Brother Winston, istoriammu bi nu kunnasim inaleg i Dios.

Ziminakal ngà ta tadday nga nesisina nga akkomanan ta Queensland, Australia. Ari tu relihioso i familiami. Gafu ta nesisina kami, maggi puru kafamilià laman i kilalà. Namegafu ta 12 anios, inaleg ku ngana i Dios. Naddasal ngà sa, anna nikiddò nga mammuakku i kinakurug meyannung nisa. Nanaw ngà gabbalaman ta akkomanan anna nakaleg ngà tu trabahu ta Adelaide, South Australia. Ta edad nga 21, nammammù si Pam durante ta bakasiokku ta Sydney, anna nikagina nio i meyannung ta relihioso nga grupo na British-Israel. Kakkagian natun nga grupo nga gaka-gaka ira na nakagi nga nawawan nga tribu ira na Israel. Segun ta grupo, danatun nga tribu ay i mafulu nga tribu na sigiran nga pappatulan nga naaripan turi ta mekawalu siglo B.C.E. Yayya nga turi nanoli ngà ta Adelaide, neyistorià yatun ta katrabahù nga Bible study na Saksi ira ni Jehova. Nakiyuvovug ngà nisa tu piga laman nga oras meyannung ta pangurug ira na Saksi. Kabalin natun, nanono ku nga yaw ngana i tabbag ta dasal ku ta kabbikku. Yaw i kinakurug meyannung ta Namaratu nio anna ta Pappatulanna! Nalegakku i “perlas nga kuruga mangina.”​—Mat. 13:45, 46.

Sister Pam, namegafum gapa nga inaleg yatun nga perlas ta kabbimmu. Kunnasim nalegan yatun?

Ziminakal ngà ta relihioso nga familia ta ili na Coffs Harbour, New South Wales. Nangurug i magana ku tuange ta lolo anna lolà ta tuttuddu na grupo na British-Israel. Sakan, pati i wagì nga lalaki, manang ku, kunne na gapa i aru nga kakkapittà ay napadakal kami nga kurugan nga faboran na Dios i totolay nga gaka-gaka na British. Ngem ariakku mangurug tatun ira nga tuttuddu yayya nga ari ngà nga madukko ta Dios. Turi ta  14 anios ngà, aru nga lokal nga relihion i nagatendeyakku, kasali ngana i Anglican, Baptist, anna i Seventh-day Adventist. Ngem kaddà noffunan nga mannammuan i Dios.

Nagali i familià ta Sydney, nu sitaw nakilalà si Winston, nga nabbakasion tatun nga lugar. Gitta na niyistoriana, gafu ta naguvovugammi i meyannung ta relihion, ta pappasa na tiempo, namegafu yayya nga nakipaggigiammu tu Biblia ta Saksi ira. Kabalin natun, napappannu tu teksto ira na Biblia i turana niakan! Kagiakku i kurug, ta ollu na bi mavurung ngà, tapus mairita ngà ngana. Ngem sisinu nga natindiakku nga danaw nga niturana nio i kinakurug meyannung ta Dios.

Ta 1962, nagali ngà ta Adelaide tapenu mas aranni ngà kani Winston. Niyunnugna nga makipaddian ngà ta magatawa nga Saksi nga da Thomas anni Janice Sloman, nga dati misionero ta Papua New Guinea. Kitessippo ira nio; disi-ocho anios ngà laman, anna dakal i niyuffudda nio tapenu kannammuan i Dios. Yayya nga nab-Bible study ngà gapa, anna megafu tatun nakumbinsi ngà nga nalegakku ngana i kinakurug. Kabalin na kasalmi ni Winston, insigida nga pinegafuanammi i kappagayayya nga passerbi kani Jehova ta ngamin tiempo. Maski nu aru i ziga, mas paga nga naappresiami i mangina nga perlas nga nalegammi.

Brother Winston, istoriammu bi nikami i ollu ira nga dagun na passerbim kani Jehova.

