1. Sitaw ittam nga kumbinsidu?

 BILANG totolay ni Jehova, ammu tam nga iddeddu na ittam anna kayà na i kapianan nga pattolay para ta nittam. (Roma 8:35-39) Kumbinsidu ittam gapa nga kanayun ittam nga mammakapia nu iyaplika tam i prinsipio ira na Biblia. (Isa. 48:17, 18) Ngem anni gafu i kuattam nu egga i problema nga gavva nga luttuag?

2. Anni ira nga problema i awayya na nga meparubang ta nittam, anna anni i awayya na tu manono tam megafu tatun?

² Makkaproblema i ngamin nga massesserbi kani Jehova. Angngarigan na, baka egga i kuan na tadday nga kafamilia tam nga makadismaya ta nittam. Posible gapa nga egga i taki tam yayya nga limitadu ngana laman i makua tam para kani Jehova. Baka nafektan ittam na kalamidad. Awayya na gapa tu mapeppersigi ittam megafu ta pangurug tam. Nu meparubang ittam ta kunnatun ira nga problema, baka manono tam: ‘Ngatta mesissimmu yaw ta nio? Anni kari i liwa ku? Ipasingan kari naw nga ari nà nga bebbendisionan ni Jehova?’ Natageno mu ngana kari i kunnatun? Nu wan, ari nakuan nga makkafi i nono mu. Natageno gapa yatun na aru ta matalo nga aripan ni Jehova.​—Sal. 22:1, 2; Hab. 1:2, 3.

3. Anni i magigiammu tam ta Salmo 34:19?

³ Bibbigan i Salmo 34:19. Sifutan i dua nga importante nga punto taw nga salmo: (1) Makkaproblema i matunung ira nga totolay. (2) Palubbangan ittam ni Jehova ta ziga tam ira. Kunnasi ittam nga palubbangan ni Jehova? Uuffunan na ittam tapenu mapeggan ittam tu realistiko nga pagimamma ta pattolay taw nga mundo. Nipromesa ni Jehova nga mabbalin ittam tu magayayya ta passerbi ta nisa ngem ari na nga kinagi nga  ari ittam vuluvuga nga makkaproblema sangawe. (Isa. 66:14) Ikaya na nga maffokus ittam ta mappange—i tiempo sonu magayayya ittam nga mattolay tu mannanayun. (2 Cor. 4:16-18) Ngem ta maddaggun, uuffunan na ittam tapenu metulu-tuloy tam i masserbi ta nisa ta kada aggaw.​—Sila. 3:22-24.

4. Anni i gigiammuattam taw nga artikulo?

⁴ Paguruvovugattam nu anni ira i magigiammu tam ta ehemplo na matalo ira nga aripan ni Jehova ta tiempo na Biblia anna ta tiempo tam. Mammuattam taw nga awayya na tu gavva nga egga ira i luttuag nga problema. Ngem nu mattalo ittam kani Jehova, kanayun na ittam nga uffunan anna iyegutan. (Sal. 55:22) Durante nga ikonsidera tam yaw ira nga angngarigan, iyavu mu ta baggim: ‘Anni tamma i kuakku nu mesimmu niakan yatun? Kunnasi nga pasikannan danaw i pattalo ku kani Jehova? Anni ira i mala ku nga meyusà ta pattolè?’

5. Anni ira nga problema i neparubang kani Jacob megafu kani Laban? (Innan i letratu ta vungun.)

⁵ Neparubang ta gavva ira nga problema i aripan ira ni Jehova ta tiempo na Biblia. Ikonsidera si Jacob. Zinog yayya na yama na nga mappili tu atawan na ta ána nga babay ni Laban, tadday nga parientes da nga maddayaw ta Dios. Nipasiguradu gapa ta nisa na yama na nga bendisionan yayya ni Jehova. (Gen. 28:1-4) Sinuppal yatun ni Jacob. Nanaw yayya ta Canaan anna nabbiahe maffunta ta balay ni Laban nga egga i dua nga ana na nga babay nga si Lea anna si Rachel. Iniddu ni Jacob i urian nga ana ni Laban nga si Rachel. Minanugu yayya nga mattrabahu tu pitu nga dagun kani Laban nige na nga ma-atawa si Rachel. (Gen. 29:18) Ngem ari tu kunnatun i nesimmu. Nilogo ni Laban si Jacob tapenu i kaka nga ana na nga si Lea i atawan na. Pappasa na tanga-ligguan, nipamavulun gabbalaman ni Laban nga atawan ni Jacob si Rachel. Ngem mawag nga masserbi yayya tu pitu paga nga dagun. (Gen. 29:25-27) Namippiga gapa nga ari sinuppal ni Laban i nakka-anugutadda dua ni Jacob. Zinarogas ni Laban si Jacob ta unag na 20 nga dagun!—Gen. 31:41, 42.

