1. Kagitta na iyesplika na Efeso 6:10-13, anni i tadday ta meddu nga pangikavurung ni Jehova nittam? Ipakanawag.

TADDAY ta meddu nga pangikavurung ni Jehova nittam bilang aripanna ay i panguffunna nittam tapenu labanan i kalabattam ira. Si Satanas tuange ta demoniona ira i primeru nga kalabattam. Inabisowan ittam ni Jehova taw ira nga kalaban, anna iyayawana i mawag tam tapenu labanan ira. (Bibbigan i Efeso 6:10-13.) Nu alawatattam i uffun ni Jehova anna buu i pattalo tam sa, mavviktoria ittam ta pakillaban ta Diablo. Makapakkomfiansa ittam nga kagitta ni apostol Pablo. Niturana: “Nu i Dios i kavulu tam, sinni paga i makawayya mangontra nittam?”​—Roma 8:31.

2. Anni i ikonsidera tam taw nga artikulo?

² Bilang kurug nga Cristiano, ariattam kuruga iddan tu atension si Satanas tuange ta demoniona ira. Maffokus ittam nakuan ta paggigiammu meyannung kani Jehova anna ta passerbi sa. (Sal. 25:5) Ngem mawag nga ammuattam i meyannung ta kukukuan ni Satanas. Ngatta? Tapenu arianna ittam nga melogo. (2 Cor. 2:11) Taw nga artikulo, ikonsidera tam i primeru nga usan ni Satanas anna na demonio ira tapenu ilogo i totolay. Ikonsidera tam paga nu kunnasi makapavviktoria kontra nira.

3-4. (a) Anni i espiritismo? (b) Kunnasi i karu na mangurug ta espiritismo?

³ I primeru nga usu-usan ni Satanas tuange ta demonio ira tapenu ilogo i totolay ay i espiritismo. Kakkagian danuri magaggangngua tu espiritismo nga ammuda onu kontroladuda i gannug ira nga gagangay nga ari ammu onu makontrol na totolay. Angngariganna, kagian na karuan nga mammuadda i mappange gukaban na pallavvun onu astrolohiya. Palawanan gapa na karuan nga kikkibbidadda kanu danuri natay. Mattamay  onu massalamangka i karuan anna anna-annungadda i tanakuan. *

⁴ Kunnasi i karu na mangurug ta pakapangngua na espiritismo? Segun ta survey nga nekondukta ta 18 nga nasion ta Latin America anna ta Caribbean, nammuan nga tadday ta kada tallu nga totolay i mangurug ta salamangka anna ta pattamay, anna kunnatun gapa i karu na mangurug nga posible i pakikomunika ta espiritu ira. Egga paga i survey nga nekondukta ta 18 nga nasion ta Africa. Segun tatun, maturu tu gaddua i nakkagi nga mangurug ira ta pattamay. Siempre, maski sitaw i paddianattam, mawag tu kanayuttam protektan i baggi tam ta espiritismo. Kakuruganna, puru-purueban ni Satanas nga ilogo i interu nga “tanga-ravvunan.”​—Nep. 12:9.

5. Anni i matageno ni Jehova meyannung ta espiritismo?

⁵ Si Jehova ay “Dios na kinakurug.” (Sal. 31:5, NW) Yayya nga anni gafu i matagenona ta espiritismo? Ikalussona yatun! Kinagi ni Jehova ta Israelita ira: “Awan nakuan tu malegan nikamu tu maski sinni nga mappadalan ta anana nga lalaki onu anana nga babay ta afi, i maski sinni nga mallavvun, i maski sinni nga massalamangka, i maski sinni nga magaleg tu senial, mannamay, i maski sinni nga manganna-annung ta tanakuan, i maski sinni nga makkonsulta ta espiritista onu ta minallavvun, onu i maski sinni nga makiyuvovug ta natay. Ta ikalussaw ni Jehova i sinni laman nga magangngua taw ira nga gannug.” (Deut. 18:10-12) I Cristiano ira ay ari ngana nga sakup na Dob nga niyawa ni Jehova ta Israelita ira. Ngem, ammu tam nga ari manguli i mataga-tageno ni Jehova meyannung ta espiritismo.​—Mal. 3:6.