Ari nabbayag kabalin na kasalmi ni Pam, niddan nakami ni Jehova tu espesial ira nga asayment ta passerbi nisa. (1 Cor. 16:9) I ollu nga oportunidad ay nepagaram nikami ni Brother Jack Porter, nga nasserbi ta baddi nga kongregasiommi bilang manangngal ta sirkito. (Kaparehù ngana gapa yayya sangawe nga miembro na Branch Committee ta panga ta Australasia.) Pinagaram kami ni Jack anna na atawana nga si Roslyn nga marregular payunir. Na-enjoymi i mappayunir ni Pam tu lima ragun. Turi ta 29 anios ngà ngana, nekiddaw nikami ni Pam nga masserbi ta sirkito ta South Pacific Islands, nga tattangngallan na panga ta Fiji tatun nga tiempo. Kasali ta isla ira i American Samoa, Samoa, Kiribati, Nauru, Niue, Tokelau, Tonga, Tuvalu, anna Vanuatu.

Tatun ira nga tiempo, egga ira totolay ta arayyu ira nga isla nga passuspechadda i Saksi ira ni Jehova, yayya nga mawag tu magimmugug kami. (Mat. 10:16) Baraddi laman i kongregasion, anna egga i kongregasion ira nu sitaw awan tu paddianammi. Yayya nga nikiddomi ta lokal ira nga residente ta babario nu puede kami makipaddian nira.

Talaga ikavurungan anna interesadu kamu Brother Winston ta trabahu nga pangitransleyt. Ngatta kunnatun i matagenonu?

Tagga ta namegafu kami ngana nga masserbi ta isla nga nasion na Tonga, baddi laman nga tract anna bukleta i mala na wawwaragi ta lengguahe na Polynesia nga Tongan. Ta ministerio, usadda i English nga libru nga The Truth That Leads to Eternal Life tapenu mab-Bible study ta totolay. Yatutta durante na appa-ta-ligguan nga pagiskuela na elder ira, egga tallu nga Tongan nga elder ira, nga limitadu laman i English-da, i minanugu nga itransleyt ta Tongan i libru nga Truth. Nimakinilya ni Pam i manuskrito, anna nipatulugmi yatun ta panga ta United States tapenu meyimprenta. Maggi walu nga ligguan nige nabalin i interu proyekto. Maski nu ari kuruga makasta i niketransleyt natun, aru nga maguvovug tu Tongan i noffunan natun nga publikasion tapenu mannammuan i kinakurug. Ari kami nga transleytor ni Pam, ngem yatun nga ekspiriensa i namaginteres nikami ta transleysion.

Sister Pam, kunnasi nga neruma i pattolay ta isla ta pattolay ta Australia?

Daka-dakal i nerumanna! Depende nu sitaw i diammi, meparubakkami ta nilamu nga lugar, grabe nga patu anna basa (humid), binalakag, taka-taki anna, nu karuan, kurang nga makan. Ngem ta kabalin na kada aggaw, kekkasta i magibannag anna maningan ta bebay maggafu ta balemi nga fale​—agal ta Samoa para ta gagangay nga balay ta Polynesia nga don na niyug i atona anna awan tu libagna. Egga ira gabi nga kitennawag i  vulan yayya nga masingi-singammi i fun ira na palma. Gafu tatun ira nga makasta nga paddia-paddian, napaguyu kami nga monag nga mannono anna makimallo, nga nakoffun nikami tapenu manonomi i positibo imbes nga i negatibo.

Nagustuammi i abbarabbing, nga kitessaya anna mappabbaw ira nu makasingan tu furaw nga dayu nga gittami. Ta mittan nga pabbisitami ta Niue, egga abbing nga lalaki nga inaffuriana i lima ni Winston tapus kinagina, “Kakayà ku i duddu mu.” Arianna paga vuluvuga nakasingan tu zinuddu nga lima!

