1. Anni i kayà nga kuan na ngamin nga aripan na Dios, anna ngatta? (Innan i letratu ta vungun.)

KUNNAW i nibilin ni Jesu-Cristo ta disipulosna: “Umay kamu . . . ta ngamin nga totolay ta ngamin nga lugu-lugar anna pabbalinan nu ira tu disipulò.” (Mat. 28:19) Kayà na ngamin nga matalo nga aripan na Dios nga magigiammu nu kunnasi nga ‘makuada i ngamin nga annungadda’ taw nga ministerio nga nepakua nira. (2 Tim. 4:5) Kakuruganna, yaw nga trabahu ay mas importante, mas makabenefisio, anna mas prayoridad anne ta maski anni nga kukukuattam ta pattolay. Ngem, awayyana nga marigatattam nga usan i mas aru nga tiempo ta ministerio kumpara ta kayà tam nakuan.

2. Anni ira nga mariga nga situasion i meparubang nittam ta pangituppal tu mapia ta ministerio tam?

² Egga ira i tanakuan nga importante nga aktibidad nga mangufu ta tiempo anna sikattam. Awayyana nga mattrabahu ittam tu aru nga oras tapenu makalanno i kuartu tam ta gannug ira nga mawag tam anna na familia tam. Baka marigatattam megafu ta karuan nga responsibilidad ta familia, taka-taki, depresion, onu ziga na pallakay anna pabbako. Kunnasi tam metuppal tu mapia i ministerio tam maski meparubang ta kunnatun ira nga mariga nga situasion?

3. Anni i makagi tam ta kinagi ni Jesus ta Mateo 13:23?

³ Nu limitan na situasiottam i tiempo nga usattam ta passerbi kani Jehova, ari nakuan makkafi i nono tam. Ammu ni Jesus nga ari makeyawa tu parehu nga karu na oras nga mallayyagayya i kada tadday nittam. (Bibbigan i Mateo 13:23.) Kuruga tagibaloran ni Jehova i ngamin nga kuattam ta passerbi adde ta yatun i kapianan nga makua tam. (Heb. 6:10-12) Ngem  awayyana nga matageno tam nga ipamavulun na sirkumstansia tam nga ammungan paga i makua tam. Taw nga artikulo, gigiammuattam nu kunnasi pagolluan ta pattoletam i ministerio, pattalupaddianan nga simple i pattolay, anna mas pakastan i pallayyagayya anna panuddu tam. Ngem anni i kayà kagian na pangituppal tu mapia ta ministerio tam?

4. Anni i kayà kagian na pangituppal tu mapia ta ministerio tam?

⁴ Tapenu metuppal tam tu mapia i ministerio tam, mawag tu kuattam i adde na mawayya tam nga mallayyagayya anna manuddu. Ngem ari laman tu karu na oras i nelagum tatun. Importante kani Jehova i motibo tam. Megafu ta ayatattam si Jehova anna i kasittoletam ira, interu-kararua i pangituppal tam ta ministerio tam bilang Cristiano. * (Mar. 12:30, 31; Col. 3:23) I kayà kagian na interu-kararua nga passerbi ta Dios ay usan tu mapia i siki-sikattam tapenu passerbian yayya. Nu malippawa tam nga tadday nga pribilehio i pallayyagayya, kuattam i ngamin tapenu ilayyagayya i mapia nga dumug ta mas aru nga totolay.

5-6. Mangiyawa tu angngarigan nu kunnasi pagolluan na tadday nga tolay i ministeriona maski limitadu i tiempona.

⁵ Imajinan i tadday nga kabataan nga lalaki nga guggustuna i maggitara. Magayayya yayya nga maggitara kada egga i tiansana. Tapus, nakaleg yayya tu trabahu nga maggitara ta tadday nga restaurant kada weekend. Ngem kurang i suelduna tatun para ta paggastuanna ira. Yari tu nattrabahu paga yayya ta tadday nga tienda kada Lunes adde ta Biernes. Maski paga mas aru i tiempona nga mabbantay tu tienda, manakina lagapa nga panawan i musikana. Guggustuna nga mabbalin tu malalaki nga gitarista anna mabbalin tu full-time nga musikeru. Yatutta kada egga i tiansana, maggitara lagapa yayya maski manganannuan laman.

