1-2. Ngatta madaddammo i gakaw ni Jesus?

TA ULTIMU nga aggaw nige matay ni Jesus, madaddammo i gakona. Arannina ngana maekspiriensa i mataka-taki nga kapatay ta minattagaruli nga totolay. Ngem ari laman i aranni nga kapatena i ikavurungan ni Jesus. Iddedduna i Yamana anna kayàna nga mapagayayya yayya. Ammu ni Jesus nga nu mattalupaddian yayya nga matalo tatun nga kapurueba, makoffun yayya ta pangidefensa ta ngagan ni Jehova. Iddeddu gapa ni Jesus i totolay, anna ammuna nga nakadepende ta pattalupaddianna nga matalo adde ta patay i tiansa tam para ta mannanayun nga inango.

² Maski paga grabe i vuru-vurung ni Jesus, memammo lagapa i panagenona. Kinagina ta disipulosna: “I imammo nga maggafu niakan i iyawa ku nikamu.” (Juan 14:27) Egga nisa i ‘imammo na Dios,’ i pabbalin tu kalmadu megafu ta nabalor nga relasion na tadday kani Jehova. Yatun i nakoffun kani Jesus tapenu memammo i nono anna futuna.​—Fil. 4:6, 7.

3. Anni i gigiammuattam taw nga artikulo?

³ Awan nittam i makaekspiriensa ta ziga nga inattamman ni Jesus, ngem ngamin nga tumuttul tannisa ay meparubang ta problema ira. (Mat. 16:24, 25; Juan 15:20) Kagitta gapa ni Jesus, madaddammo i panageno tam nu mittan. Anni i makua tam tapenu kattam kuruga mavurung anna ari mawawan i imammo tam? Gigiammuattam i tallu nga gannug nga kingngua ni Jesus durante na ministeriona taw ta davvun anna innattam nu kunnasi tam yayya maparigan nu mapurueban ittam.

4. Base ta 1 Tesalonica 5:17, mangiyawa tu angngarigan nga mangipasingan nga namippiga nga nakimallo si Jesus ta ultimu nga aggaw na pattolena ta davvun.

⁴ Bibbigan i 1 Tesalonica 5:17. Mamippiga nga nakimallo si  Jesus ta ultimu nga aggona taw ta davvun. Turi ta nipasinganna ta disipulosna nu kunnasi daddamman i patena, nipakimallona i pan anna i binarayang. (1 Cor. 11:23-25) Nigena nanaw ta lugar nu sitaw nesimmu i Paskua, nakimallo yayya kavulu i disipulosna. (Juan 17:1-26) Ta paddattalna anna na disipulosna ta Vukig na Olibo tatun nga gabi, namippiga yayya nga nakimallo. (Mat. 26:36-39, 42, 44) Anna i ultimu nga kinagi ni Jesus nigena natay ay ta forma na pakimallo. (Luc. 23:46) Nipakimallo ni Jesus kani Jehova i ngamin nga nesimmu ta ultimu nga aggaw na pattolena.

5. Ngatta nakkafi i nono na apostoles?

⁵ Tadday nga rason nu ngatta nakapagattam si Jesus ta kapuruebana ira ay megafu ta nattalo yayya ta Yamana gukaban na pakimallo. Ngem imbes nga agga-sifu anna ari magimmang makimallo i apostoles, nekatrugan ira tatun nga gabi. Megafu tatun, nakkafi i nonoda turi ta egga i zimittal nga kapurueba. (Mat. 26:40, 41, 43, 45, 56) Nu meparubang ittam ta problema ira, makapattalupaddiattam laman nga matalo nu parigattam i ehemplo ni Jesus anna “maddasal” kanayun. Anni i ipakimallo tam?

