1. Istoriammu i nesimmu ta ollu nga milagro ni Jesus.

 IMAJINAMMU i nesimmu ta ultimu na 29 C.E. Kapepegafu pagalaman na ministerio ni Jesus. Naimbitan si Jesus, i yena na nga si Maria, anna i karuan nga disipulos na ta boda ta Cana, tadday nga ili ta sigiran na Nazaret nga naddakallan ni Jesus. Kofun ni Maria i nabboda anna posible nga nanguffun yayya tapenu maasikasu i bisita ira. Turi ta maddaggun nga kuman i bisita ira ta kasal, gavva nga nofutan tu binarayang. Baka mas aru gare i bisita nga minay anne ta inekspekta na makabboda. Posible nga mepasiranan tatun i familia anna i bagu nga magatawa. b Insigida nga inarannian ni Maria i ana na tapus kinagi na: “Nofutan ngana ira tu binarayang.” (Juan 2:1-3) Anni i kingngua ni Jesus? Nammilagro yayya. Pinabbalin na i danum tu “kapianan nga binarayang.”​—Juan 2:9, 10.

2-3. (a) Anni ira i milagro ni Jesus? (b) Anni i meyuffun na ta nittam nu paguruvovugattam i milagro ira ni Jesus?

² Aru paga i milagro nga kingngua ni Jesus ta pinamministerio na. c Nammilagro yayya tapenu uffunan i rinivu nga totolay. Angngarigan na, egga i dua tu milagro na nu sitaw pinakan na i 5,000 nga lallaki tapus tari gapa ta tadday ay 4,000 nga lallaki. Posible nga maturu tu 27,000 i ngamin nga pinakan na nu ilavu tam i babbay anna abbarabbing. (Mat. 14:15-21; 15:32-38) Tatun ira nga tiempo, aru gapa nga mataki i pinammapia ni Jesus. (Mat. 14:14; 15:30, 31) Siguradu nga  nappabbaw i napakaru nga totolay nga milagro nga pinammapia anna pinakan ni Jesus!

³ Aru i magigiammu tam ta milagro ira ni Jesus. Taw nga artikulo, paguruvovugattam nu kunnasi mapasikan i pangurug tam tatun ira. Tapus gigiammuattam nu kunnasi tam nga maparigan i kinapakalinno anna pangikallo nga nipasingan ni Jesus kada mammilagro yayya.

4. Nu gigiammuattam i milagro ira ni Jesus, sinni i mas makilala tam?

⁴ Magigiammu tam ta milagro ira ni Jesus ari laman i meyannung ta nisa, nu ari, i meyannung gapa ta Yama na. Si Jehova gare i Naggafuan na milagro ira. Kinagi na Kingngua 10:38: “Inaluvuan na Dios [si Jesus] ta Espiritu Santo anna pakapangngua. Ay megafu ta egga sa i Dios, minay ta ngamin nga lugar anna nangngua ta mapia anna pinammapia na ngamin i sinallungan na Demonio.” Daddamman gapa nga perfekto nga naparigan ni Jesus i appana-panono anna mataga-tageno na Yama na ta ngamin nga kinakkagi anna kinikkingngua na, nelavu tatun i milagro na ira. (Juan 14:9) Egga i tallu nga magigiammu tam ta milagro ira ni Jesus.

5. Anni i namaguyu kani Jesus nga mammilagro? (Mateo 20:30-34)

⁵ Ollu, kuruga iddeddukan ittam ni Jesus anna na Yama na. Ta kegga ni Jesus ta davvun, nipasingan na i dakal nga pangaya na ta totolay. Kunnasi? Nammilagro yayya tapenu uffunan danuri mazziga-riga. Mittan, nakkukkulle i dua nga vuling nga lalaki tapenu mappoffun ta nisa. (Bibbigan i Mateo 20:30-34.) Sifutan nga “ziminatu i allo” ni Jesus ta nira, tapus pinammapia na ira. I Griego nga verb nga netransleyt tu “ziminatu i allo” ay tumukoy ta grabe nga pangikallo nga matageno ta kononaggan na baggi. Masingan tatun nga grabe nga pangikallo ni Jesus i pangaya na ta totolay. Megafu tatun, napaguyu gapa yayya nga pakanan i mabisin anna pammapian i mallepproso. (Mat. 15:32; Mar. 1:41) Makasiguradu ittam nga ayatan ittam na “minaggallallo anna minaggiddeddu” nga Dios tam nga si Jehova anna na Ana na. Matakitan gapa ira nu mazziga-riga ittam. (Luc. 1:78; 1 Ped. 5:7) Siguradu nga kakayà da nga alsan i ngamin nga problema nga mamazziga ta totolay!