6. Anni i tanakuan ira nga problema nga inattamman ni Jacob?

⁶ Egga paga i tanakuan ira nga problema nga inattamman ni Jacob. Dakal i familia na ngem ari nga kanayun nga makkasundu i ána na nga lallaki. Nilaku da paga lagu i wagi da nga si Jose tapenu mabbalin tu aripan. Nepasiranan gapa i familia ni Jacob anna nauyaw i ngagan ni Jehova megafu ta dua nga ana na nga da Simeon anna Levi. Fuera paga tatun, natay i iddeddu nga atawa ni Jacob nga si Rachel turi ta iyana na i mekadua nga ana da. Megafu gapa ta grabe nga bisin, fersadu nga nagali si Jacob ta Ehipto maski nu lakay ngana yayya.​—Gen. 34:30; 35:16-19; 37:28; 45:9-11, 28.

7. Kunnasi nga nipasingan ni Jehova kani Jacob nga egga ta nisa i fabor na?

⁷ Maski nu aru i nappasa-pasan ni Jacob nga problema, ari vuluvuga nga nakkafi i pangurug na kani Jehova anna ta promesa na ira. Megafu tatun, nipasingan ni Jehova kani Jacob nga egga ta nisa i fabor na. Angngarigan na, maski nu nilogo yayya ni Laban, binendisionan lagapa ni Jehova si Jacob tu aru nga pakkukua. Siguradu gapa nga mappappabalo si Jacob kani Jehova turi ta nakkasingan ira uli na ana na nga si Jose nga abbo na tu mabayag ngana nga natay! Megafu ta madukko i relasion ni Jacob kani Jehova, naattamman na i problema na ira. (Gen. 30:43; 32:9, 10; 46:28-30) Nu ikagumattam gafu nga kanayun nga madukko i relasiottam kani Jehova, maattammattam gapa i problema ira nga gavva nga luttuag.

8. Anni i kayà nga kuan ni Patul David?

 ⁸ Ari nga nakua ni Patul David i ngamin nga nikayà na nga kuan para kani Jehova. Angngarigan na, kakayà ni David nga mamataddag tu templo para ta Dios na. Kinagi na yatun kani profeta Natan. Kunnaw i nitabbag ni Natan: “Kuammu nu anni i egga ta futum, megafu ta egga nikaw i kurug nga Dios.” (1 Cro. 17:1, 2) Siguradu nga nassikan i nono ni David turi ta naginna na yatun. Baka napplano paga lagu yayya insigida para tatun nga dakal nga proyekto.

9. Anni i kingngua ni David turi ta egga i makadismaya nga nekagi ta nisa?

⁹ Ngem ari nga nabbayag, nanoli i profeta ni Jehova megafu ta egga i makadismaya nga kagian na kani David. “Tatun mismu nga gabi,” kinagi ni Jehova kani Natan nga ari tu si David i mamataddag ta templo, nu ari, i tadday ta ána na. (1 Cro. 17:3, 4, 11, 12) Anni i kingngua ni David turi ta nakannammuan na yatun? Inuli na i plano na. Naffokus yayya ta pagunnug tu kuartu anna materiales ira nga kawagan na ana na nga si Solomon ta pamataddag.​—1 Cro. 29:1-5.

