1-2. Anni i mawag tu kuattam habang innaggattam i Paraiso?

 MAPPAPPABALO ittam ta promesa ni Jehova nga matalianan yaw nga marake nga mundo tu Paraiso nga pammagurayan na katunung. (2 Ped. 3:13) Maski nu ari tam ammu nu sonu anni nga mesimmu yatun, ipasingan na mesissimmu ira sangawe nga ari ngana tu mabayag i paginnag tam.​—Mat. 24:32-34, 36; King. 1:7.

² Maski nu kunnasi ittam ngana kabayag ta kinakurug, mawag lagapa tu pasikannattam ngamin i pangurug tam tatun nga promesa. Ngatta? Megafu ta maski nu masikan i pangurug tam, awayya na tu makkafi yatun. I kurug, tinukoy ni apostol Pablo yatun nga pakkafi na pangurug bilang i “katagarulian nga meggo nga giminafu nittam.” (Heb. 12:1) Kayà kagian natun nga awayya na tu mabi laman nga makkafi i pangurug tam. Tapenu ari gafu makkafi i pangurug tam, mawag tu kanayun nga pannonopattam tu mapia i ganna-gannug ira nga mamakurug nga araranni ngana i Paraiso.​—Heb. 11:1.

3. Anni i gigiammuattam taw nga artikulo?

³ Taw nga artikulo, gigiammuattam i tallu nga makua tam tapenu mapasikattam i pangurug tam ta promesa ni Jehova nga Paraiso: (1) pannono tu mapia ta tavvu, (2) pannono tu mapia ta pakapangngua ni Jehova, anna (3) pabbalin tu aktibo ta espiritual ira nga aktibidad. Tapus gigiammuattam nu kunnasi nga mapasikan i pangurug tam ta mensahe ni Jehova kani Habakuk. Ngem ikonsidera tam labbi i situasion ira nga magawag tu masikan nga pangurug ta promesa nga duttal noka i Paraiso.

 SITUASION IRA NGA MAGAWAG TU MASIKAN NGA PANGURUG

4. Anni ira nga desision i magawag tu masikan nga pangurug?

⁴ Kadaggaw, egga ira i desision nga kuattam nga magawag tu masikan nga pangurug. Angngarigan na, maddesision ittam meyannung ta pakikavulu tam, dibersion, edukasion, pagatawa, ána, anna trabahu. Makasta gafu nu iyavu tam ta baggi tam: ‘Ipasingan kari na pili-piliakku nga mangurug ngà nga temporario laman yaw nga mundo anna aranni ngana nga talianan yatun na Dios tu Paraiso na? Onu kuakku i kukukuan danuri na ari nga mangurug nga posible i pattolay tu mannanayun?’ (Mat. 6:19, 20; Luc. 12:16-21) Makakua ittam tu kapianan ira nga desision nu pasikannattam i pangurug tam nga araranni ngana i Paraiso.

5-6. Ngatta kawagattam i masikan nga pangurug nu mapurueban ittam? Mangiyawa tu angngarigan.

⁵ Kawagattam gapa i masikan nga pangurug nu mapurueban ittam. Baka mapersigi ittam, mattaki tu grabe, onu makkafi i nono tam megafu ta karuan paga nga rason. Siempre ta ollu, baka maattammattam paga i kapurueba. Ngem nu mabbayag yatun, kawagattam i masikan nga pangurug tapenu makapagattam anna tapenu magayayya ittam lagapa nga masserbi kani Jehova.​—Roma 12:12; 1 Ped. 1:6, 7.

⁶ Nu maddaggun i kapurueba tam, baka matageno tam nga ari ngana vuluvuga duttal i Paraiso. Kayà kari kagian natun nga makafi i pangurug tam? Ari gapa. Nonopan yaw: Nu magisnow tapus managga ittam ta lamming, baka matageno tam nga ari ngana vuluvuga mas-summer. Ngem duttal lapa i summer. Kunnatun gapa, nu nepallo i pinakkafi na nono tam, baka matageno tam nga ari ngana vuluvuga duttal i Paraiso. Ngem nu masikan i pangurug tam, siguradu ittam nga matuppal i promesa ira na Dios. (Sal. 94:3, 14, 15; Heb. 6:17-19) Nu kunnatun kasikan i pangurug tam, mapagollu tam lagapa i passerbi kani Jehova.

