, napalevutan ira na minangngikavurung anna minassuporta nga kokkofun.

19. Nu mamanna-bannay tu natayan nga kapangngurug, kunnasi tam meyaplika i Eclesiastes 3:7?

¹⁹ “Tiempo na ari pattannug, anna tiempo na paguvovug.” (Ecl. 3:7) Tadday paga nga makua tapenu banna-bannayan i natayan nga kapangngurug ay gukaban na pagginna tu mapia. Pagurayammu i wagi nga ikagi i mataga-tagenona, anna ariammu massinti nisa ta ‘kokkomforme nga mekagina.’ (Job 6:2, 3) Awayyana nga makkonsimision yayya megafu ta pamipilit na ari Saksi nga kafamiliana. Yatutta makimallo kavulu yayya. Ipakimallo ta “Minagginna tu pakimallo” nga iddan yayya tu sikan anna memammo nga panageno. (Sal. 65:2, NW) Nu mepangngo, mabbibbig kamu tu Biblia onu artikulo ta publikasiottam ira, gitta na makapagaram nga istoria na pattolay.

20. Anni i gigiammuattam ta tumunug nga artikulo?

²⁰ Talaga dakal i appabalo tam nga ammu tam i kinakurug meyannung ta natay anna i makakkasta nga mappange nga maginnennag turi ira ta natay! (Juan 5:28, 29) Yari tu, ta kakkagian anna kukukuan, magutu tam nakuan nga idefensa i kinakurug ta Biblia anna ibillay yatun ta tanakuan ta kada mepangngo nga tiansa. Ikonsidera na tumunug nga artikulo nu kunnasi paga nga gamman ni Satanas i totolay ta pakannammu ta kinakurug​—i espiritismo. Gigiammuattam nu ngatta mawag nga ibita tam i annangngua anna dibersion nga egga i koneksionna tatun nga silu na demonio.