6. Anni nga pakapangngua i niyawa na Dios kani Jesus?

⁶ Mekadua, niddan na Dios si Jesus tu pakapangngua nga solban i ngamin nga problema na totolay. Nipasingan na milagro ira ni Jesus nga egga i pakapangngua na nga solban i ngamin nga problema nga ari tam vuluvuga masolba. Angngarigan na, egga i pakapangngua na nga alsan i pinakagamu na problema ira na totolay—i namana nga liwa anna i efekto ira natun, nelavu ngana i taki anna patay. (Mat. 9:1-6; Roma 5:12, 18, 19) Pakurugan na milagro na ira nga egga i pakapangngua na nga pammapian i “anni laman” nga klase na taki anna paginnolayan paga lagu i natay. (Mat. 4:23; Juan 11:43, 44) Egga gapa i pakapangngua na nga pagimmangan i masikan ira nga bagiu anna affutan i marakay ira nga espiritu. (Mar. 4:37-39; Luc. 8:2) Talaga makapabannay nga mammuan nga niddan ni Jehova tu kunnatun nga pakapangngua i Ana na!

7-8. (a) Anni i ipasiguradu ta nittam na milagro ira ni Jesus? (b) Anni nga milagro i aba-abangammu nga mesimmu ta napabagu nga mundo?

⁷ Mekatallu, makasiguradu ittam nga malawa tam noka i bendision ira nga iyawa na Pappatulan na Dios. Anni i magigiammu tam ta milagro ira ni Jesus? Nu nakua na yatun ta kegga na ta davvun, magga makua na gapa saw yatun ta interu nga mundo megafu ta  yayya ngana i Patul na Pappatulan na Dios ta langi. Nonopan nu anni saw i mesimmu sonu mammaguray ngana si Cristo ta interu davvun. Ari ittam ngana vuluvuga mattaki ta alsan na i ngamin nga klase na taki anna defekto nga namarriga ta totolay. (Isa. 33:24; 35:5, 6; Nep. 21:3, 4) Ari ittam ngana vuluvuga nga mabbisin ni tu mazziga ittam megafu ta kalamidad ira. (Isa. 25:6; Mar. 4:41) Kuruga magayayya ittam noka ta dafungattam i meddu ira nga minatay tam nga “maginnolay.” (Juan 5:28, 29) Anni nga milagro i aba-abangammu nga mesimmu ta napabagu nga mundo?

⁸ Kada mammilagro si Jesus, masingan nga kuruga minappakalinno anna minangngikallo yayya. Makasta nu parigattam yatun ira nga kualidad. Ikonsidera tam i dua nga angngarigan nu kunnasi nga nipasingan ni Jesus danatun. Igafu tam ta nesimmu ta boda ta Cana.

9. Anni i kingngua ni Jesus ta boda? (Juan 2:6-10)

⁹ Bibbigan i Juan 2:6-10. Turi ta nofu i binarayang ta boda, mawag kari nga egga i kuan ni Jesus? Awan. Megafu ta awan mabba tu profesiya nga nakkagi nga mammilagro i Mesias tapenu magangngua tu binarayang. Ngem anni tamma i matageno mu nu siko i makabboda tapus nofutan tu menum? Siguradu nga nikallo ni Jesus i familia, mas ngana i bagu nga magatawa, yari tu manaki na nga mepasiranan ira. Anni gafu i kingngua na?  Gitta na nakagi ta gafu, nammilagro yayya. Pinabbalin na tu kapianan nga binarayang i ma-390 nga litro na danum. Posible nga aru i pinadday na tu binarayang tapenu sonu egga i mavuna, meyusa paga ta mappange onu puede nga melaku tapenu egga i kuartu na bagu nga magatawa. Siguradu nga mappappabalo i bagu nga magatawa!

