1. Ngatta makkomento ittam ta study?

 ANNI i gakkag tam ta pakistudy tam? I primeru nga rason ay tapenu dayawan si Jehova. (Sal. 26:12; 111:1) Makistudy ittam gapa tapenu makkapaga-pagaram ittam mas ngana taw nga mariga ira nga tiempo. (1 Tes. 5:11) Nu itayag tam i lima tam tapus makkomento ittam, parehu nga makua tam yatun ira nga gakkag tam.

2. Anni ira i chansa tam nga makapakkomento ta study?

² Kada ligguan, aru i chansa tam nga makkomento ta study. Angngarigan na, nu weekend, makapakkomento ittam ta Paggigiammu tu Passifusifutan na kongregasion. Nu study tam gapa ta midweek, puede ittam nga makkomento ta Espiritual nga Minas, ta Paggigiammu na Kongregasion tu Biblia, anna ta tanakuan paga nga parte nga mapaguruvovugan.

3. Ngatta magalangan ittam nga makkomento, anna kunnasi makoffun i Hebreo 10:24, 25?

³ Kayà tam ngamin nga dayawan si Jehova anna pagaramman danuri kakavulu tam ira nga maddayaw. Ngem nu makkomento ittam, baka magalangan ittam. Awayya na gare nga maggudu-gudu ittam, onu aru paga nakuan i kayà tam nga ikomento ngem ari ittam ngana nga magalan. Anni gafu i kuattam nu kunnatun? Makoffun i tura ni apostol Pablo ta Hebreo ira. Turi ta nipakanawag na nga importante i paggarammammung, kinagi na nga mawag nga maffokus ittam ta ‘pakkapasa-pasikan tu nono.’ (Bibbigan i Hebreo 10:24, 25.) Nu nonopattam gafu nga mapagaram i maggigginna maski ta simple ira nga komento tam, ari ittam ngana kuruga  maggudu-gudu. Nu ari ittam gapa kanayun nga magalan, magayayya ittam lagapa ta makapakkomento i tanakuan ta kongregasion.​—1 Ped. 3:8.

4. Anni i tallu nga punto nga gigiammuattam taw nga artikulo?

⁴ Taw nga artikulo, ollu labbi nga gigiammuattam nu kunnasi ittam nga makkapaga-pagaram nu baddi i kongregasion anna pilippiga laman i makkomento. Tapus ammuattam gapa nu kunnasi ittam nga makkapaga-pagaram nu dakal i kongregasion anna aru i mangitayag tu lima da tapenu makkomento. Paguruvovugattam gapa nu anni ira i makua tam tapenu makapagaram i ikagi tam ta komento tam.

5. Kunnasi ittam nga makkapaga-pagaram nu baddi laman i bilang tam ta kongregasion?

⁵ Nu baddi i kongregasion onu grupo, baddi laman gapa i magalan na mangikondukta. Nu karuan paga lagu, baka mawag na i maginnag nige nga egga i mangitayag tu lima na. Megafu tatun, gitta na kitebbayag nga mabalin i study anna ari ngana nga makapagaram yatun. Anni gafu i makuam? Itayag mu nakuan i limam maski mamippigam paga nga kuan yatun. Nu kunnatun gare i kuammu, mapagaram mu gapa i tanakuan nga mas paga makkomento.

6-7. Anni ira i awayya tam nga kuan tapenu ari ittam kuruga maggudu-gudu ta pakkomento?

⁶ Maggudu-gudu ka kari nga makkomento? Aru gapa i makatageno tu kunnatun. Ngem tapenu mas mapagaram mu i wawwaragi, anni tamma nu mannono ka tu makuam tapenu ari ka ngana kuruga maggudu-gudu sonu makkomento ka? Kunnasim nga makua yatun?

⁷ Baka makoffun nikaw nu ireviewm i karuan nga suhestion ta nappasa ira nga isyu na Passifusifutan. b Angngarigan na, mapprepara ka tu mapia. (Prov. 21:5) Nu mas gare nga familiar ka ta gigiammuan nu, ari ka kuruga maggudu-gudu nga makkomento. Kuammu gapa tu ababba i komentom ira. (Prov. 15:23; 17:27) Nu mas ababba gare i komentom, ari ka kuruga mannerbios. Mas gapa nga mantindian na wawwaragi i ababba ira nga komento nga awayya na tu tadday onu dua laman nga sentence, anne ta apparaddu nga komento nga nadduruma i ideya na. Nu ikagim i ababba nga komentom ta sarilim nga uvovug, mepasingammu nga nakaprepara ka tu mapia anna nalippawa mu tu mapia i gigiammuan nu.