10. Kunnasi nga binendisionan ni Jehova si David?

¹⁰ Kabalin nga kinagi ni Jehova kani David nga ari tu yayya i mamataddag ta templo, insigida yayya nga nakipakkasinabban ta nisa. Nipromesa ni Jehova kani David nga tadday ta gaka na i mammaguray ta mannanayun. (2 Sam. 7:16) Ta napabagu nga mundo, marivu dagun nga mappatul si Jesus. Imajinammu ngana laman saw i ayayya ni David sonu makannammuan na nga tadday ta gaka na yatun nga Patul! Anni i magigiammu tam tatun? Maski nu ari tam nga makua i ngamin nga ikaya tam nga kuan para kani Jehova, awayya na tu egga i tanakuan nga bendision nga iyawa na Dios tam nga ari tam vuluvuga inekspekta.

11. Kunnasi nga nabendisionan i ollu-siglo ira nga Cristiano maski nu ari nga zimittal i Pappatulan ta tiempo nga inekspekta da yatun? (Kingngua 6:7)

¹¹ Neparubang ta gavva ira nga problema i ollu-siglo ira nga Cristiano. Angngarigan na, kakayà da nga duttal ngana i Pappatulan na Dios, ngem ari da nga ammu nu sonu anni nga mesimmu yatun. (King. 1:6, 7) Anni gafu i kingngua da? Nallallappo ira ta pallayyagayya. Habang mawwara nga mawwara i mapia nga dumug, nasingadda i pamendision ni Jehova ta kukukuadda.​—Bibbigan i Kingngua 6:7.

12. Anni i kingngua na ollu-siglo ira nga Cristiano turi ta egga i dakal nga bisin?

¹² Mittan, egga i zimittal nga kuruga dakal nga bisin “ta tanga-ravvunan.” (King. 11:28) Nafektan tatun maski i ollu-siglo ira nga Cristiano. Maimajimmu kari nu kunnasi kaziga para ta nira yatun nga nepallo nga pakkukurang tu makan? Siguradu nga pakavurungan na ulu ira na familia nu kunnasi da nga mapakan i familia da. Kumusta gapa i kabataan ira nga mappa-plano nga palawan i ministerio da? Natageno da kari nga mas makasta nu ari da ngana labbi nga ituloy i plano da? Maski nu mariga i situasion na Cristiano ira, kingngua da i ngamin nga mawayya da tapenu metulu-tuloy i pallayyagayya. Magayayya gapa ira nga ibillay i anni laman nga awayya da nga meyuffun ta kapangngurug da ira ta Judea.​—King. 11:29, 30.

13. Anni ira nga bendision i nalawa na Cristiano ira ta tiempo na bisin?

¹³ Anni ira nga bendision i nalawa na Cristiano ira ta tiempo na bisin? Nasingan mismu danuri nakalawa tu kawagadda nga makan i panguffun ni Jehova. (Mat. 6:31-33) Magga mas naddukko ira ta kapangngurug da nga nanguffun ta nira. Siguradu gapa nga nagayayya danuri nangiyawa tu donasion anna nanguffun ta pangitaneg tu makan. (King. 20:35) Binendisionan  ira ngamin ni Jehova megafu ta kingngua da i ngamin nga mawayya da maski nu nanguli i paddia-paddiadda.

14. Anni i nesimmu kadi Bernabe anna apostol Pablo, anna anni i resulta natun? (Kingngua 14:21, 22)

¹⁴ Maruddu nga mapersigi i ollu-siglo ira nga Cristiano. Nu karuan, mesimmu yatun ta tiempo nga ari da nga ekspektan. Kunnatun i nesimmu kadi Bernabe anna apostol Pablo durante nga mallayyagayya ira ta Listra. Ta gafu na, makasta i pinangalawa ta nira na totolay anna nagginna ira. Ngem turi kua, ‘ina na kumokkontra ira i nono na totolay’ anna binara-barag na karuan ta nagginna si Pablo tapus pinanawadda yayya gafu ta abbo da tu natay ngana yayya. (King. 14:19) Ngem nitulu-tuloy lagapa ni Bernabe anna ni Pablo i mallayyagayya ta tanakuan nga lugar. Anni i resulta natun? “Napakaru i nala da nga nabbalin tu disipulo” anna napasikadda i kapangngurug da ira megafu ta kinagi anna kingngua da. (Bibbigan i Kingngua 14:21, 22.) Aru i nabbenefisio megafu ta ari nga nagimmang nga nallayyagayya da Bernabe anna Pablo maski nu gavva ira nga napersigi. Adde gafu ta ari ittam magimmang nga kuan i ipakua ni Jehova, bendisionan na ittam.

