MAGIGIAMMU NGA ARTIKULO 16
“Maginnolay i Wagim”!
“‘Maginnolay i wagim,’ kun-ni Jesus [kani Marta].”—JUAN 11:23.
KANSION 151 Magagal Yayya
SUMARIO a
1. Kunnasi nga nipasingan na tadday nga abbing nga kuru-kurug ta nisa i paginnolay?
EGGA i abbing nga lalaki nga mangngagan tu Matthew. Egga i grabe nga taki na anna kawagan na i aru nga operasion. Turi ta pitu i dagun na, naggiraw i familia da tu JW Broadcasting®. Ta ultimu na programa, nagiraw da i music video meyannung ta panafung ta iddeddukan ira nga napaginnolay. b Kabalin na paggiroda, inarannian ni Matthew i magana na. Sinaron na i lima da anna kinagi na: “O diba Mama, Papa? Maski matay ngà, siguradu nga maginnolay ngà saw. Innaggadda saw ah; kannu mavurung.” Kuru-kurug ta abbing i iddanama nga paginnolay. Maimajimmu kari i natageno tatun na magana na?
2-3. Ngatta makasta nu pannonopattam i promesa nga paginnolay?
2 Makasta nu pannonopattam i promesa na Biblia nga paginnolay. (Juan 5:28, 29) Ngatta? Megafu ta ari tam ammu nu kanni ittam mattaki tu grabe onu gavva nga matayan tu iddeddukan. (Ecl. 9:11; Sant. 4:13, 14) Makoffun ta nittam i pagiddanama tam ta paginnolay tapenu makayanattam i kunnatun ira nga kapurueba. (1 Tes. 4:13) Ipasiguradu na Biblia nga kilala ittam tu mapia na Yama tam ta langi anna iddeddukan na ittam. (Luc. 12:7) Mawag gare tu kilala ittam tu mapia ni Jehova tapenu mapaginnolay na ittam nga ari manguli i personalidad anna memoria tam. Kuruga iddeddukan ittam ni Jehova, yari tu pinabbalin na tu posible nga mattolay ittam tu mannanayun! Maski paga lagu nu matay ittam, paginnolayan na ittam!
3 Taw nga artikulo, gigiammuattam labbi nu ngatta makasiguradu ittam nga kurug i promesa nga paginnolay. Tapus gigiammuattam i makapasikan ta pangurug nga rekord na Biblia nga nakebaseyan na tema nga teksto tam: “Maginnolay i wagim.” (Juan 11:23) Gigiammuattam gapa nu anni i kuattam tapenu mas mabbalin tu kuru-kurug ta nittam i iddanama nga paginnolay.
NGATTA MAKASIGURADU ITTAM NGA KURUG I PROMESA NGA PAGINNOLAY?
4. Tapenu kurugattam i tadday nga promesa, ta anni ittam nakuan kumbinsidu? Mangiyawa tu angngarigan.
4 Tapenu kurugattam i tadday nga promesa, mawag tu kumbinsidu ittam nga ikaya anna egga i pakapangngua na tadday nga nappromesa nga tuppalan yatun. Angngarigan na, imajinammu nga zinaral na bagiu i balem. Tapus minay nikaw i kofummu anna nipromesa na, ‘Uffunattaka nga pakappian i balem.’ Ammum tu tuppalan na i promesa na anna kumbinsidu ka nga ikaya naka nga duffunan. Nu malalaki yayya nga karpinteru anna kumpleto i tools na, ammum tu moffunan naka. Yari tu nangurug ka ta promesa na. Kunnasi gapa ta promesa na Dios nga paginnolay? Talaga kari nga ikaya na anna egga i pakapangngua na nga tuppalan yatun?
5-6. Ngatta makasiguradu ittam nga ikaya ni Jehova nga paginnolayan i natay ira?
5 Ikaya kari ni Jehova nga paginnolayan i natay ira? Siguradu nga ikaya na. Zinog na i karuan ta nattura ta Biblia nga itura i promesa na nga paginnolay. (Isa. 26:19; Os. 13:14; Nep. 20:11-13) Nu mappromesa si Jehova, kanayun na nga tuppalan yatun. (Jos. 23:14) Kakurugan na, kanappan onu talaga kakayà ni Jehova nga paginnolayan i natay ira. Ngatta makagi tam yatun?