8. Anni i matageno ni Jehova nu kuattam i adde na mawayya tam?

⁸ Kunnasi nu pinuruebammu ngana i karuan tatun ira nga suhestion ngem maggudu-gudu ka lagapa nga makkomento paga uli? Magga appresian ni Jehova i pangikagumammu. (Luc. 21:1-4) Ngem ari na gapa kayà kagian nga nu kuammu i adde na mawayyam ay fuersammu ngana i baggim nga kuan i gannug ira nga ariammu makua. (Fil. 4:5, NW ) Innammu nu anni i makuam, kuammu tu goal yatun, anna makimallo ka nga mapeggakka nakuan tu kalmadu nga futu. Ta gafu na, awayya na nga i goal mu labbi ay makapakkomento tu ababba.

9. Anni nga problema i awayya na nga luttuag ta dakal ira nga kongregasion?

⁹ Nu aru i publisher ta kongregasion nu, tanakuan labbi gapa i problema. Awayya na tu  napakaru i wawwaragi nga maya makkomento yayya nga baka ari ka kanayun nga magalan. Kunnatun i nesimmu kani Sister Danielle. c Kakayà na i makkomento ta study. Para gare ta nisa, parte yatun na paddayaw na, chansa na yatun tapenu pagaramman i tanakuan, anna tapenu mepatalatto na ta uto na i kinakurug ira ta Biblia. Ngem turi ta nagali yayya ta mas dakal nga kongregasion, ari ngana yayya magalan kanayun. Nu karuan paga lagu, maski mittan laman, ari yayya makapakkomento ta interu nga study. “Dismayadu ngà,” kunna. “Gitta na nawawakku i tadday nga pribilehio. Tapus nu pakatotoli nga kunnatun, manono mu nga baka sinadya da nga ari ka agalan.”

10. Anni ira i makua tam tapenu makapakkomento ittam?

¹⁰ Natageno mu ngana kari i kagitta na natageno ni Sister Danielle? Nu wan, baka awan ngana tu ganas mu nga makkomento anna magginna ka ngana laman ta study. Ngem ari ka nakuan magimmang. Anni i makuam? Baka makoffun nikaw nu aru nga komento i ipreparam kada study tapenu sonu ari ka insigida magalan, aru paga i chansam nga makapakkomento ta tumunug ira nga parte na study. Nu mapprepara ka gapa para ta Paggigiammu tu Passifusifutan, nonopammu nu anni i koneksion na kada parapo ta tema na artikulo. Nu kunnatun i kuammu, magga makangngua ka tu makasta ira nga komento para ta paggigiammu nu. Fuera paga tatun, awayyam gapa nga mapprepara tu komento para ta parapo ira meyannung ta monag ira nga kinakurug nga mas mariga ipakanawag. (1 Cor. 2:10) Ngatta? Baka mas baddi gare i maya nga makkomento tatun ira nga pakkiavu. Ngem kunnasi gapa nu sinuttul mu ngana i suhestion ira ngem napansin mu nga piga study ka ngana nga ari nakapakkomento? Nige na study, awayyam nga kibbidan i mangikondukta tapus ikagim ta nisa nu anni nga pakkiavu i kayà mu nga tabbagan.

11. Anni i ipagaram na Filipos 2:4 nga kuattam?

¹¹ Bibbigan i Filipos 2:4. Ta uffun na Dios, pinagaram ni apostol Pablo i Cristiano ira nga nonopadda i pammakapianan na tanakuan. Kunnasi tam nga meyaplika yatun nga tabarang  ta study tam ira? Nonopattam nakuan nga kayà gapa na tanakuan i makkomento.

12. Anni i makasta nga kuattam tapenu mapagaram i tanakuan ta study ira? (Innan gapa i letratu.)

¹² Nonopan yaw. Nu mabbirida kamu na kokkofummu, bida ka kari laman nga bida tapus ari ngana ira makapika? Siempre, manaki tam nga kuan yatun! Kayà tam gare nga magistoria gapa ira. Kunnatun gapa ta study tam ira. Kayà tam nga mas aru nakuan i makapakkomento. Kakurugan na, i tadday ta kapianan nga makua tam tapenu mapagaram i wawwaragi tam ay gukaban na pangiyawa ta nira tu chansa tapenu mekagi da gapa i pangurug da. (1 Cor. 10:24) Ammuattam nu kunnasi tam nga makua yatun.

13. Anni i makua tam tapenu mas aru i makapakkomento?

¹³ Kuattam tu ababba i komento tam tapenu mas aru i makapakkomento. Ikakkaguman na elder ira anna na ekspiriensadu ira nga publisher nga mangipasingan tu ehemplo tatun. Maski gapa nu ababba laman i komentom, ari nakuan tu napakaru nga punto i ipakanawag mu. Nu ikagim gare i ngamin nga egga ta parapo, awan ngana saw tu mekomento na tanakuan. Angngarigan na, taw nga parapo, egga i dua nga suhestion—kanayun nakuan nga ababba i komento ira anna ari nga mangipakanawag tu napakaru nga punto. Nu sikaw gafu i ollu nga nagalan tapenu makkomento taw nga parapo, mas makasta nu tadday laman i ikomentom tatun ira nga punto.