Ikakkallomi i totolay megafu ta poppobre ira anna kitezziga i paddia-paddiadda. Kakkasta i pallevuda ngem kurang i medikal nga fasilidad anna i danum nga menum. Ngem, ari kuruga mavurung i wawwaragi tam. Sanay ngana ira tatun. Magayayya ngana ira basta kavuluda i familiada, egga lugar nga paggarammammungadda nga maddayaw, anna egga i pribilehioda nga idayaw si Jehova. Nakoffun i ehemploda tapenu maffokus kami ta pinaka-importante nga trabahu anna mattalupaddian nga simple i pattolemi.

Nu mittan sister Pam, mawag tu siko lapa i mattagag tu danum anna mangiprepara tu makan ta dumu-duma nga paddia-paddian. Kunnasim nakua yatun?

Mappabalo ngà ta yamà megafu ta sinanaynà. Sinudduannà tu aru nga gannug nga makoffun, gitta na nu kunnasi i mappakaddul anna mallutu tatun anna nu kunnasi mattolay nga baddi laman i material nga ganna-gannug. Ta mittan nga pabbisitami ta Kiribati, naddiakkami ta tadday nga baddi nga balay nga nalaga-laga nga don na niyug i atona, egga suelona nga napadday ta koral, anna vulu i libagna ira. Tapenu makalutu ngà tu simple nga makan, makkokko ngà tu avvu ta davvun, anna mappakaddul ngà gukaban na upà na niyug. Tapenu makatagag tu danum, makifila ngà ta posu kavulu i babbay ira tatun nga bario. Tapenu makala tu danum, mangusa ira tu tadday nga kayu nga 2 metros nga konsu meppi nga galu ta tuppagna, nga gittana pamannue. Ngem imbes nga mangikabit tu bannue ta tuppag na galu, mangipay ira tu lata. Matturubba i kada babbay nga mangikabol ta lata anna alistu laman nga pagiddadda i lata tapenu mapannu tu danum. Abbo ku nu simple laman adde ta napuruebakku. Namippiga ngà nakkabol, ngem arianna lummag na lata! Naggaralo i ngamin, tapus tadday ta babbay i nabboluntariu nga tudduannà. Kitessippo i totolay anna minangnguffun ira.

Iniddunu parehu i asaymentnu ta isla ira. Mangistoria kamu bi tu espesial ira nga ekspiriensanu?

Winston: Nappasa paga i piga nga tiempo nigemi nagigiammu i karuan nga kostumbre. Angngariganna, nu mappakan i wawwaragi, maruddu nga iyarubadda nikami i ngamin nga makan nga egga nira. Ta ollu, ariammi ammu nga mawag tu mangivuna kami para nira. Yayya nga kinammi i ngamin nga netunnag nikami! Siempre tagga ta nammuammi i kurug nga situasion, nangivuna kami ngana tu makadda. Maski nu aru i kamalimi, makonsiderasion i wawwaragi. Kitessaya ira nga makasingan nikami ta kada annam nga vulan onu maturu paga nu bisitammi ira ta sirkito. Fuera paga ta lokal ira nga wawwaragi, sikami laman i tanakuan paga nga Saksi nga nakilalada.

Makasta gapa nga pamakurug ta lugarda ira i pabbisitami. Aru nga taga-diadda i magabbo nga i relihion na wawwaragi ay pinadda-paddayda laman. Ngem tagga ta egga i magatawa nga naggafu ta tanakuan nga nasion nga nabbisita ta wawwaragi, nammuan na taga-tari ira nga kurug nga relihion yaw anna nappabbaw ira.

Pam: Tadday ta kuruga ariakku makattaman ay nesimmu ta Kiribati, nu sitaw egga i tadday nga kongregasion nga balabaddi laman i bilang na wawwaragi. Siniguradu na tattadday nga elder nga si Itinikai Matera nga matangngallan i pakawagammi ira. Egga mittan nga inangngayan nakami nga konsu basket yayya nga egga i mayanna tu tattadday nga illug. “Para nikamu,” kunna. Tatun nga tiempo, espesial ngana nga regalu i tadday nga illug na manu. Yatun nga baddi ngem vuka-palag nga pangiyawa ay talaga nakatukkal ta futumi.