⁶ Kunnatun gapa, awayyana nga limitadu laman i oras mu nga mallayyagayya. Ngem, yatun i kakayà mu nga kuan. Determinadu ka nga pakastan i abilidad mu nga addetan i futu na totolay gukaban na mapia nga dumug. Megafu ta  okupadu ka ta aru nga gannug, baka manono mu nu kunnasim pagolluan i pallayyagayya.

7-8. Kunnasi tam maparigan i pagimamma ni Jesus ta ministerio?

⁷ Nangiyawa si Jesus tu kakastan nga ehemplo nu kunnasi imammatan i ministerio. I pinaka-importante ta pattolena ay i pangilayyagayya meyannung ta Pappatulan na Dios. (Juan 4:34, 35) Ginatu nga kilometro i nilakagna tapenu layyagayyan i mas aru nga totolay. Kanayun yayya magaleg tu tiansa tapenu kiyuvovugan i totolay ta publiko ira nga lugar anna ta babaleda. Niprayoridad ni Jesus i ministerio ta interu nga pattolena.

⁸ Maparigattam si Cristo ta pagaleg tu tiansa tapenu ilayyagayya i mapia nga dumug ta maski anni nga tiempo anna ta maski sitaw nga posible yatun. Agga-paran ittam nga isakrifisio i pammakapianattam tapenu makapallayyagayya. (Mar. 6:31-34; 1 Ped. 2:21) I karuan ta kongregasion ay makapasserbi bilang espesial, regular, onu auxiliary payunir. Naggigiammu gapa i karuan tu tanakuan nga lengguahe onu nagali nu sitaw mas dakal i pakawagan para ta mallayyagayya ira. Ngem, aru ta trabahu nga pallayyagayya ay ituttuppal na publisher ira nga ari makakua tatun ira, ngem kukukuadda lagapa i mawayyada. Maski anni paga tatun, ari ikiddaw ni Jehova i mas paga anne ta mawayya tam nga makua. Kayàna nga magayayya ittam ngamin ta passerbi sa durante nga ilammuyag tam i ‘makapabbaw nga dumug nga naggafu ta maraya-rayaw nga Dios.’​—1 Tim. 1:11; Deut. 30:11.

9. (a) Kunnasi pinagollu ni Pablo i pallayyagayya maski nu mawagna i mattrabahu? (b) Anni i ipasingan na Kingngua 28:16, 30, 31 meyannung ta pagimamma ni Pablo ta ministerio?

⁹ Nangipasingan si apostol Pablo tu makasta nga ehemplo ta pamagollu ta trabahu nga pallayyagayya. Ta mekadua nga pabbiahena bilang misionero ta Corinto, makkurang ngana i kuartuna yari tu mawagna i mamadday tu tolda tapenu egga i pagaleganna. Ngem ari tu pinaka-importante kani Pablo i pamadday tu tolda. Nattrabahu yayya tapenu suportan i baggina ta ministerio anna tapenu melayyagayyana i mapia nga dumug ta taga-Corinto ira nga ‘ari vuluvuga nga nakipaga’ nira. (2 Cor. 11:7) Maski nu mawag nga mattrabahu tu sekular si Pablo, kanayun nga prayoridadna i ministerio, yatutta mallayyagayya yayya kada Aggaw na Pagibannag. Turi ta nakkasta ngana i sirkumstansiana, mas aru ngana nga tiempo i meyusana ta pallayyagayya. “Nipay ni Pablo ngamin i tiempo na ta pallayyagayya na.” Kunne na gapa, “pinakurug na ta Judio ira tu si Jesus i Cristo.” (King. 18:3-5; 2 Cor. 11:9) Ta pappasa na tiempo, turi ta dua ragun nga nefuku si Pablo ta mismu nga balena ta Roma, nilayyagayyanna danuri nabbisita nisa anna namadday yayya tu tura. (Bibbigan i Kingngua 28:16, 30, 31.) Determinadu yayya nga ari ipamavulun i maski anni nga mangalsa ta fokusna ta ministerio. Niturana: “Neyawa na [Dios] niakan yaw nga annungan; yatun tu masikan i nono ku.” (2 Cor. 4:1) Kagitta ni Pablo, maski paga aru nga tiempo i ufukattam ta trabahu, puede tam lagapa nga pabbalinan nga pinaka-importante ta pattolay i trabahu na Pappatulan.