15. Anni i magigiammum kani Brother A. H. Macmillan?

¹⁵ Nige na 1914, egga ira i inekspekta na totolay ni Jehova nga mesimmu. Tadday tatun si Brother A. H. Macmillan. Kagitta na aru nga wawwaragi tatun nga tiempo, ninono ni Brother Macmillan nga araranni ngana yayya nga mappalangi. Kinagi na ta palappa na turi ta Setiembre 1914: “Baka yaw ngana i ultimu nga palappa ku ta publiko.” Ngem ari tu yatun i nesimmu. Turi kua, nitura ni Brother Macmillan: “Awayya na tu alistu nga nakkonklusion i karuan ta nikami nga mappalangi kami insigida, ngem i mawag nakuan laman nga kuammi ay mallallappo ta passerbi ta Yafu.” Kunnatun i kingngua ni Brother Macmillan. Nallallappo yayya ta ministerio. Pinagaram na gapa i aru nga brother nga nefuku megafu ta manaki da i massuddalu. Ari gapa yayya nagimmang nga magatende ta study ira ta kongregasion maski nu lakay ngana yayya. Inusa tu mapia ni Brother Macmillan i tiempo na durante nga iinnaggan na i bala-balo na. Kunnasi yayya nga nabbenefisio tatun? Nige na patena turi ta 1966, nitura na: “Adde sangawe, masikan lagapa i pangurug ku.” Parigattam nakuan yayya, jebi nu mas mabayag ngana i pagattattam tam ta kapurueba anne ta kapaddu na tiempo nga inekspekta tam nga mabbayag yatun!—Heb. 13:7.

16. Anni i kalanna nga problema nga inarubang ni Herbert Jennings anna na atawa na? (Santiago 4:14)

¹⁶ Marigatan i aru ta totolay ni Jehova megafu ta kalanna nga egga i taki da. Angngarigan na, kinagi ni Brother Herbert Jennings b ta istoria na pattolena nga magayayya ira dua na atawa na ta asayment da bilang misionero ta Ghana. Ngem egga i tiempo nga na-diagnose tu egga i serious mood disorder na. Anni i reaksion na tatun? Inusa ni Brother Jennings i uvovug ira ta Santiago 4:14 anna inagalan na yatun nga nesimmu ta nisa bilang “tadday nga ‘nonumma’ nga ari mi nga inekspekta.” (Bibbigan.) Nitura na: “Mawag nga mabbalikkami tu realistiko yari tu dinesisiommi nga panawan i Ghana anna i aru ta madukko nga kokkofummi tapus manoli ta Canada [tapenu mapporu].” Inuffunan ni Jehova si Brother Jennings anna i atawa na tapenu metulu-tuloy da i matalo nga passerbi da ta nisa maski nu mariga i problema da.

17. Kunnasi nga nabbenefisio i tanakuan ta inistoria ni Brother Jennings?

 ¹⁷ Nakoffun ta tanakuan i inistoria ni Brother Jennings. Nitura na tadday nga sister: “Yaw ngana siguru i artikulo nga pinaka-nakatukkal ta futù. . . . Kustu nabibbig ku nga mawag nga panawan ni Brother Jennings i pribilehio na tapenu mapporu, nakoffun yatun tapenu mabbalin ngà tu realistiko ta situasiokku.” Kunnaw gapa i nitura na tadday nga brother: “Mafulu ragun ngà nga nasserbi bilang elder ta kongregasion. Ngem mawag tu ibbattakku i pribilehiò megafu ta egga i problema ta mental nga gawa-gawayyakku. Natageno ku nga gitta na awan tu kekkwentà yayya nga awan tu gaganas ku nga mabbibbig tu istoria ira na pattolay. . . . Ngem napagaram ngà ta pappasa-pasensia ni Brother Jennings.” Magigiammu tam tatun nga mapagaram tam i tanakuan nu pasensiattam i problema ira nga gavva nga limittuag. Maski nu gavva nga nanguli i pattoletam, awayya tam lagapa i mabbalin tu makasta nga ehemplo ta pangurug anna pappasensia.​—1 Ped. 5:9.