 Piga ragun ngana i nappasa sister Pam, narianakka. Anni i nakoffun nikaw tapenu maattamman yatun nga kapurueba?

Navussi ngà turi 1973 ta keggami ni Winston ta South Pacific. Naddesisiokkami nga manoli ta Australia, nu sitaw appa nga vulan i nappasa, narianan ngà. Afektadu gapa si Winston; beybina gapa yatun. Ta pappasa na tiempo, sisinu nga nawawan i taki ta futumi, ngem ari nga interamente nga nawawan yatun adde ta nabibbigmi i Abril 15, 2009, nga isyu na Ang Bantayan. Kunnaw i neyavu ta “Mga Tanong Mula sa mga Mambabasa”: “Bubuhayin kayang muli ang sanggol na namatay sa sinapupunan?” Nipasiguradu nikami natun nga artikulo nga si Jehova i maddisidi nu anni i kuanna anna kanayun nga kuanna nu anni i matunung. Alsanna noka i ngamin nga taki nga natagenomi megafu taw nga marake nga mundo durante nga meddu nga igiyana i Anana tapenu “daralan na i kukukuan ira na Demonio.” (1 Juan 3:8) Inuffunan nakami gapa na artikulo tapenu mas paga nga tagibaloran i mangina nga “perlas” nga egga nikami bilang totolay ni Jehova! Anni ngana laman i nesimmu nikami nu awan tu iddanama na Pappatulan?

Kabalin nga natay i beybimi, nanoli kami mangana ta ngamin-tiempo nga serbisiu. Piga vulan nga nasserbi kami ta Australia Bethel tapus nituloymi gabbalaman i pabbisita ta sirkito. Ta 1981, kabalin na appa nga ragun nga passerbi ta New South Wales anna ta Sydney, nembitakkami ta panga ta Australia, nu sitaw adde sangawe ay massesserbi kami.

Brother Winston, nakoffun kari i ekspiriensam ta South Pacific Islands ta trabahum bilang miembro na Branch Committee ta Australasia?

Wan, aru i neyuffunna. Ollu, nekiddaw ta Australia nga tangngallan i American Samoa anna i Samoa. Tapus, i panga ta New Zealand ay netadday ta Australia anna nabbalin tu Australasia. Sangawe, kasali ta teritorio na panga na Australasia i Australia, American Samoa anna i Samoa, the Cook Islands, New Zealand, Niue, Timor-Leste, Tokelau, anna i Tonga​—aru tatun ay pribilehiò nga binisita bilang representante na panga. Dakal i neyuffun na pakipattrabahù ta matalo nga wawwaragi tatun nga isla ira ta passerbì sangawe nira maggafu ta panga nga ofisina.

Bilang konklusion, mangurug kami ni Pam base ta personal nga ekspiriensami, ari laman tu adulto ira i magaleg ta Dios. Kayà gapa na abbarabbing yatun nga “perlas nga kuruga mangina”—maski nu awan tu interes na tanakuan nga kafamiliada. (2 Pat. 5:2, 3; 2 Cro. 34:1-3) Siguradu kami nga si Jehova ay meddu nga Dios nga kayàna nga i ngamin, parehu manakam onu abbing, ay mapeggan tu inango!

Tagga ta pinegafuanammi ni Pam nga alegan i Dios maturu tu 50 nga dagun i nappasa, ariammi nanono nu sitaw nakami iyangay natun nga pagaleg. Awan tu duda nga i kinakurug na Pappatulan ay tadday nga perlas nga kuruga mangina! Determinadu kami nga ari ibbattan yatun nga nabala-balor nga perlas gukaban na ngamin nga sikammi!