6. Kunnasi makoffun i pangurug tapenu mattalupaddian nga memammo?

⁶ Awayya tam ipakimallo kani Jehova nga ‘pasikannanna i angngurug’ tam. (Luc. 17:5; Juan 14:1) Kawagattam i pangurug gafu ta magga purueban ni Satanas i ngamin nga tumuttul kani Jesus. (Luc. 22:31) Kunnasi ittam moffunan na pangurug tapenu mattalupaddian nga memammo maski nu napporotung i problema tam? Nu kingngua tam ngana i ngamin tapenu solban i tadday nga problema, uffunan ittam na pangurug tam kani Jehova  nga ari ngana nga mavurung megafu ta ammu tam nga Yayya i mangiyawa tu kapianan nga solusion ta mepangngo nga tiempo. Megafu ta mattalo ittam nga ammuna i mawag nga makua, memammo i nono anna futu tam.​—1 Ped. 5:6, 7.

7. Anni i nagigiammum ta kinagi ni Robert?

⁷ Uffunan ittam na pakimallo tapenu mapattalupaddiattam i memammo nga panageno maski nu anni paga i problema. Innan i ekspiriensa ni Robert, matalo nga elder nga maturu ngana tu 80 i dagunna. Kinagina: “I tabarang ta Filipos 4:6, 7 i nakoffun nio tapenu malampasakku i aru nga kapurueba ta pattolè. Egga i tiempo nga namroblema ngà ta kuartu anna temporario nga nawawakku i pribilehiò ta pakka-elder.” Anni i nakoffun kani Robert tapenu mapattalupaddianna i memammo nga panageno? “Insigida ngà makimallo kada mavurung ngà,” kunna. “Mangurug ngà nga nu mas kanayun ngà makimallo anna mas napafutuan yatun, mas makkalma ngà.”

8. Segun ta Juan 8:29, anni paga i tadday nga rason nu ngatta memammo i panageno ni Jesus?

⁸ Bibbigan i Juan 8:29. Maski nu mapeppersigi si Jesus, memammo i panagenona megafu ta ammuna nga mapagayayyana i Yamana ta matalo nga pagattamna. Nattuppal yayya, maski nu mariga nga kuan yatun. Iddedduna i Yamana nga si Jehova anna i passerbi sa i pinaka-importante ta pattolena. Nigena minay ta davvun, yayya i “malalaki nga trabahador” na Dios. (Prov. 8:30). Ta keggana ta davvun, matalikarag nga sinudduanna i  tanakuan meyannung ta Yamana. (Mat. 6:9; Juan 5:17) Yatun nga trabahu i kuruga namagayayya kani Jesus.​—Juan 4:34-36.

9. Ngatta memammo i panageno tam nu okupadu ittam ta ministerio?

⁹ Maparigattam si Jesus gukaban na kanayun nga pattuppal kani Jehova anna nu ‘mallallappo ittam nga kanayun ta trabahu tam nga masserbi ta Yafu.’ (1 Cor. 15:58) Nu ‘ipay tam i ngamin nga tiempo’ ta pallayyagayya, mas positibo i pagimamma tam ta problema tam ira. (King. 18:5) Angngariganna, maruddu nga mas grabe anne nittam i problema danuri masimmuattam ta ministerio. Ngem, nu magigiammuda nga ayatan si Jehova anna iyaplika i tabaranna, makkasta i pattoleda anna mas magayayya ira. Kada masingattam nga mesimmu yatun, mas makasiguradu ittam nga ikavurungan ittam ni Jehova. Anna yatun nga pangurug i makoffun nittam tapenu mapattalupaddiattam i imammo tam. Napakurug yatun na tadday nga sister nga inattattammanna ta interu pattolena i pakatageno tu kawan tu serbi anna i depresion. “Nu okupadu ngà ta ministerio,” kunna, “mas makontrol ku i emosiokku anna mas magayayya ngà. Gafu siguru yatun ta nu egga ngà ta ministerio, matageno ku nga araranni ngà kani Jehova.”