10-11. Kunnasi tam metuppal tu mapia i ministerio tam maski nu limitadu i makua tam megafu ta taki?

¹⁰ Nu limitadu ngana i makua tam ta pamala-balay megafu ta edad onu ta gawa-gawayyan, puede tam purueban i tanakuan nga klase na ministerio. Nallayyagayya danuri ollu-siglo nga Cristiano nu sitaw i dian na totolay. Nagaleg ira tu tiansa tapenu ipakiyuvovug i kinakurug​—ta babalay, publiko, anna informal—​maski sitaw nga egga ‘masimmuadda’ nga totolay. (King. 17:17; 20:20) Nu marigatattam  nga lumakag tu arayyu, awayya tam mappuestu ta tadday nga publiko nga lugar nu sitaw puede tam layyagayyan danuri mattatalebag. Onu awayya tam mallayyagayya tu informal, mamadday tu tura, onu mat-telephone witnessing. Aru nga publisher nga limitadu ngana i makuada ta pamala-balay i magayayya lagapa ta kunnaw nga klase ira na pallayyagayya.

¹¹ Maski limitadu i makuam megafu ta taki, metuppal mu lagapa tu mapia i ministeriom. Ikonsidera mangana i ehemplo ni Pablo. Kinagina: “I ari nga maguku-gukug nga pakapangngua ay maggafu ta Dios, ari tu maggafu nikami.” (2 Cor. 4:7) Mawag ni Pablo yatun nga pakapangngua turi ta nattaki yayya ta mittan nga pammisionerona. Niyesplikana ta taga-Galacia ira: ‘I pinattaki ku i negafuan na nipangilammuyag ku nikamu ta evanghelio turi ta gafu na.’ (Gal. 4:13) Kunne na gapa, maski nu egga taki mu, egga lagapa i tiansam nga ilayyagayya i mapia nga dumug gitta na ta doktor, nars, anna tanakuan nga mangasikasu nikaw. Aru nira i egga ta pattrabahuan ta tiempo nga mamala-balay i publisher ira.

12. Anni i kayà kagian na “nakafokus” i matam?

¹² Kinagi ni Jesus: “I mata ay meyarig tu tulu na baggi. Nu mapia i paningan na matam [“nu i matam ay nakafokus,” NW], manawagan i interu nga baggim.” (Mat. 6:22) Anni i kayàna kagian? Mawag tam nga pasimpleyan i pattoletam onu maffokus ta tadday nga addetan, onu gakkag, nga ari malsa onu meyarayyu i fokus tam tatun. Nipasingan mismu ni Jesus i ehemplo ta paffokus ta pattolay ta ministerio, anna sinudduanna i disipulosna nga maffokus ta passerbi kani Jehova  anna ta Pappatulanna. Maparigattam si Jesus nu nakasentro ta pallayyagayya i pattoletam anna ‘asigurattam nga aleran i meyannung ta Pammaguray na Dios anna kuan i ipakua na.’​—Mat. 6:33.

13. Anni i makoffun nittam tapenu nakafokus ittam ta ministerio tam?

¹³ I tadday nga makua tapenu nakafokus ittam ta ministerio ay gukaban na pappasimple ta pattoletam tapenu mas aru i tiempo tam nga uffunan i tanakuan nga mammuan anna ayatan si Jehova. * Angngariganna, moli tam kari i kapaddu na trabahu tam tapenu mas aru i tiempo tam nga mallayyagayya ta weekdays? Puede tam kari pakarianan i paddibersion ira nga makofu tu oras?