7. Anni nakuan i pagimmugurattam?

⁷ Kawagattam gapa i masikan nga pangurug ta pallayyagayya. Aru gare ta layyagayyattam i makatageno nga imposible i ‘mapia nga dumug’ meyannung ta Paraiso nga nipromesa na Dios. (Mat. 24:14; Eze. 33:32) Magimmugug ittam nakuan tapenu ari ittam vuluvuga mafektan na kunnatun nga kawan tu pangurug da. Mawag gafu tu kanayuttam nga pasikannan i pangurug tam. Ikonsidera tam ngana i tallu nga makua tam.

PANNONOPAN TU MAPIA I TAVVU

8-9. Anni i efekto na ta pangurug tam na pannono tu mapia ta tavvu?

⁸ I tadday nga makua tam tapenu mapasikan i pangurug tam ay gukaban na pannono tu mapia ta tavvu. I tavvu ay tadday nga garantiya nga matuppal noka i promesa ira na Dios. Nu pannonopattam tu mapia nu ngatta neyawa i tavvu anna nu kunnasi kadakal i nisakrifisio ni Jehova, mapasikattam i pangurug tam nga siguradu nga mesimmu noka i promesa na Dios nga pattolay tu mannanayun ta mas makasta nga mundo. Ngatta makagi tam yatun?

⁹ Kunnasi kari kadakal i nisakrifisio ni Jehova tapenu meyawa i tavvu? Zinog na i kaka nga Ana na, i kadukkotan ta nisa, maggafu ta langi tapenu meyana ta davvun bilang perfekto nga tolay. Ta kegga ni Jesus ta davvun, napakaru i inattamman na. Ziniga-riga da yayya tapus naekspiriensa na i mataka-taki nga patay. Daka-dakal gafu i nisakrifisio  ni Jehova! Ari vuluvuga ipamavulun na minaggiddu nga Dios tam nga maziga-riga i Ana na anna matay nu manganannuan mabba laman i makasta nga pattolay nga iyawa natun. (Juan 3:16; 1 Ped. 1:18, 19) Megafu ta daka-dakal i nisakrifisio ni Jehova, magga siguraduan na nga makapattolay ittam noka tu mannanayun ta Paraiso.

PANNONOPAN TU MAPIA I PAKAPANGNGUA NI JEHOVA

10. Base ta Efeso 3:20, anni i mawayya nga kuan ni Jehova?

¹⁰ I mekadua nga kuattam tapenu mapasikan i pangurug tam ay gukaban na pannono tu mapia ta pakapangngua ni Jehova. Egga i pakapangngua na nga kuan i ngamin nga nipromesa na. Nu ta tolay laman, gitta na imposible nga mattolay ittam tu mannanayun ta Paraiso. Ngem kanayun mabba nga mangipromesa si Jehova tu ganna-gannug nga ari vuluvuga makua na tolay. Yayya gare i Makapangngua-sa-Ngamin nga Dios. (Job 42:2; Mar. 10:27) Ari tam gafu ngana mattaka nu kappabbaw ira i promesa na!—Bibbigan i Efeso 3:20.

11. Mangiyawa tu angngarigan na kappabbaw ira nga nipromesa na Dios. (Innan i kahon nga “ Kappabbaw ira nga Promesa nga Natuppal.”)

