Ammum Kari?
Ta ollu nga siglo, kunnasi nga makapabbiahe i tolay gukaban na barku?
MARUDDU nga awan tu pampasaheru nga barku onu bapor ta kaggawan ni Pablo. Tapenu makapabbiahe, mawag nga iyavu na biaheru ta tanakuan nu egga i ammuda nga barku nga pangnegosio (pangkargamento) nga umay ta direksion nga pappangetanna anna maya nga mangitakay tu pasaheru. (King. 21:2, 3) Maski nu ari tu ta eksakto nga angngayanna i biahe na barku, nu maddung yatun ta nadduruma nga lugar durante ta pabbiahe, awayya mangana na biaheru nga magali tu tanakuan nga barku nga mangiyangay nisa aranni ta destinasionna.—King. 27:1-6.
Maruddu nga egga laman i tiempo na pabbiahe ta bebay, anna awan tu eksakto nga oras na biahe. Ari laman nga italattan na bugador ira i biahe megafu ta marake nga tiempo, nu ari, maski ta rehiya. Angngariganna, nu egga i marake nga seniales nga nasingadda, gitta na gayang nga makkurukku ta gagalu na barku, onu nu makasingan ira tu barku nga nadaral ta pipi na bebay. Approbetsan na bugador ira i makasta nga paddag, yari tu nu fustu i direksion na paddag, manaw ngana ira ta addungan. Nu nakaleg i mabbiahe tu barku nga mangitakay nisa, umay ngana yayya ta addungan na barku anna akkatanna ngana i bagahena tapus innagganna i anunsio sonu aranni ngana nga manaw i barku.
Kagian na historiador nga si Lionel Casson nga ta siudad na Roma, alistu laman para ta biaheru ira nga magaleg tu barku nga pattakayan yari tu ariadda ngana mawag nga magaleg tu pattakayadda. “I addunganna ay egga ta tuppag na Tiber River. Ta ili na Ostia, egga i aranni nga dakal nga parke nga napalevutan na ofisina ira. Aru taw nga ofisina ay ofisina na kompania ira na barku na nadduruma nga addungan: tadday tatun ay i kompania ira na barku ta Narbonne [France ta maddaggun], ta Carthage [Tunisia ta maddaggun], . . . anna karuan paga. I maski sinni nga magaleg tu barku nga pattakayan ay mawagna laman nga umay ta ofisina na maski anni nga siudad nga matalebaran ta angngayanna.”
Makamenos tu oras i pabbiahe ta bebay, ngem egga gapa i peligrona ira. Namippiga nga naekspiriensa ni Pablo i madaralan tu barku ta pammisionerona ira.—2 Cor. 11:25.