14. Anni ira nga panguli i kingngua na tadday nga magatawa tapenu mas aru i tiempoda ta pallayyagayya?

¹⁴ Kunnaw i kingngua na elder nga si Elias anna na atawana. Niyesplikana: “Ariammi paga makapappayunir insigida, ngem egga ira i makuami tapenu mas aru i orasmi ta pallayyagayya. Angngariganna, nattipid kami, pinakarianammi i dibersion ira nga makofu tu oras, anna nikiddomi ta amomi nga ulian i iskediul na trabahumi tapenu mas makapallayyagayya. Megafu tatun, makapallayyagayya kami maski ta gabi, mas aru i ikonduktami tu paggigiammu tu Biblia, anna mamiddua kami kada vulan nga makapamministerio nu weekdays. Magaya-ayayya kami!”

15-16. Segun ta 1 Timoteo 4:13, 15, kunnasi tam tulu-tuloy nga mapakasta i abilidad tam ta pallayyagayya? (Innan gapa i kahon nga “ Addetan ira nga Makoffun Tapenu Metuppal Ku tu Mapia i Ministeriò.”)

¹⁵ I tadday paga nga makua tapenu metuppal tam tu mapia i ministerio tam ay gukaban  na pappakasta ta abilidad tam ta pallayyagayya. Egga ira i trabahu nga mawag tu makalawa tu tulu-tuloy nga passanay tapenu mas mapeggan ira tu pakannammu anna abilidad. Kunnatun gapa ta mangilayyagayya ira ta Pappatulan. Mawag tu kanayuttam nga gigiammuan nu kunnasi mas mabbalin tu malalaki ta ministerio tam.​—Prov. 1:5; bibbigan i 1 Timoteo 4:13, 15.

¹⁶ Kunnasi tam gafu nga tulu-tuloy nga mapprogreso ta ministerio tam? Gukaban na pattuttul tu mapia ta instruksion ira nga malawà tam ta Study nga Pattolay Anna Ministerio. Mangituddu yaw nga study tu makakoffun ira nga passanay ta progresibo nga pamakasta ta abilidad tam ta tana na serbisiu. Angngariganna, nu mangiyawa tu tabarang i tserman turi ira ta estudiante nga nangipresenta ta asaymentda, makagigiammu ittam tu gannug ira nga makoffun ta ministerio tam. Puede tam iyaplika danatun nga suhestion sonu ilayyagayya tam i mapia nga dumug ta tanakuan. Awayya tam makipartner ta ministerio ta manangngal ta grupo ta tana na serbisiu tam onu ta tadday nga ekspiriensadu nga publisher, payunir, onu ta manangngal ta sirkito. Durante nga mas mabbalin ittam tu malalaki ta pangiyusa ta kada rimienta ta Teaching Toolbox, mas kakayà tam ngana i mallayyagayya anna manuddu.

17. Anni i matageno mu nu netuppal mu tu mapia i ministeriom?

¹⁷ Fugurammu i pribilehio tam nga ipamavulun ni Jehova nga mabbalin tu ‘kavulu na ta passerbi’ onu katrabahuna! (1 Cor. 3:9) Nu ‘piliammu i kapianan ta ngamin,’ anna maffokus ta ministerio bilang Cristiano, ‘sigga-pagayaya nga daya-rayawammu’ si Jehova. (Fil. 1:10; Sal. 100:2) Bilang tadday nga ministro na Dios, makapakkomfiansa ka nga iddan naka tu pakapangngua nga mawag mu tapenu metuppal tu mapia i ministeriom maski nu anni i problemam onu limitasiommu. (2 Cor. 4:1, 7; 6:4) Maski nu baddi onu dakal i makuam ta pallayyagayya gafu ta situasiommu, ‘magayayya’ ka lagapa nu interu-kararua i ministeriom. (Gal. 6:4) Nu ituppal mu tu mapia i ministeriom, mepasingammu i aya mu kani Jehova anna ta kasittolem. “Nu kunnaw i kuam-mu, mapaliag ka kunne na ta magginna ira nikaw.”​—1 Tim. 4:16.