6 Ikonsidera tam i kinagi ni Job. Siguradu yayya nga maski nu matay yayya, kanappan ni Jehova nga masingan uli yayya nga mattolay. (Job 14:14, 15, ftn.) Kunnatun gapa i matageno ni Jehova para ta ngamin nga maddayarayaw ta nisa nga natay ngana. Kakayà na nga paginnolayan ira nga magawa-gawayyan anna magayayya. Kunnasi gapa i binillion ira nga natay nga ari napeggan tu chansa nga magigiammu i kinakurug meyannung kani Jehova? Ikaya na minaggiddu nga Dios tam nga paginnolayan gapa ira. (King. 24:15) Kayà na nga mapeggan ira tu chansa nga mabbalin tu kofun na anna mattolay tu mannanayun taw ta davvun. (Juan 3:16) Manawag gafu nga ikaya ni Jehova nga paginnolayan i natay ira.
7-8. Ngatta makasiguradu ittam nga egga i pakapangngua ni Jehova nga paginnolayan i natay ira?
7 Egga kari gapa i pakapangngua ni Jehova nga paginnolayan i natay ira? Awan tu duda tatun! Yayya i “Makapangngua sa Ngamin.” (Nep. 1:8) Yari tu mawayya na nga affutan i maski sinni nga kalaban, maski paga i patay. (1 Cor. 15:26) Mapasikan anna mabanna-bannayan ittam ta pakannammu tatun. Ikonsidera tam i nesimmu kani Sister Emma Arnold. Grabe i kapurueba ira ta pangurug nga inarubang na familia na durante ta World War II. Natay i iddeddukadda ira ta kampu ira nga affukutan na Nazi. Tapenu mabanna-bannayan na i ana na nga babay, kinagi ni Emma: “Nu ari ngana maginnolay i natay, eh di kayà na vu kagian mas makapangngua i patay anne ta Dios?” Siguradu nga awan vuluvuga tu mas makapangngua anne kani Jehova! I makapangngua-sa-ngamin nga Dios nga namaratu ta inango ay kayang-kaya na nga itoli i inango na natay ira.
8 I tadday paga nga rason nu ngatta ammu tam nga kayang-kaya na Dios nga paginnolayan i natay ira ay megafu ta awan tu limitasion na memoria na. Agalan na i kada bitun ta mismu nga ngagan natun. (Isa. 40:26) Meraddamman na gapa nu sinni danuri natay. (Job 14:13; Luc. 20:37, 38) Alistu na laman nga meraddamman i ngamin nga detalye meyannung ta paginnolayan na, nelavu tatun i itchura da, i personalidad da, i nappasa-pasadda ta pattoleda, anna i memoria da.
9. Ngatta siguradu ka nga kurug i promesa ni Jehova nga paginnolay?
9 Makasiguradu ittam nga kurug i promesa ni Jehova nga paginnolay megafu ta ammu tam nga ikaya na anna egga i pakapangngua na nga kuan yatun. Anni paga i tadday nga rason nu ngatta makasiguradu ittam nga kurug yatun nga promesa? Nakua ngana gare ni Jehova yatun. Ta tiempo na Biblia, egga ira i matalo nga lallaki kagitta ni Jesus nga niddan na tu pakapangngua nga mamaginnolay. Gigiammuattam ngana gafu i tadday ta rekord na paginnolay nga kingngua ni Jesus. Netura yatun ta Juan kapitulo 11.