¹¹ Nonopan i gitta na imposible ira nga nipromesa ni Jehova ta totolena ta nappasa. Nipromesa na kada Abraham anna Sara nga makka-ana ira tu lalaki maski nu lakay anna bako ngana ira. (Gen. 17:15-17) Kinagi na gapa kani Abraham nga meyawa saw ta gaka-gaka na i davvun na Canaan. Ngem turi ta naaripan tu piga dagun ta Ehipto i Israelita ira nga gaka-gaka ni Abraham, gitta na imposible ngana nga mesimmu yatun nga promesa. Ngem nesimmu lagapa yatun. Turi kua gapa, nipakannammu ni Jehova nga makka-ana si Elizabet maski nu bako ngana yayya. Kinagi gapa ni Jehova kani Maria, nga tadday nga birhen, nga iyana na i Ana na Dios. Ketuppalan yatun na nipromesa ni Jehova ta hardin na Eden rinivu dagun ngana i nappasa!—Gen. 3:15.

12. Anni i ipasiguradu ta nittam na Josue 23:14 anna Isaias 55:10, 11 meyannung ta pakapangngua ni Jehova?

¹² Massikan i pangurug tam ta pakapangngua ni Jehova nga irattal i Paraiso nu pannonopattam i nipromesa na ira anna nu kunnasi na nga sinuppal danatun. (Bibbigan i Josue 23:14; Isaias 55:10, 11.) Gafu tatun, mas maduffunattam gapa i tanakuan tapenu mantindiadda nga ari laman tu pinadda-padday onu imahinasion i promesa nga Paraiso. Kunnaw mismu i kinagi ni Jehova meyannung ta bagu nga langi anna bagu nga davvun: “Kurug danaw nga uvovug anna awan tu paddudam-mu nira.”​—Nep. 21:1, 5.

MABBALIN TU AKTIBO TA ESPIRITUAL IRA NGA AKTIBIDAD

13. Kunnasi nga mapasikan na study ira i pangurug tam? Ipakanawag.

¹³ I mekatallu nga makua tam tapenu mapasikan i pangurug tam ay gukaban na pabbalin tu aktibo ta espiritual ira nga aktibidad. Angngarigan na, ikonsidera nu anni i mala tam ta pagatende ta study ira na kongregasion. Kunnaw i kagian ni Anna nga piga dekada ngana nga aktibo ta nadduruma nga asayment ta ngamin-tiempo nga passerbi: “Megafu ta study ira, kanayun nga masikan i pangurug ku. Maski nu ari kuruga malalaki nga mappalappa i ispiker onu awan tu kagian na nga bagu, magga egga lapa i maginnà nga makaduffun tapenu mas mantindiakku i Biblia. Yatun i mamasikan ta pangurug ku.” b Massikan  gapa i pangurug tam megafu ta komento ira na wawwaragi tam.​—Roma 1:11, 12; 10:17.

14. Kunnasi nga mapasikan na pallayyagayya i pangurug tam?

¹⁴ Mapasikattam gapa i pangurug tam nu mallayyagayya ittam. (Heb. 10:23) Kagian ni Barbara nga 70 dagun ngana nga massesserbi kani Jehova: “Kanayun nga mamasikan ta pangurug i pallayyagayya. Kada ipakibbidà i makasta ira nga promesa ni Jehova, mas nga malladda i pangurug ku.”

15. Kunnasi nga pasikannan na pap-personal study i pangurug tam? (Innan gapa i letratu ira.)

¹⁵ Egga paga i espiritual nga aktibidad nga mamasikan ta pangurug tam: i pap-personal study. Nasingan ni Susan nga makaduffun nu iyiskediul na i paggigiammu na. Kagian na: “Kada Liggu, mar-review ngà tu Passifusifutan para ta tumunug nga ligguan. Nu Lunes anna Martes gapa, ipreparà i study ta midweek. Tapus ta karuan nga aggaw, egga i personal study project ku.” Megafu ta tuttuttulan ni Susan i iskediul na, tulu-tuloy nga mapasikan i pangurug na. Napansin gapa ni Irene nga piga dekada ngana ta world headquarters nga makapasikan ta pangurug i paggigiammu tu profesiya na Biblia. Kagian na, “Talaga bilib ngà tu natuppal i profesiya ira ni Jehova maski ta kabadditan nga detalye.” c

“SIGURADU NGA MATUPPAL YATUN”