6. (a) Kunnasi usu-usan ni Satanas i espiritismo tapenu perwisiuwan i totolay? (b) Segun ta Eclesiastes 9:5, anni i kinakurug meyannung ta kondision na natay?

⁶ Inabisowan ittam ni Jehova kontra ta espiritismo megafu ta ammuna nga usu-usan yatun ni Satanas tapenu perwisiuwan i totolay. Usu-usan ni Satanas i espiritismo tapenu metuddu i kinaladdug ira​—nelagum ngana i kinaladdug nga sigga-matolay ta tanakuan nga lugar danuri natay. (Bibbigan i Eclesiastes 9:5.) Usu-usan paga ni Satanas i espiritismo tapenu ananassingan i totolay anna pallikuradda si Jehova. Gakkagna nga danuri makiparte ta espiritismo ay mattalo ta marake ira nga espiritu imbes nga kani Jehova.

7. Anni i kakkagian ni Jehova nittam?

⁷ Gitta na nakagi ta gafu, kakkagian ni Jehova nittam i mawag tam mammuan tapenu ari ittam melogo ni Satanas anna na demonio ira. Ikonsidera i karuan nga praktikal nga makua tam tapenu labanan si Satanas tuange ta demoniona ira.

8. (a) Anni i importante nga kuattam tapenu malabanan i marake ira nga espiritu? (b) Kunnasi nga palawanan na Salmo 146:4 i kinaladdug ni Satanas meyannung ta patay?

⁸ Bibbigan i Uvovug na Dios anna monag nga pannonopan yatun. Importante yaw tapenu malabanan i kinaladdug ira megafu ta marake ira nga espiritu. I Uvovug na Dios ay gittana mataram nga espada nga kayana nga taffutan i kinaladdug ira nga ipagaram ni Satanas tapenu melawan danatun. (Efe. 6:17) Angngariganna, palawanan na Uvovug na  Dios nga kinaladdug i pangurug nga puede paga makikomunika i natay ta sigga-matolay ira. (Bibbigan i Salmo 146:4.) Iperaddamna gapa nittam nga si Jehova laman i mapattalakkan nga makekagi ta mappange. (Isa. 45:21; 46:10) Nu kanayuttam bibbigan i Uvovug na Dios anna monag nga pannonopan yatun, preparadu ittam nga lillitan anna ikalussaw i kinaladdug nga kayà na marake ira nga espiritu nga kurugattam.

9. Anni ira nga annangngua nga konektadu ta espiritismo i mawag tam nga lisian?

⁹ Panakitan i maski anni nga konektadu ta espiritismo. Megafu ta kurug ittam nga Cristiano, ariattam vuluvuga magangngua tu maski anni nga klase na espiritismo. Angngariganna, ariattam umay ta espiritista onu purueban nga makikomunika ta natay gukaban na karuan nga metodo. Gitta na nagigiammu tam ta nappasa nga artikulo, lisiattam i kostumbre ira ta tarag anna tanam nga nebase ta pangurug nga sigga-matolay paga ta tanakuan nga lugar i natay ira. Ariattam gapa mangusa tu astrolohiya onu pallavvun tapenu ammuan i mappange. (Isa. 8:19) Ammu tam nga kuruga delikadu danatun nga annangngua anna gafu tatun ira, mapeggattam tu direkta nga komunikasion kani Satanas anna ta demonio ira.

10-11. (a) Anni i kingngua na karuan ta ollu siglo turi ta nammuadda i kinakurug? (b) Segun ta 1 Corinto 10:21, ngatta parigattam i ehemplo na ollu-siglo ira nga Cristiano, anna kunnasi tam makua yatun?