18. Anni i magigiammum ta balu nga taga-Nigeria nga kaparehu na egga ta picture?

¹⁸ Aru nga totolay ni Jehova i nafektan na mariga ira nga situasion kagitta na COVID-19 pandemic. Angngarigan na, tadday nga balu ta Nigeria i aranni ngana nga mofu i kanan anna kuartu na. Tadday nga umma, niyavu ta nisa na ana na nga babay nu anni saw i kanadda kabalidda nga lutuan i ultimu nga takal na bagga da. Kinagi na sister ta ana na nga awan ngana vuluvuga tu nabattang nga kuartu onu kanadda ngem mawag nga parigadda i balu nga taga-Zarepta—lutuadda i ultimu nga kanadda anna italo da ngana i ngamin kani Jehova. (1 Pat. 17:8-16) Nige da paga nonopan nu anni saw i pangumma da tatun nga aggaw, nakalawa ira tu ayuda maggafu ta kapangngurug da. Makalanno para ta maturu tu dua nga ligguan i makan ira nga egga ta ayuda. Inistoria na sister nga ari na nga abbattan nga gigginnan  tu mapia ni Jehova i kinagi na ta ana na. Nu egga gafu i gavva nga luttuag nga problema, awayya tam i mas nga maddukko kani Jehova basta maddepende ittam ta nisa.​—1 Ped. 5:6, 7.

19. Anni nga pameppersigi i inattamman ni Aleksey Yershov?

¹⁹ Ta nappasa ira nga dagun, inattamman na aru ta wawwaragi tam i gavva nga pameppersigi. Kunnatun i nesimmu kani Brother Aleksey Yershov nga taga-Russia. Turi ta na-baptize si Brother Yershov ta 1994, egga i lallaguray na totolay ni Jehova ta diadda. Ngem ta pappasa na piga nga dagun, nanguli i situasion ta Russia. Turi ta 2020, gavva nga sinallung na autoridad ira i balay ni Brother Yershov anna ina da i aru ta pakkukua na. Ta pappasa na piga nga vulan, kinasowan yayya na gobiernu. Nangapadda tu ebidensia para ta kaso? Egga i video ira nga nirekord na tadday nga nagappappe nga interesadu nga nappa-Bible study ta maturu tu tanga-ragun. Talaga natraidor yayya!

20. Kunnasi nga nalladda i relasion ni Brother Yershov kani Jehova?

²⁰ Egga kari i makasta nga nesimmu megafu ta kapeppersigi ni Brother Yershov? Wan. Mas nga nalladda i relasion na kani Jehova. “Mas mamikkaru kami ngana nga makimallo na atawà,” kinagi na. “Ammù tu imposible nga maattammakku yaw nga situasion nu awan tu uffun ni Jehova.” Kinagi na paga: “Nakoffun ta nio i personal study tapenu ari nga makkafi i nono ku. Pinannonopakku tu mapia i ehemplo ira na matalo nga aripan ta nappasa. Aru nga istoria ta Biblia i mangipasigo nu kunnasi ka-importante i pattalupaddian nga kalmadu anna pattalo kani Jehova.”

21. Anni i nagigiammu tam taw nga artikulo?

²¹ Anni i nagigiammu tam taw nga artikulo? Taw nga mundo, normal laman nga egga i gavva nga luttuag nga problema. Ngem maski paga kunnatun, kanayun nga uffunan ni Jehova i aripan na ira basta maddepende ira ta nisa. Gitta na nakagi ta tema nga teksto tam, “i matunung nga tolay ay aru nga ziga i attamman na, ngem palubbangan yaya na YAFU ta ngamin nga ziga na.” (Sal. 34:19) Ari nakuan tu i problema tam ira i agga-nono tam, nu ari, i pakapangngua ni Jehova nga uffunan ittam. Nu kunnatun i kuattam, makagi tam gapa i kinagi ni apostol Pablo: “Egga i sikakku nga arubangan i ngamin nga gannug gafu ta mangiyayawa niakan tu pakapangngua.”​—Fil. 4:13, NW.