16. Ngatta makagi tam nga para gapa ta nittam i pamasiguradu ni Jehova kani Habakuk? (Hebreo 10:36, 37)

¹⁶ Nabayag ngana nga iinnaggan na karuan nga aripan ni Jehova i pangultimu naw nga marake nga mundo. Nu ta tolay laman, gitta na metala-talattan yatun nga promesa na Dios. Ngem ammu ni Jehova i mataga-tageno na aripan na ira yatutta nipasiguradu na kani profeta Habakuk: “Matuppal pagalaman i sirmata ta natunno nga tiempo natun, anna mappabibibi yatun mappange ta panuppalan  na, anna ari nga mabbalin tu kinaladdug yatun. Maski nu mabbayag yatun, tulu-tuloy nga innaggammu! Ta siguradu nga matuppal yatun. Ari nga matalattan!” (Hab. 2:3) Para kari laman kani Habakuk yatun nga pamasiguradu na Dios? Onu para gapa ta nittam sangawe? Nibilin ni Jehova kani apostol Pablo nga itura na yatun ira nga uvovug para ta Cristiano ira nga magigginnag ta dattal na Paraiso. (Bibbigan i Hebreo 10:36, 37.) Makasiguradu ittam gafu nga maski nu gitta na matalattan i nepromesa nga kapaliag tam, “siguradu nga matuppal yatun. Ari nga matalattan!”

17. Kunnasi nga niyaplika na tadday nga sister i tabarang ni Jehova kani Habakuk?

¹⁷ Aru nga aripan ni Jehova i nangiyaplika ta tabarang na nga ‘tulu-tuloy nga maginnag’ maski nu dekada paga i mappasa. Angngarigan na, namegafu nga nasserbi kani Jehova si Sister Louise ta 1939. Istorian na: “Tatun nga tiempo, abbo ku nu ma-Armagedon nige ku mabalin ma-haiskul. Ngem ari nga nesimmu yatun. Ta pappasa na daga-ragun, nakoffun niakan i pabbibbig ku ta ‘istoria ira na paginnag’ ta Biblia. Binibbig ku i meyannung kada Noe, Abraham, Jose, anna karuan paga nga naginnag labbi nige da nga nalawa i nipromesa ni Jehova. Megafu ta tulu-tuloy nga paginnag ku anna na karuan ta Paraiso, kumbinsidu kami nga araranni ngana yatun.” Aru nga nabayag ngana nga massesserbi kani Jehova i umanugu tatun!

18. Kunnasi nga mapasikan na pagobserba ta pinaratu i pangurug tam nga duttal noka i Paraiso?

¹⁸ Kurug tu awan paga i Paraiso. Ngem nonopammu i ganna-gannug ira sangawe nga masingammu—i biti-bitun, i fun ira, i aya-ayam, anna i kasittolem. Egga bi i tiempo nga awan danatun. Ngem turi ta pinaratu ngana yatun ni Jehova, awan ngana vuluvuga tu madduda nga kurug danatun. (Gen. 1:1, 26, 27) Nipromesa gapa na Dios tam nga mamadday yayya noka tu Paraiso. Magga tuppalan na saw yatun. Ta Paraiso, mannanayun ittam nga mattolay anna ari ittam vuluvuga mattaki. Ta tiempo nga sinunno na Dios, mabbalin saw tu kuru-kurug i Paraiso, nu kunnasi nga kuru-kurug gapa i ganna-gannug ta pallevu tam.​—Isa. 65:17; Nep. 21:3, 4.

19. Kunnasim nga mapasikan i pangurug mu?

¹⁹ Adde ta ari paga nga Paraiso, approbetchammu i kada chansa nga pasikannan i pangurug mu. Ipappabalo mu nakuan kanayun i tavvu. Pannonopammu tu mapia i pakapangngua ni Jehova. Mabbalikka tu aktibo ta espiritual ira nga aktibidad. Nu kuammu danatun, tadday ka noka tari ira ta “maninaga noka ta nitabba na Dios, megafu ta angngurug anna pasensia da.”​—Heb. 6:11, 12; Roma 5:5.