¹⁰ Itabbo danuri gannug nga konektadu ta okulto anna espiritismo. Karuan nga maddian ta Efeso ta ollu-siglo ay makipapparte ta espiritismo. Turi ta nagigiammuda i kinakurug, daka-dakal nga panguli i kingnguada. “Napakaru turi ta salamangkeru ira i nangiyangay ta libru da ira ay pinattaradday da ira anna sinuggi da.” (King. 19:19) Kingnguada i adde na mawayyada tapenu labanan i marake ira nga espiritu. Mangini-ngina i libruda ira meyannung ta salamangka. Ngem imbes nga iyawada onu ilakuda, zinaralda danatun nga libru. Mas kayàda nga pagayayyatan si Jehova anne ta sayangadda i balor na libruda ira.

 ¹¹ Kunnasi tam maparigan i ehemplo danuri ollu-siglo nga Cristiano? Makasta gafu nu itabbo onu daralan i ngamin nga egga nittam nga konektadu ta okulto. Kasali taw i anting-anting, pampasuerte, onu tanakuan nga gannug nga iyusa onu kukua mismu na totolay tapenu protektan i baggida ta marake ira nga espiritu.​—Bibbigan i 1 Corinto 10:21.

12. Anni ira i iyavu tam ta baggi tam meyannung ta dibersiottam?

¹² Usitakkan tu mapia i dibersiommu. Iyavu ta baggim: ‘Mabbibbibbig ngà kari tu libru, magazina, onu artikulo ira ta Internet meyannung ta okulto? Kunnasi gapa i musika nga gigginnakku, pelikula anna pagiraw ta telebision nga gigirawakku, onu video games nga gaya-gayamakku? Nakivuan kari tu espiritismo i dibersiokku? Egga kari i vampira, zombie, onu misterioso ira nga gannug tatun? Palawanan kari natun nga awan tu dake na salamangka, panganna-annung, onu pangisumpa?’ Siempre, ari tu ngamin nga dibersion nga mangipasingan tu pinadda-padday nga istoria ay konektadu ta espiritismo. Nu usitakkan i dibersion, determinadu ka nakuan nga pilian danuri makoffun nikaw nga arayyuan i maski anni nga ikalussaw ni Jehova. Kayà tam kuan i mawayya tam ‘tapenu marenu i konsensia’ tam ta arubang na Dios tam.​—King. 24:16. *

13. Anni nakuan i ibita tam?

¹³ Ibita i pangistoria meyannung ta demonio ira. Taw nga gannug, parigattam nakuan i ehemplo ni Jesus. (1 Ped. 2:21) Nigena minay ta davvun, nattolay si Jesus ta langi, anna aru i ammuna meyannung kani Satanas anna ta demonio ira. Ngem arianna istorian i meyannung ta kingngua na marake ira nga espiritu. Kayà ni Jesus nga maffokus kani Jehova, ari tu kani Satanas. Maparigattam si Jesus nu  ariattam mangiwara tu istoria meyannung ta demonio ira. Imbes tu kunna, masingan nakuan nga “makakkasta nga uvovug ira i luttuag ta nono” tam, yatun ay i kinakurug.​—Sal. 45:1.

14-15. (a) Ngatta ariattam nakuan maganassing ta marake ira nga espiritu? (b) Anni ira nga ebidensia i masingattam nga protektan ni Jehova i totolena?

¹⁴ Ari maganassing ta marake ira nga espiritu. Ta mundo ta maddaggun, awayyana nga egga i marake nga mesimmu nittam. Awayyana nga gavva ittam maaksidente, mattaki, onu matay. Ngem ariattam nakuan kanayun ipaliwa danatun ta ari masingan ira nga espiritu. Kagian na Biblia nga puede nga meparubang i maski sinni ta “tiempo anna ari ekspektan nga mesimmu.” (Ecl. 9:11) Nu meyannung ta demonio ira, nipasingan ni Jehova nga mas makapangngua yayya anne nira. Angngariganna, ari nipamavulun na Dios nga patayan ni Satanas si Job. (Job 2:6) Ta tiempo ni Moises, nipasingan ni Jehova nga mas makapangngua yayya anne ta massalamangka nga papari ta Ehipto. (Ex. 8:18; 9:11) Gukaban na pakapangngua ni Jehova, nipasingan na naglorian nga si Jesus nga mas makapangngua yayya anne kani Satanas anna ta demonio ira turi ta nitabbona ira ta davvun. Arannina ngana nga itabbo ira ta avvu nga ari matuku-tukug i karalamna, nu sitaw ariadda ngana maperwisiu i maski sinni.​—Nep. 12:9; 20:2, 3.