10. Anni i karuan ta importante ira nga detalye ta Juan kapitulo 2? (Innan gapa i letratu.)

¹⁰ Egga ira i magigiammu tam ta importante ira nga detalye ta Juan kapitulo 2. Nasifutammu kari nga ari tu si Jesus i namannu tu danum ta angang ira? Imbes tu yayya i mangngua tatun tapenu makala yayya tu atension, kinagi na ta doroban ira nga pannuadda i angang ira. (Versikulo 6, 7) Turi ta nabbalin tu binarayang i danum, ari tu si Jesus mismu i nangiyangay tu binarayang ta ingkargadu ta boda. Nipakua na lallagu yatun ta doroban ira. (Versikulo 8, 9) Siguradu nga ari nga nanga si Jesus tu tanga-basu nga binarayang tapus minay yayya ta arubang na bisita ira anna niparayag na, ‘Sissiman nu i binarayang nga pinaddè!’

11. Anni i magigiammu tam ta milagro ni Jesus?

¹¹ Anni i magigiammu tam ta milagro ni Jesus nga nabbalin tu binarayang i danum? Kinapakalinno. Ari nga niparayag ni Jesus i milagro na. Kakurugan na, ari na vuluvuga niparayag i maski anni nga nakua na. Nappakalinno lallagu yayya anna kanayun na nga iyawa i ngamin nga dayaw ta Yama na. (Juan 5:19, 30; 8:28) Nu mapakalinno i pagimamma tam ta baggi tam kagitta ni Jesus, ari tam gapa vuluvuga iparayag i maski anni nga nakua tam. Maski anni paga i metuppal tam ta passerbi kani Jehova, ari tam nakuan iparayag i baggi tam. Iparayag tam lallagu i kappabbaw nga Dios nga passerbiattam. (Jer. 9:23, 24) Iyawa tam kani Jehova i dayaw nga mepangngo ta nisa. Ngatta? Megafu ta awan vuluvuga tu makua tam nga mapia nu awan tu uffun na.​—1 Cor. 1:26-31.

12. Kunnasi tam paga maparigan i kinapakalinno ni Jesus? Mangiyawa tu angngarigan.

¹² Egga paga i makua tam tapenu maparigan i kinapakalinno ni Jesus. Nonopan yaw: Aru nga tiempo i inusa na tadday nga elder tapenu uffunan i tadday nga ministerial nga aripan nga mapprepara para ta ollu nga public talk na. Makakkasta i palappa na mabbing nga brother anna nagustuan yatun na kongregasion. Kabalin na study, egga i minaranni ta elder tapus kinagi na ta nisa: ‘Kekkasta i palappa ni brother, anni?’ Mawag paga kari tu kagian na elder: ‘Siempre, mabayag ku yayya nga inuffunan’? Onu mapakalinno nga kagian na: ‘Wan, kekkasta lagu. Malalaki yayya’? Nu mapakalinno ittam, ari tam mawag nga apan i dayaw megafu ta mapia ira nga kukukuattam para ta tanakuan. Kontentu ittam ngana megafu ta ammu tam nga masingi-singan anna appresian ni Jehova i kukukuattam. (Ikumpara i Mateo 6:2-4; Heb. 13:16) Siguradu nga mapagayayya tam si Jehova nu parigattam i kinapakalinno ni Jesus.​—1 Ped. 5:6.

13. Anni i nasingan ni Jesus aranni ta siudad na Nain, anna anni i kingngua na? (Lucas 7:11-15)

¹³ Bibbigan i Lucas 7:11-15. Imajinammu yatun nga nesimmu turi ta naggaddua ngana i ministerio ni Jesus. Minay yayya ta Nain nga tadday nga siudad ta Galilea. Aranni yatun ta Sunem nu sitaw nga pinaginnolay ni profeta Eliseo i ana nga lalaki na tadday nga babay, ma-900 nga dagun ngana i nappasa. (2 Pat. 4:32-37) Turi ta aranni ngana si Jesus ta attallungan na ili, nadafung na i umay ira nga  mattanam naggafu ta siudad. Kaddaraddam yatun nga eksena ta natay i tattadday nga ana nga lalaki na babay nga balu. Ngem ari nga magitadday i tumatangi nga yena. Magaru nga kitangelian na i nakipattanam. Pinagimmang ira ni Jesus tapus egga i kappabbaw nga kingngua na para tatun nga yena nga tumatangi. Pinaginnolay ni Jesus i ana nga lalaki na balu! Yatun i ollu ta tallu nga rekord na paginnolay nga kingngua ni Jesus nga mabibbig ta Evanghelio.