14. Anni i makoffun ta nittam tapenu mammuattam nu mamippiga ittam nga mangitayag tu lima? (Innan gapa i letratu.)

¹⁴ Innammu tu mapia i situasion tapenu mammuammu nu mamippiga ka nga makkomento. Nu kanayuttam gare nga itayag i lima tam, baka mappasiran saw i mangikondukta yayya nga sittam lallagu i agalan na maski nu ari paga nga nakapakkomento i tanakuan. Nu kunnatun i mesimmu, baka madiskorsunada ngana saw i tanakuan nga itayag i lima da.​—Ecl. 3:7.

15. (a) Anni nakuan i reaksiottam nu ari ittam nga nagalan tapenu makkomento? (b) Kunnasi nga mepasingan na mangikondukta ira nga agga-nono da i pammakapianan na ngamin? (Innan i kahon nga “ Nu Sikaw i Mangikondukta.”)

 ¹⁵ Nu aru nga publisher i mangitayag tu lima da ta study, baka sinaggi-mittan ittam laman nga magalan. Nu karuan paga lagu, baka ari ittam vuluvuga magalan na mangikondukta. Awayya na nga makadismaya yatun ngem ari ittam nakuan nga massinti.​—Ecl. 7:9.

16. Kunnasi tam nga mapasikan i tanakuan ira nga nakkomento?

¹⁶ Anni gafu i kuammu nu ari ka nga magalan kada kayà mu i makkomento? Makasta nu magginna ka tu mapia ta komento na tanakuan tapus kabalin na study, mappabalo ka ta nira. Kurug tu mapagaram i wawwaragi tari ira ta ikomentom nakuan. Ngem kunnatun gabbalaman i efekto na pangappresiam ta nira. (Prov. 10:21) Makoffun ta pakkapasa-pasikattam i pangiyawa tu komendasion.

17. (a) Kunnasi nga moffunan na magana ira i ána da nga mapprepara tu komento nga mepangngo para ta nira? (b) Base ta video, anni ira i appa nga steps ta papprepara tu komento? (Innan gapa i footnote.)

¹⁷ Kunnasi ittam paga makkapasa-pasikan ta study tam? Nu tadday ka nga magana, uffunammu i ána mu nga mapprepara tu komento ira nga mepangngo ta edad da. (Mat. 21:16) Nu karuan, magigiammu ta study i serioso ira  nga gannug gitta na problema ta pagatawa onu problema ira meyannung ta kinarenu ta moral. Ngem baka egga i pilippiga ira nga parapo nga awayya na nga makkomento i abbing. Ipalippawa mu gapa ta ána mu nu ngatta ari ira kanayun nga magalan kada itayag da i lima da. Makoffun yatun tapenu ari nga mattaki i nono da nu tanakuan i nagalan.​—1 Tim. 6:18. d

18. Anni i kuattam tapenu ari nga nakafokus ta nittam i komento tam? (Proverbio 27:2)

¹⁸ Makapapprepara ittam ngamin tu makapagaram ira nga komento nga mangidayaw kani Jehova anna mamasikan ta kapangngurug tam ira. (Prov. 25:11) Nu karuan, puede ittam nga mangistoria tu ababba anna personal ira nga ekspiriensa tam. Ngem ari nakuan tu kanayun ngana laman nga meyannung ta nittam i komento tam. (Bibbigan i Proverbio 27:2; 2 Cor. 10:18) Ikagumattam nakuan nga kanayun nga ikomento i meyannung kani Jehova, ta Uvovug na, anna ta ngamin nga totolena. (Nep. 4:11) Ngem siempre, nu i pakkiavu ta parapo ay magawag tu personal nga tabbag, mepangngo lagapa nga kuan yatun. I tadday nga angngarigan natun ay i tumunug nga parapo taw nga artikulo.

19. (a) Anni i resulta na nu agga-nono tam i pammakapianan na ngamin nga makistudy? (Roma 1:11, 12) (b) Para nikaw, anni i pinaka-appresiammu ta pakkomento ta study?

¹⁹ Maski nu awan tu istrikto ira nga direksion nu kunnasi i makkomento, ikagumattam nakuan ngamin i makkapasa-pasikan. Baka mawag tu mas paga nga makkomento ittam. Puede gapa nga makontento ittam ngana ta chansa tam nga makapakkomento anna magayayya megafu ta makapakkomento gapa i tanakuan. Nu agga-nono tam gafu i pammakapianan na tanakuan ta study tam ira, “makkapasa-pasikan ittam” ngamin.​—Bibbigan i Roma 1:11, 12.