¹⁵ Aru nga ebidensia i masingattam nga protektan ni Jehova i totolena ta maddaggun. Nonopan yaw: Ilayyagayya anna ituttuddu tam i kinakurug ta interu mundo. (Mat. 28:19, 20) Megafu tatun, ipaka-pakannammu tam i marake ira nga trabahu na Diablo. Nu mawayya laman ni Satanas, magga pagimmanganna ittam, ngem arianna mawayya. Yari tu ariattam ikassing i marake ira nga espiritu. Ammu tam nga “i mata ni Jehova ay malliligo ta interu davvun tapenu ipasingan i sikanna para ta buu i futuda nga masserbi sa.” (2 Cro. 16:9) Nu matalo ittam kani Jehova, ari ittam permanente nga maperwisiu na demonio ira.

16-17. Mangistoria tu ekspiriensa nga mawag i gutu tapenu labanan i marake ira nga espiritu.

¹⁶ Mawag i gutu tapenu labanan i marake ira nga espiritu, mas ngana nu kontran ittam  na kafamilia onu parientes megafu ta abboda nga egga i marake nga mesimmu nittam nu ariattam mevulu nira. Ngem bendisionan ni Jehova danuri mangipasingan tu kunnatun nga gutu. Ikonsidera i ekspiriensa ni sister Erica, nga taga-Ghana. Bente uno anios si Erica turi ta inalawana i paggigiammu tu Biblia. Megafu ta pari nga massalamangka i yamana, mekiddaw nisa nga kuanna i tadday nga espiritistiko nga kostumbre nga nelavu tatun i pakkakan tu karne nga netunnag na yamana ta ritual para ta natay ira nga ginafuadda. Turi ta nammanaki si Erica, nikonsidera yatun na familiana nga insulto ta natay ira nga ginafuadda. Kurugan na familiana nga kastiguan ira na natay ira nga ginafuadda gukaban na pangirattal nira tu diferensia ta uto anna ta pisikal.

¹⁷ Pinilit na familia ni Erica nga ipakua nisa i kostumbre, ngem nammanaki yayya, maski paga mawag tu panawanna i baleda. Pinaddian yayya na karuan nga Saksi ta baleda. Gittana binendisionan ni Jehova si Erica tu bagu nga familia—kapangngurug nga nabbalin tu wawwaragi nisa. (Mar. 10:29, 30) Maski paga nilikuran yayya na parientesna ira anna sinuggida paga i gamitna ira, nattalupaddian lagapa nga matalo kani Jehova si Erica, nabawtisowan, anna regular payunir ngana. Ari yayya naganassing ta demonio ira. Meyannung ta familia ni Erica, kunna, “Kada aggò nga ipakimallo nga maekspiriensada gapa nakuan i bendision nga makannammuan si Jehova anna i kapeggan tu kapalubbang megafu ta passerbi ta meddu nga Dios tam.”

18. Anni ira nga bendision i malawà tam ta pattalo kani Jehova?

¹⁸ Ari tu kunnatun kagrabe i kapurueba na pangurug tam ngamin. Ngem, mawag tam ngamin nga labanan i marake ira nga espiritu anna mattalo kani Jehova. Nu kuattam yatun, aru nga bendision i malawà tam anna malisiattam nga melogo na kinaladdug ni Satanas. Ariattam gapa nga ipamavulun nga pagimmangan ittam na assing ta demonio ira ta passerbi kani Jehova. Pinaka-importante, mas maddukko i pakikkofuttam kani Jehova. “Tumulu kamu ta Dios,” nitura na disipulo nga si Santiago, ngem “tubangan [onu, kontran] nu i Demonio, ay arayyuan nakamu. Umaranni kamu ta Dios, ay umaranni yaya nikamu.”​—Sant. 4:7, 8.