14. Anni i karuan ta importante ira nga detalye ta Lucas kapitulo 7? (Innan gapa i letratu.)

¹⁴ Egga ira i magigiammu tam ta importante ira nga detalye ta Lucas kapitulo 7. Nasifutammu kari nga “ta pakasingan” ni Jesus ta tumatangi nga yena ay “ziminatu i allo na”? (Versikulo 13) Awayya na tu nasingan na i yena nga tumatangi ta biko na lungun na ana na. Megafu tatun, nikallo na i yena. Ari laman tu basta nakatageno si Jesus tu allo para ta yena. Nipasingan na yatun nga allo na. Kinibbida na yayya tapus masippo nga kinagi na yaw: “Ari ka nga tumangi.” Tapus egga i kingngua ni Jesus tapenu uffunan yatun nga yena. Pinaginnolena i lalaki tapus “nikargo [na] yaya ta yena na.”​—Versikulo 14, 15.

15. Anni i magigiammu tam ta milagro ni Jesus?

¹⁵ Anni i magigiammu tam ta milagro nga pamaginnolay ni Jesus ta ana nga lalaki na balu nga babay? Mawag nga ipasingattam i allo tari ira ta maddaraddam. Siempre ari tam nga mapaginnolay i natay ira gitta na kingngua ni Jesus. Ngem mepasingattam i allo para tari ira ta maddaraddam nu mabbalin ittam tu sigga-sifu. Kuattam nakuan i adde na mawayya tam nga ipasingan i allo gukaban na kakkagian anna kukukuattam tapenu moffunan anna mabanna-bannayan ira. d (Prov. 17:17; 2 Cor. 1:3, 4; 1 Ped. 3:8) Maski simple laman i kagiattam anna i kuattam, dakal ngana i meyuffun natun ta nira.

16. Anni i magigiammu tam ta yena nga natayan tu ana nga kaparehu na egga ta picture?

¹⁶ Ikonsidera yaw nga ekspiriensa. Piga ragun  ngana i nappasa, habang kansion ta study, napansin na sister nga tumatangi i tadday nga yena nga aranni ta nisa. Egga gare i nakagi ta kansion meyannung ta paginnolay anna nikanni laman, natay i abbing nga babay natun nga yena. Nanono yatun na sister, yari tu insigida yayya nga nanaddag ta biko na yena. Kinofun na yayya adde ta mabalidda i kansion. Turi kua, kunnaw i niyistoria na yena: “Talaga mas iniddu ku i wawwaragi.” Fermi i appabalo na ta minay yayya ta study. “Tari tam nga mala i uffun,” kunna, “tari ta Kingdom Hall.” Makasiguradu ittam nga masingi-singan anna appresian ni Jehova maski i simple ira nga kukukuattam tapenu ipasingan i allo tari ira ta natayan nga ‘nakkafi i nono da.’—Sal. 34:18.

17. Anni i nagigiammu tam taw nga artikulo?

¹⁷ Mapasikan i pangurug tam nu kuattam tu study project i milagro ira ni Jesus nga mabibbig ta Evanghelio. Ituddu nittam danatun nga iddeddu ittam ni Jehova anna ni Jesus. Mammuattam gapa tatun nga egga i pakapangngua ni Jesus nga solban i ngamin nga problema na totolay. Uffunan ittam gapa natun nga mas mattalo nga araranni tam ngana nga malawa i ngamin nga bendision nga nipromesa na Pappatulan. Nu gigiammuattam yatun ira nga rekord ta Biblia, pannonopattam nakuan gapa nu kunnasi tam maparigan i kualidad ira ni Jesus. Puedem kari nga mangiskediul tu personal study project onu family worship nga nakafokus ta tanakuan paga nga milagro ni Jesus? Innammu nu anni i magigiammum tatun, tapus ikagim yatun ta tanakuan. Siguradu nga mapagaram kamu ta paggiristoria nu!—Roma 1:11, 12.

18. Anni i gigiammuattam ta tumunug nga artikulo?

¹⁸ Turi ta aranni ngana nga mangultimu i ministerio ni Jesus, kingngua na i mekatallu anna ultimu nga pamaginnolena nga mabibbig ta Biblia. Nerumu-ruma yatun nga paginnolay ta nappollu ira. Gare, pinaginnolay na i madukko nga kofun na nga appa nga aggaw ngana nga natay. Anni ira i magigiammu tam tatun nga milagro nga mabibbig ta Evanghelio? Kunnasi tam nga mapasikan i pangurug tam ta iddanama nga paginnolay? Matabbag danatun ta tumunug nga artikulo.