10. Anni i nagigiammum ta komento ni sister Brenda?

¹⁰ Ikonsidera i ekspiriensa ni sister Brenda. Egga i grabe nga takida dua na anana nga babay nga multiple sclerosis. Ari nga makalakag si Brenda anna mawagna i wheelchair tapenu makali gafu ta makafi yayya. Mamala-balay laman yayya nu mawayyana, ngem maruddu nga mallayyagayya gukaban na tura. Kinagina: “Kustu naakseptà ngana ta nono anna ta futù nga ari ngana moruan i taki ku taw nga sistema, mas nakapaffokus ngà tu mapia ta ministerio. Kakuruganna, nu mallayyagayya ngà, malsa ta nono ku i pakavurungakku ira. Makapaffokus ngà lallagu ta panguffun turi ira ta naka-uvovug ku ta teritoriami. Nu mallayyagayya ngà, mepanono niakan i iddanama ta mappange.”

11-13. (a) Anni i kingngua na apostoles anna na tanakuan nga mangipasingan tu kurug ira nga kofun ni Jesus? (b) Anni i natageno ni Jesus ta kokkofunna?

¹¹ Ta interu tiempo nga nallayyagayya si Jesus, napakurug na matalo nga apostoles nga kurug ira nga kofun ni Jesus. Ira i fermi nga mamakurug ta kinagi na proverbio: “Egga i kofun nga mas madukko anne ta wagi.” (Prov. 18:24) Tagibaloran ni Jesus i kuddanatun nga kokkofun. Ta ministeriona, ari mangurug nisa i maski sinni ta wawwaragina. (Juan 7:3-5) Mittan, abbo paga lagu na parientesna nga nammaguyung ngana yayya. (Mar. 3:21) Ngem kunnaw gapa i makagi ni Jesus ta apostolesna megafu ta kurug nga kokkofunna ira: “Nakitappaddiak-kamu niakan ta ngamin nga nipazziga-riga ku.”​—Luc. 22:28.

¹² Sinaggi-mittan nga dismayan na apostoles si Jesus, ngem ari yayya naffokus ta pakkurangadda, nu ari, nirekunnisina i pangurugda nisa. (Mat. 26:40; Mar. 10:13, 14; Juan 6:66-69) Ta ultimu nga gabi nga kavulu ira ni Jesus nige na kapatena, kinagina taw ira nga matalo nga lallaki: “Kakkofun ngana i pagagal ku nikamu, ta ngamin i naginnà ta Yamà ay nipakannammù nikamu.” (Juan 15:15) Siguradu nga napasikan i nono ni Jesus megafu ta pamagaram na kokkofunna. Namagayayya kani Jesus i uffun nisa na apostoles ta ministerio.​—Luc. 10:17, 21.

¹³ Fuera paga ta apostoles, egga paga i tanakuan nga kokkofun ni Jesus nga lallaki anna babbay nga nanguffun nisa ta praktikal ira  nga gannug durante na ministeriona. Pinaduloda yayya ta gibbalayadda tapenu makipakkan. (Luc. 10:38-42; Juan 12:1, 2) Vinulu na karuan ta pabbiahe si Jesus anna nibilleda nisa nu anni i egga nira. (Luc. 8:3) Egga ira i kofun ni Jesus nga manguffun nisa megafu ta ammuda nga uffunanna gapa ira. Egga ira i niyuffunna nira anna rasonable yayya ta ekspektasionna nira. Perfekto si Jesus, ngem inappresiana i suporta nisa na imperfekto nga kokkofunna. Yayya nga makasiguradu ittam nga nakoffun ira tapenu mapattalupaddianna i imammona.

14-15. Kunnasi ittam makaleg tu mapia nga kokkofun, anna kunnasida ittam moffunan?