NATAYAN SI JESUS TU MADUKKO NGA KOFUN
10. Anni i nesimmu durante nga mallayyagayya si Jesus ta abbag na Jordan maggafu ta Betania, anna anni i kiningngua na? (Juan 11:1-3)
10 Bibbigan i Juan 11:1-3. Imajinammu yaw nga nesimmu ta Betania turi ta mangultimu i 32 C.E. Egga i madukko nga kokkofun ni Jesus tatun nga ili—si Lazaro anna i dua nga wagi na nga babay nga da Maria anna Marta. (Luc. 10:38-42) Ngem nattaki si Lazaro yari tu navurungan i wawwagi na. Nangipatulug ira tu mensahe kani Jesus nga egga ta abbag na Jordan. Maddua aggaw nga malakag yatun maggafu ta Betania. (Juan 10:40) Kaddaraddam ta natay si Lazaro nige nga makadattal i mensahero kani Jesus. Maski paga ammu ni Jesus nga kapatpatay na kofun na, nappabattang yayya tatun tu dua paga nga aggaw tapus saka laman yayya nappa-Betania. Ta tiempo gafu nga nakadattal si Jesus, appa aggaw ngana nga natay si Lazaro. Egga i kuan ni Jesus nga pakabenefisiowan na kofun na ira anna kedayawan na Dios.—Juan 11:4, 6, 11, 17.
11. Anni i magigiammu tam ta pakikkofun base ta istoria?
11 Egga i magigiammu tam meyannung ta pakikkofun taw nga istoria. Nonopan yaw: Turi ta nangipatulug tu mensahe si Maria anna si Marta kani Jesus, ari da nga nikiddaw nga umay yayya ta Betania. Basta nipakannammu da laman nga mataki i madukko nga kofun na. (Juan 11:3) Turi ta natay si Lazaro, mawayya nakuan yayya nga paginnolayan ni Jesus maski paga egga yayya ta arayyu. Ngem minay lagapa si Jesus ta Betania tapenu makavulu i kokkofun na ira nga da Maria anna Marta. Egga kari i kofummu nga umay manguffun nikaw maski paga kammu yayya inagalan? Makasiguradu ka gafu nga magga uffunan naka ta “tiempo na ziga.” (Prov. 17:17) Kagitta ni Jesus, mabbalin ittam nakuan tu kunnatun nga klase na kofun para ta tanakuan! Manoli ittam ngana ta istoria anna innattam nu anni i tumunug nga nesimmu.
12. Anni i nipromesa ni Jesus kani Marta, anna ngatta makasiguradu si Marta nga kurug yatun? (Juan 11:23-26)
12 Bibbigan i Juan 11:23-26. Nannammuan ni Marta nga aranni ngana ta Betania si Jesus. Yari tu nakkarela yayya tapenu dafungan si Jesus. Kinagi na: “Afu, nu egga ka nakuan taw, ari maffugag nga natay i wagì.” (Juan 11:21) Fustu gapa. Puede nakuan nga pinammapia ni Jesus si Lazaro. Ngem egga i mas kappabbaw nga nanono na nga kuan. Nipromesa na: “Maginnolay i wagim.” Niddan na gapa si Marta tu kammungan nga rason tapenu kurugan i promesa na. Kinagi na: “Sakan i paginnolay anna inango.” Niddan na Dios si Jesus tu pakapangngua nga paginnolayan i natay ira. Napaginnolay na ngana i abbing nga babay nga bagu laman nga natay anna pinaginnolay na gapa i mabbing nga lalaki ta mismu nga aggaw na patena. (Luc. 7:11-15; 8:49-55) Ngem mawayya na kari nga paginnolayan i tadday nga appa nga aggaw ngana nga natay anna namegafu ngana nga mavunno i baggi na?
“LAZARO, MALLAWAK-KA”!
Fermi nga nikallo ni Jesus i maddaddam ira nga kokkofun na (Innan i parapo 13-14)
13. Segun ta Juan 11:32-35, anni i reaksion ni Jesus turi ta nasingan na nga tumatangi si Maria anna i kakavvulu na? (Innan gapa i letratu.)
13 Bibbigan i Juan 11:32-35. Imajinan i tumunug nga nesimmu. Nallawan si Maria nga wagi ni Lazaro tapenu dafungan si Jesus. Kinagi na uli i kinagi ni Marta: “Afu, nu egga ka nakuan taw, ari maffugag nga natay i wagì.” Fermi i daddam na anna na kakavvulu na. Ta pakasingan anna pakaginna ni Jesus ta pattangi da, nepallo i daddam na. Megafu ta iddukan anna ikallo na i kokkofun na, siminangi yayya. Mantindian na nu kunnasi kataki i matayan tu iddeddukan. Siguradu nga ikaya na nga alsan i rason nu ngatta tumangi ira!
14. Anni i magigiammu tam meyannung kani Jehova ta reaksion ni Jesus ta pattangi ni Maria?
14 Anni i magigiammu tam ta reaksion ni Jesus ta pattangi ni Maria? Minaggallallo anna minaggiddeddu nga Dios si Jehova. Ngatta makagi tam yatun? Gitta gare na nagigiammu tam ta nappasa nga artikulo, perfekto nga maparigan ni Jesus i appana-panono anna panageno na Yama na. (Juan 12:45) Nu mabibbig tam gafu nga siminangi si Jesus megafu ta fermi nga pangikallo na ta maddaddam nga kokkofun na, makagi tam nga ikakkallo ittam gapa ni Jehova nu masingan na nga tumangi-tangi ittam. (Sal. 56:8) Ari kari nga megafu tatun ay mas mapaguyu ka nga umaranni ta Dios tam nga minaggallallo?
Nipasingan ni Jesus nga egga i pakapangngua na nga paginnolayan i natay ira (Innan i parapo 15-16)
15. Segun ta Juan 11:41-44, anni i nesimmu ta attanamman ni Lazaro. (Innan gapa i letratu.)
15 Bibbigan i Juan 11:41-44. Nakadattal si Jesus ta nangitanamman kani Lazaro tapus kiniddona nga alsadda i batu nga nanerra tatun. Nammanaki si Marta. Kinagi na nga egga ngana i agug na bangkay. Simibbag si Jesus: “Ari kari nga kinagì nikaw tu nu mangurug ka, masingam-mu i gloria na Dios?” (Juan 11:39, 40) Siminangag si Jesus anna nakimallo yayya ta arubang na totolay. Kayà na gare nga iyawa kani Jehova i ngamin nga dayaw ta tumunug nga mesimmu. Tapus nakkulle si Jesus: “Lazaro, mallawak-ka”! Nallawan si Lazaro ta attanamman! Kiningngua ni Jesus i imposible ta pagimamma na tanakuan.—Innan i study note na Juan 11:17.
16. Kunnasi nga mapasikan i pangurug tam ta iddanama nga paginnolay ta rekord na Juan kapitulo 11?
16 Mapasikan i pangurug tam ta iddanama nga paginnolay megafu ta rekord na Juan kapitulo 11. Kunnasi? Daddamman i promesa ni Jesus kani Marta: “Maginnolay i wagim.” (Juan 11:23) Gitta na Yama na, kakayà anna egga i pakapangngua ni Jesus nga kuan yatun. Ipasingan na pinattangi na nga kakayà na nga paginnolayan i natay ira anna pawanan i daddam nga resulta natun. Pinakurug mangana ni Jesus durante ta pallawan ni Lazaro ta attanamman nga egga i pakapangngua na nga paginnolayan i natay ira. Pannonopan gapa i niperaddam ni Jesus kani Marta: “Ari kari nga kinagì nikaw tu nu mangurug ka, masingam-mu i gloria na Dios?” (Juan 11:40) Egga gafu i maladda nga basehattam tapenu mangurug nga tuppalan na Dios i promesa na nga paginnolayan i natay ira. Anni gafu i kuattam tapenu mas mabbalin tu kuru-kurug ta nittam yatun nga iddanama?
ANNI I KUATTAM TAPENU MAS KURU-KURUG I PAGINNOLAY TA NITTAM?
17. Anni nakuan i daddammattam nu bibbigattam i rekord ira na paginnolay ta Biblia?
17 Bibbigan anna pannonopan tu mapia i nappasa ira nga paginnolay. Netura ta Biblia i walu nga paginnolay taw ta davvun. c Gigiammuammu tu mapia i kada tadday tatun. Durante nga kuammu yatun, daddammammu nga kurug yatun ira nga tolay—lallaki, babbay, anna abbarabbing. Sifutan nu anni ira i magigiammum. Pannonopan nu kunnasi nga ipasingan na kada tadday tatun nga ikaya anna egga i pakapangngua na Dios nga paginnolayan i natay ira. Siguraduammu gapa nga pannonopammu tu mapia i pinaka-importante nga paginnolay—i paginnolay ni Jesus. Daddammammu nga ginatu i nakasingan ta paginnolay na anna mangiyawa yatun tu maladda nga basehan ta pangurug tam.—1 Cor. 15:3-6, 20-22.