¹⁴ I kurug nga kokkofun ay uffunadda ittam nga mattalupaddian nga matalo kani Jehova. I kakastan nga makua tam tapenu makaleg tu mapia nga kofun ay i pabbalin tu mapia nga kofun. (Mat. 7:12) Angngariganna, ipagaram na Biblia nittam nga usattam i tiempo anna i sikattam tapenu uffunan i tanakuan, netallugaring ta “mariga ira” onu egga pakawagadda. (Efe. 4:28) Egga kari i manono mu nga kakongregasiommu nga moffunammu? Awayyam kari igatangan tu pakawagan i wagi nga ari makalawang ta baleda megafu ta edad onu ta taki? Makeyawa ka kari tu makan ta tadday nga familia nga mapproblema ta kuartu? Nu ammum nga usan i website nga jw.org^® anna i JW Library^® application, moffunammu kari i tanakuan ta kongregasionnu tapenu meyusada danatun? Nu okupadu ittam ta panguffun ta tanakuan, siguradu nga magayayya ittam.​—King. 20:35.

¹⁵ Suportan ittam na kokkofuttam nu egga i problema tam ira anna uffunadda ittam nga mapattalupaddian i imammo tam. Kagitta na pinagginna ni Elihu kani Job turi ikagina  i problemana ira, uffunan ittam na kokkofuttam gukaban na mapasensia nga pagginna nu iyistoria tam i mataga-tageno tam. (Job 32:4) Kattam ekspektan nga kofuttam i maddesision para nittam, ngem kinasirib nu ginnattam i nebase-Biblia nga tabaradda. (Prov. 15:22) Nu kunnasi nga sigga-pakalinno nga inaksepta ni Patul David i uffun na kokkofunna, sigga-pakalinno nakuan gapa nga alawatattam i uffun na kokkofuttam nu kawagattam. (2 Sam. 17:27-29) Wan, regalu naggafu kani Jehova i kuddanatun nga mapia nga kokkofun.​—Sant. 1:17.

16. Segun ta Filipos 4:6, 7, kunnasi tam laman nga makalawa tu imammo? Ipakanawag.

¹⁶ Bibbigan i Filipos 4:6, 7, NW. Ngatta kagian ni Jehova nga makalawa ittam tu imammo “gukaban ni Cristo Jesus”? Megafu ta mabbayag laman i imammo ta nono anna futu tam nu malippawa anna mangurug ittam ta papel ni Jesus ta gakkag ni Jehova. Angngariganna, gukaban na sakrifisio nga tavvu ni Jesus, mapakoma i ngamin nga liwi-liwa tam. (1 Juan 2:12) Mamanna-bannay yatun nittam! Bilang Patul ta Pappatulan na Dios, pakappian noka ni Jesus i maski anni nga ziga tam nga efekto na kingngua ni Satanas anna na sistemana. (Isa. 65:17; 1 Juan 3:8; Nep. 21:3, 4) Mamaggiddanama yatun nittam! Anna maski nu mariga i nepa-annung ni Jesus nittam, egga yayya nittam, nga suportanna ittam ta pangurianan ira nga aggaw naw nga sistema. (Mat. 28:19, 20) Mamaggutu yatun nittam! Kuruga kawagattam i banna-bannay, iddanama, anna gutu tapenu mapeggan tu memammo nga panageno.

17. (a) Kunnasi nga mapattalupaddian na tadday nga Cristiano i memammo nga panageno? (b) Gitta na nepromesa ta Juan 16:33, anni i makua tam?

¹⁷ Kunnasim gafu mapattalupaddian i memammo nga nono nu matavvunakka tu grabe ira nga problema? Makuam yatun gukaban na pamarig ta kikkingngua ni Jesus. Ollu, makimallo ka anna ariammu magimmang nga makimallo maski nu anni i mesimmu. Mekadua, mattuppal ka kani Jehova anna matalikarag nga mallayyagayya maski nu mariga nga kuan yatun. Anna mekatallu, mappoffukka ta kokkofummu tapenu marubang i kapurueba ira. Nu kunnatun, guardian na imammo na Dios i nono anna i futum. Kagitta gapa ni Jesus, maffu mu i maski anni nga kapurueba.​—Bibbigan i Juan 16:33.