18. Kunnasim nga meyusa tu mapia i kansion ira meyannung ta iddanama nga paginnolay? (Innan gapa i footnote.)
18 Usammu tu mapia i “kansion ira nga nespirituan” meyannung ta iddanama nga paginnolay. d (Efe. 5:19) Uffunan ittam naw ira nga kansion tapenu mas mabbalin tu kuru-kurug ta nittam i paginnolay anna pasikannan na i pangurug tam taw nga makakkasta nga iddanama. Patokammu danatun, praktisammu nga kansionan, anna paguruvovugan nu i kebalinan na lyrics na ta family worship nu. I-memorize mu i lyrics na ira anna pannonopammu tu mapia tapenu mapasikan i pangurug mu anna madde na i futum. Tapus sonu meparubakka ta kapurueba nga mamappeligro ta inango mu onu matayakka tu iddeddukammu, ipanono ta niko na espiritu ni Jehova yaw ira nga kansion tapenu mabanna-bannayakka anna mapasikakka.
19. Anni i puede tam nga imajinan sonu paginnolay? (Innan i kahon nga “ Anni Saw i Iyavu Mu ta Nira?”)
19 Usammu i imahinasiommu. Niddan ittam ni Jehova tu abilidad nga masingan i baggi tam ta napabagu nga mundo. Tadday nga sister i nangistoria: “Kanayukku nga imajinan nga egga ngà ngana ta napabagu nga mundo. Yayya nga gitta na magug ku i mallappaw ira nga rosas ta Paraiso.” Imajinammu nga makilalam saw i matalo ira nga lallaki anna babbay ta tiempo na Biblia. Sinni i excited ka nga mammammu? Anni i kayà mu nga iyavu ta nisa? Imajinammu gapa nga makavulu mu ngana saw i iddeddukammu nga natay. Sonu dafungammu ira, anni saw i kagiammu? Kunnasi saw ka-iggo i paggakko mu ta nira? Kunnasi ka gapa saw kasaya? Imajinammu danatun.
20. Anni nakuan i determinasiottam?
20 Talaga mappappabalo ittam kani Jehova nga nangipromesa ta nittam ta paginnolay! Makasiguradu ittam nga mesimmu i promesa na megafu ta ikaya na anna egga i pakapangngua na nga kuan yatun. Determinadu ittam nakuan gafu nga tulu-tuloy nga pasikannan i pangurug tam tatun nga makakkasta nga iddanama tam. Nu kuattam yatun, mas maddukko ittam ta Dios nga nangipromesa ta kada tadday ta nittam, ‘Maginnolay i iddeddukammu!’
KANSION 147 Nepromesa i Pattolay nga Awan tu Addena
a Nu natayakka tu iddeddukan, siguradu nga mabanna-bannayakka ta promesa nga paginnolay. Ngem kunnasim mepakanawag ta tanakuan nu ngatta kurugammu yatun nga promesa? Anni i kuammu tapenu mas mabbalin tu kuru-kurug ta niko i iddanama nga paginnolay? Makoffun nittam ngamin yaw nga artikulo tapenu mapasikattam i pangurug tam ta iddanama nga paginnolay.
b I title na music video ay Araranni Ngana anna nepagiraw yatun ta Nobiembre 2016 nga broadcasting.
c Innan i kahon nga “Walong Pagkabuhay-Muli na Nakaulat sa Bibliya” ta Agosto 1, 2015 nga isyu na Ang Bantayan, p. 4.
d Innan i tumunug ira nga kansion ta “Magayayya nga Makkansion” Kani Jehova: “Sonu Napabagu i Ngamin” (Kansion 139), “Imammatan i Bendisionna!” (Kansion 144), anna “Magagal Yayya” (Kansion 151). Innammu gapa ta jw.org yaw ira nga orihinal nga kansion: “Araranni Ngana,” “Sonu Paraiso,” anna “Narito!”
